Zekharia 14

Paite Bible

Jerusalem Simna Nunung

14 NGAI dih, gallaak sum na kihawm hun uh

Tangtawn Toupa’ ni hong tung dek.

² Ahang bel, Jerusalem dou dinga

keima’n namte khempeuh

kaikhawm ding hivengin.

Tua khawpi kila ding a,

innte kibuluh ding a,

numeite kipawngsual ding hi.

Tua khawpi kimkhat sala kaihmanga

om ding a, a sibang khawsuaksunte

kia tua khawpi apan satkhiak

hi lou ding hi.

Mesia hong Pai Nihveina

³ Tua khit chianga Tangtawn Toupa

kuankhe ding a, tua namte

dou ding a, galsat ni-a a dou

bang hi ding hi.

⁴ Tua ni chianga Oliv Mual khea

sikin amah ding ding hi.

Tua mual, Jerusalem suahlama

om ahi.

Tua Oliv Mual phelnih kisuah

ding a,

suahlam apan tumlam dongin

kiphelkhap ding a, a kal ah

phaizang lianpi om ding hi.

Tua mual phel khat mallam ah

kikhin ding a, a phel

khat simlam ah kikhin ding hi.

⁵ Tua ka mual kal phaizanga taai

ding hi teh.

Tua phaizang in Azel dong

sun ding hiven.

Ahi, kumpipa Uzia dam laia zinlinga

na taai banga taai ding hi teh.

Tua banga Tangtawn Toupa ka

Pathian hong pai ding a,

misiangthoute khempeuh tawh

hong ton ding hi.

⁶ Tua ni chianga khawvak om lou

ding a,

khawdam zong, vuuk zong om

lou ding hi.

⁷ Ni tuam mawng khat hi ding a,

sun hun zan hun om lou ding!

Tangtawn Toupa’ theih

ni hi ding!

Nitaklam hong tun chianga

khua vaak ding hi.

⁸ Tua ni chianga Jerusalem apan tui

hing luangkhe ding a,

a kimkhat suahlam tuipi lam ah,

a kimkhat tumlam tuipi lam

ah —nipi leh phalbi-in zong

luang ding hi.

Mesia’ Kumpigam

⁹ Tua ni chianga leitung khempeuha

Tangtawn Toupa kumpipa hi

ding a,

tua ni chianga Tangtawn Toupa

khat om ding a, ama’ min khat

mah a omsun hi ding hi.

¹⁰ Gam sung khempeuh Jerusalem simlama Geba apan Rimon dongin, Araba phaizang a bang ding hi. Ahihhangin, Jerusalem a sangtuam ding a, Benjamin kongpi apan Kongpi Khatna mun leh Akiu Kongpi dong, Hananel Innsang apan kumpi’ grepkhuk dongin ama’ mun ah a omden ding.

¹¹ Tua sunga mite teeng ding a,

siat dimdemna om nawn

lou ding a,

Jerusalem bittaka kiluah

zaw ding hi.

¹² Jerusalem doua sim namte khempeuh, Tangtawn Toupa’n a saat nading hiai hipi ahi ding.

Khe-a a din lai nangawnun

a sa uh muatkhe ding a,

a mitte uh a mitkhuk sung uah

muat ding a,

a lei uh a kamsung uah

muat ding hi.

¹³ Tua ni chianga Tangtawn Toupa’n

launa thupitakin mite man ding a,

michih in a innveng’ khut

man ding a, kisual ding uhi.

¹⁴ Judah in zong Jerusalem ah gal dou

ding a, a kim a pama namte

khempeuh’ hauhna —

kham leh ngun leh

puansilh tampi mahmah

kikaikhawm ding hi.

¹⁵ Tua bang hipi mah sakolte,

sakol neute, sangawngsaute,

sabiltungte leh giahphuala

gante khempeuh tung ah tung

ding hi.

¹⁶ Tua khit chiangin, Jerusalem doua sim namte khempeuh laka a sibang khawsuaksunte, Kumpipa Tangtawn Toupa Vanglianpen be dingin leh Bawktate Ankuangluite nei dingin, kum simin Jerualem ah a kuantou ding uh. ¹⁷ Leitung mite laka kuapeuh, Kumpipa Tangtawn Toupa Vanglianpen be dinga Jerusalema kuantou lou a om leh, tuate’n vuahtui a mu kei ding uh. ¹⁸ Aigupta mite kuantou a, a va kihel kei uleh, vuahtui a mu kei ding uh. Tangtawn Toupa’n Bawktate Ankuanglui dinga kuantou loute tunga a tunsak hipi

amaute tung ah a tungsak ding.

¹⁹ Hiai bel Aiguptate leh Bawktate Ankuanglui dinga kuantou lou namte khempeuh khelhna gawtna ahi ding.

²⁰ Tua ni chiangin, TANGTAWN TOUPA ADINGA SIANGTHOU chi-in sakol longte tung ah khuakthawh-in a kigelh ding. Tangtawn Toupa’ inn sunga beelte, maitam maia belkuangte a bang ding. ²¹ Jerusalem leh Judah gama beelte peuhmah Tangtawn Toupa Vanglianpen adinga siangthou ahi ding a, kithoihna lan dinga hong

pai peuhmah in tua beelte a la ding uh a, tuatein an a huan ding uh.

Tua ni chiangin, Tangtawn Toupa Vanglianpen’ inn ah Kanan mi a om nawn kei ding.