Vaihawmte 1

Paite Bible

Kanan Gam Lak Masawnna

1 JOSHUA sih nungin Israel tate’n Tangtawn Toupa kiang ah: Koute adinga Kanante dou ding kua kuan masa ding ahia? a chi uhi.

² Tangtawn Toupa’n a dawng a: Judah nam a kuan masa ding ahi. Ngai un, amaute khutsung ah gam ka pia hi, a chi hi.

³ Tua khitin, Judah nam in a sanggam uh Simeon nam kiang ah: Kanante hong doupih dingin, kou adia seh gam ah hong kuantou sam un. Koute zong nou adia seh gam ah kong kuan sam ding uh, a chi uhi. Tua bangin, Judah nam zuiin Simeon nam a kuantou uhi.

⁴ Judah nam a kuan uh a, Tangtawn Toupa’n amaute’ khut sung ah Kanante leh Perizte a pia a, Bezek khua ah mi 10,000 a zou uhi. ⁵ Tua Bezek khua ah Adoni Bezek a mu uh a, amah a dou uh a, Kanante leh Perizte a zougawp uhi. ⁶ Adoni Bezek a tai a, amaute’n delhin a man uh a, a khutpite gel leh a khepite gel a tankhiaksak uhi.

⁷ Adoni Bezek in: Ke’n ka khatehnen tawm kumpipa 70 -te’ khutpite leh khepite ka tankhiaksak a, amaute tunga ka gamtat bangbanga Pathian in hon thuk a hita ve, a chi hi. Judah suante’n amah Jerusalem ah a paipih uh a, tua ah a si hi.

⁸ Judah suante’n Jerusalem khawpi a sim uh a, namsauin a mite a that uh a, tua a la uh a, meiin a hal uhi.

⁹ Tua nungin, tanggam leh Negev gamdai-gamkeu leh mual niam gama teng Kanante dou dingin Judah suante a kuan uh a, ¹⁰ Hebron khawpi-a teengte a dou uh a, Sesai tawh Ahiman tawh, Talmai tawh a zou uhi. Hebron min masa bel, Kiriath Arba ahi.

¹¹ Tua apanin a kuan uh a, Debir khawpi-a teengte a dou uhi. Debir min masa bel Kiriath Sefer ahi. ¹² Kaleb in: Kiriath Sefer dou a, la zou om leh, a zi dingin ka tanu Aksa ka pe ding, chi-in thu a chiam hi. ¹³ Kenaz’ tapa Othniel in tua khawpi a la zou a, Kaleb in a tanu Aksa a zi dingin a pia hi. Kenaz bel Kaleb’ naupa ahi.

¹⁴ Aksa, Othniel kiang hong tun takin, ni khat bel, a pa kianga lou khat ngen dingin amah a sawl teitei hi. Aksa a sabiltung apan a kumkhiak takin, Kaleb in: Bang deih na hia? a chi hi.

¹⁵ Aksa in: Deihsakna tuam khat hon pia inla, Negev gamdai-gamkeua gam non piaktak ngal leh, tua tuinakte zong hon pia in, a chi a, Kaleb in tuinak saknung leh tuinak khangnung a pia hi.

¹⁶ Tua laiin, Mosi’ sungpa’ suante, Tumsing ^[a] Khawpi kichi apan, Arad simlama Judah gamdai-gamkeu ah, Judah suante kiang ah a pemtou uh a, amaute lak ah a teeng uhi. Mosi’ sungpa bel Ken mi ahi.

¹⁷ Tua nungin, Judah nam leh a sanggamte uh Simeon nam in, Zefath khawpi-a teeng Kanante a sim uh a, a khawpi a hihgawp dimdem uh a, Horma chi-in tua khawpi a minvawh uhi. ¹⁸ Tua baan ah, Judah nam in Gaza khawpi leh a khawtate leh, Ashkelon khawpi leh a khawtate leh, Ekron leh a khawtate zong a la uhi.

¹⁹ Tangtawn Toupa’n Judah nam a ompih a, tanggama teengte a hawlkhia uhi. Ahihhangin, phaizanga teengte’n sik kangtalaite a neih manun a hawlkhe zoukei uhi. ²⁰ Mosi’ chiamsa bangin, Kaleb adingin Hebron a pia uh a, Kaleb in Anak’ tapa thumte tua apan a hawlkhia hi. ²¹ Benjamin suante’n bel Jerusalema teeng Jebuste a hawlkhe kei uh a, tuni dongin Benjamin’ suante lak ah amaute a teeng lai uhi.

²² Tua bang mah in, Josef’ innkawte Bethel sim dingin a kuan uh a, Tangtawn Toupa’n amaute a ompih hi. ²³ Bethel min masa bel Luz ahi. Bethel enkhe dinga enkhemi a kisawl laiun, ²⁴ enkhemite’n khawpi apan hong paikhia mi khat a mu uh a, amah kiang ah: Khawpi sung lutna non hilh leh, na tung ah zahngaih ka suah ding uh, a chi uh a, ²⁵ ama’n amaute kiang ah khawpi sung lutna a hilh a, amaute’n namsauin tua khawpi mite a that uh a, tua mipa leh a innkawte khempeuh bel a hawi uhi. ²⁶ Amah Hitte gam ah a pem a, tua ah khawpi khat a lam a, a min dingin Luz a sa a, tuni dongin tua min a puden hi.

Gam Lakbeilouhte

²⁷ Manase nam in Beth Shan leh a khawtatea teengte leh, Taanak leh a khawtatea teengte leh, Dor leh a khawtatea teengte leh, Ibleam leh a khawtatea teengte leh, Megido leh a khawtatea teengte a hawlkhe kei uhi. Ahang bel Kanante’n tua gama teen a tum tinten ua ahi. ²⁸ Israelte hong hat takun, Kanante siah a liausak teitei uhi. Siah liausak mah le uh, Kanante a hawlkhe vek kei uhi. ²⁹ Efraim nam in zong Gezer khua-a teeng Kanante a hawlkhe kei uh a, Gezer ah amaute lak ah Kanante a teeng uhi. ³⁰ Zebulun nam in zong Kitron-a teengte hita leh, Nahalola teengte hita leh a hawlkhe kei uh a, Kanante amaute lak ah a teeng uh a, ahihhangin, siah a liausak uhi. ³¹ Asher nam in Ako khua-a teengte leh Sidon khua-a teengte leh, Alab khua-a teengte leh, Akzib khua a teengte leh, Helba khua-a teengte leh, Afek khua-a teengte leh, Rehob khua-a teengte a hawlkhe kei uhi. ³² Tua banga hawlkhiak louha a hawi manun, tua gama teeng Kanante lak ah Asherte a teeng uhi. ³³ Naftali nam in zong Beth Shemesh khua-a teengte leh, Beth Anath khua-a teengte siah a liausak uhi. ³⁴ Amorte’n Dan suante tanggam ah a nawhkhetou uh a, phaizanga a hong paisuk ding uh a phal kei uhi. ³⁵ Amorte’n Heres Mual leh Aijalon leh Shaalbim a nuse nuam kei uh a, ahihhangin, Josef innkawte hong hat semsem takun, Amorte siah a liausak uhi. ³⁶ Amorte’ gamgi bel Akrabim Taangkanna ^[b] apan, Sela apan a tunglama paitou ahi.