Zekharia 6

Paite Bible

Kangtalai Lite

6 TUA khitin, ka dakkhiak leh, ka mai ah sumsan mual nih kal apan hong paikhia kangtalai li a om hi! ² Kangtalai khatna sakol sante’n a kai a, a nihna a vomte’n, ³ a thumna a kaangte’n, a lina a puangte’n a kai uhi. Sakolte a hat vive ahi. ⁴ Kei hon houpih tua vansawltak kiang ah ke’n: Hiaite bang hi hiam, ka toupa aw? chi-in ka dong hi.

⁵ Tua vansawltak in hon dawng a: Hiaite vantunga kha lite, leitungbup’ Toupa’ omna muna a dinna uapan hong paikhia ahi uhi. ⁶ Sakol vomte’ kaih pen mallam gama pai ding ahi. Sakol kaangte kaih pen tumlam ah, sakol puangte kaih pen simlama pai ding ahi, a chi hi.

⁷ Tua sakol sante a paikhiak takun, leitung maikaiha paisuak a sawm tinten uhi. Tua vansawltak in: Leitung maikaih ah paisuak un! a chi a, tuachi-in, leitung maikaih ah a paisuak uhi.

⁸ Tua vansawltak in kei hon sam a: En dih, mallam gama paite’n mallam gam ah ka Kha tawldamna a pia uhi, a chi hi.

Jeshua ading Kumpilukhu

⁹ Tangtawn Toupa’ thu ka kiang hong tung a: ¹⁰ Babulon apan hong pai saltangte Heldai, Tobija leh Jedaia apan thawnpiak ngun leh khamte la inla, tua ni mahin Zefania’ tapa Josia’ inn ah hawh in. ¹¹ Tua ngun leh khamte la inla, kumpilukhu khat bawl inla, Jehozadak’ tapa tua siampilian Jeshua khusak in. ¹² Amah kiang ah: Tangtawn Toupa Vanglianpen’ thugen hiai ahi: Kahiang Sel chih min kivawhpa hiai ahi. Ama’ mun apan selkhe ding a, ama’n Tangtawn Toupa’ tempul lam ding hi. ¹³ Tangtawn Toupa’ tempul lam dingpa amah hi a, thupina silhsakin om ding a, a kumpitutphah tunga tuin vai hawm ding hi. Tua baan ah, a kumpitutphah tung ah siampi hi ding hi. Hiai hihna nihte kilem ding hi, chi hi, chi in. ¹⁴ Tangtawn Toupa’ tempula theihgigena hi dingin, tua kumpilukhu, Heldai, Tobija, Jedaia leh Zefania’ tapa Helem kianga piak ahi ding. ¹⁵ Gamlapi-a omte hong pai ding uh a, Tangtawn Toupa’ tempul a lampih ding uh a, Tangtawn Toupa Vanglianpen in noute kiang ah kei hon sawl, chih na thei ding uh. Tangtawn Toupa na Pathian’ thu muanhuaitaka na zuih tinten leh,

hiai hong tangtung ding ahi, a chi hi.