Zekharia 13

Paite Bible

Khelhna apan Siansakna

13 TUA ni chiangin, David’ innkawte leh Jerusalema teengte adingin, khelhna leh sian¬thoulouhna apan siansak nadingin tuikhuk khat a kihong ding.

² Tua ni chiangin, gam sung apan miliante’ minte ka beisak ding a, a kitheigige nawn kei ding, chi-in Tangtawn Toupa Vanglianpen in a phuang hi. Gamsung apanin kamsangte leh sianlouhna kha ka lakhe ding. ³ Kuapeuh in kamsang thugen a gen leh, a pianna nu leh pa’n: Tangtawn Toupa’ mina zuauthu na gen manin, na si ngeingei ding ahi, a chi ding uh. Kamsang thugen a gen chiangin, ama’ nulepa mahmah in amah a dawt pailet ding uhi.

⁴ Tua ni chiangin, kamsang peuhmah in a kamsang mengmuh a zahpih ding. Mikhem nadingin kamsang puansilh, samulpuan a silh kei ding. ⁵ Ama’n: Kamsang ka hi kei. Louneimi ka hi. Ka tuailai apan loukhoua kivak ka hi, a chi ding. ⁶ Kuapeuh in: Na khuta hiai liammate bang ahia? a chih chiangin, ama’n: Ka lawmte’ inn-a liamsaka ka omna ahi, chi-in a dawng ding hi.

Belamchingpa Kisaat

⁷ Namsau aw, ka Belamchingpa,

ka Lawm ahipa dou dingin

khanglou in! chi-a

Tangtawn Toupa Vanglianpen

in phuang hi.

Belamchingpa saat in, belamte

a kithehthang ding.

Tua chiangin, ke’n a nou neute tung

ah khut kha ding hi’ng.

⁸ Gamsung khempeuh ah, a sunga om

sehthum suah sehnih satkhiakin

om ding a, mangthang ding uhi.

Sehthum suah seh khat bel nutsiat

hi ding hi, chi-a Tangtawn Toupa’n

phuang hi.

⁹ Hiai a sehthumna meikuang ah

paisuaksak ding ing a,

ngunsik banga entel ding hi’ng.

Amaute’n Ka min samin hong

toukou ding uh a,

ke’n amaute dawng ding hi’ng.

Ke’n: Hiai ka mite ahi, chi ding ing a,

amaute’n: Tangtawn Toupa ka

Pathian uh ahi, hon chi

tek ding uhi.