Siampilaibu 3

Paite Bible

Lemna Thillat

3 MI khat peuh’ thillat pen, lemna thillat ahih a, bawnghon lak apan ganta khat, a pa hi-in, a nu hiam hita leh, Tangtawn Toupa’ mai ah ganta genbaanglou a lan ding ahi. ² Ama’n a ganta lu tung ah a khut a nga ding a, Kihoupihna Puanbuk lutna ah a gou ding ahi. Tua khit chiangin, Aron’ tapa siampite’n a sisanin maitam pang a kimkotin a theh ding uh ahi. ³ Tua lemna thillat apan Tangtawn Toupa’ maia meia thillat ding a hon tawi ding ahi. Tua dingin, a sungthau teng, a hih kei leh, tuate tawh kizom teng, ⁴ a kailing nihte leh a phuka tuate tuam a thaute leh a sin tuam teng, a kailing tawh lakkhiak khawm teng ahi ding ahi. ⁵ Tua khit chiangin, Aron’ tapate’n maitam tunga meia kuang sing tung ah a haltum ding uh ahi. Hiai meia thillat ahi a, Tangtawn Toupa’ lungkimna gim namtui ahi.

⁶ Belam leh kelhon lak apan ganta, Tangtawn Toupa’ maia lemna thillat ding a lat leh, a pa hiam, a nu hiam, genbaanglou ahi ding ahi. ⁷ Belamnou a lat leh, Tangtawn Toupa’ maia tawi ding ahi. ⁸ Ama’n a ganta’ lutung ah a khut a nga ding a, Kihoupihna Puanbuk mai ah a gou ding ahi. Tua khit chiangin, Aron’ tapate’n a sisanin maitam pang teng, a kimkotin a theh ding uh ahi. ⁹ Tua lemna thillat apan Tangtawn Toupa’ maia meia thillat ding a hon tawi ding ahi. Tua dingin, a thau, a ngum guh apan atkhiak a mei tuam teng, a sungthau teng, ahih kei leh, tuate tawh kizom teng, ¹⁰ a kailing nihte leh a phuk sunga tuate tuam a thaute leh a sin tuam teng, a kailingte tawh lakkhiak khawm teng ahi ding ahi. ¹¹ Siampi in tuate maitam tung ah an thillatin a haltum ding ahi. Hiai Tangtawn Toupa’ maia thillat ahi.

¹² Tua thillat pen kel a hih leh, Tangtawn Toupa’ maia hon tawi ding ahi. ¹³ Tua ganta lu tung ah a khut a nga ding a, Kihoupihna Puanbuk mai ah a gou ding ahi. Tua khit chiangin, Aron’ tapate’n a sisanin maitam kimkot ah a theh ding uh ahi. ¹⁴ Tua thillat apan Tangtawn Toupa’ maia meia thillat ding a lakhe ding ahi. Tua dingin, a sungthau teng, ahih kei leh tuate tawh kizom teng, ¹⁵ a kailing nihte leh a phuk sunga tuate tuam a thaute leh a sin tuam teng, a kailingte tawh lakkhiak khawm teng ahi ding ahi. ¹⁶ Siampi in tuate maitam tung ah an thillatin a haltum ding ahi. Hiai Tangtawn Toupa’ lungkimna gim namtui ahi. A thau khempeuh Tangtawn Toupa—a ahi.

¹⁷ Hiai na tenna peuh ua, khangsawn sawn adinga omden ding thuseh ahi. A thau hiam, sisan himhim hiam na ne ding uh ahi kei hi, chi in, a chi hi.