Siampilaibu 21

Paite Bible

Siampite tawh kisai Dante

21 TANGTAWN Toupa’n Mosi a houpih a: Siampite, Aron’ tapate kiang ah thu gen inla: Siampi in a mite laka misi khat peuh hangin, a siangloua ngaihin a kibawl ding ahi kei hi. ² A tanau, a nu hiam, a pa hiam, a tapa hiam, a tanu hiam, a sanggampa hiam, ³ pasal nei nailou a sanggamnu hiam ama’ vaksa a hih leh bel, a sianglouin a kibawl thei ding hi. Tua sanggamnu’n pasal neilou a hih manin, ama’ adingin bel, a sianglouin a kibawl thei ding hi. ⁴ Kitenna hanga a kitanaupih mi adingin bel, a sianglouin a kibawl ding ahi kei hi.

⁵ Siampite’n a sam uh a metmai ding uh ahi kei a, a khamul uh zong a mettom ding uh ahi kei a, a satung uh zong a at keh ding uh ahi kei hi. ⁶ A Pathian uh adingin a siangthou ding uh ahi a, a Pathian uh’ min a ninsak ding uh ahi kei hi. Tangtawn Toupa’ maia meia thillatte, a Pathian uh’ an laan ahih manun, amaute a siangthou ding uh ahi.

⁷ Siampite bel, Pathian adinga siangthou ahih manun, kizuaka kihihnin hiam, maksa numeite hiam, a kitenpih ding uh ahi kei hi. ⁸ Amaute’n na Pathian uh an lan a hih manun, amaute siangthoua na ngaih ding uh ahi. Kei Tangtawn Toupa a siangthou ka hih manin, amaute a siangthouin ngai un. Kei noute a siangthoua hon bawlpa ka hi.

⁹ Siampi’ tanu kizuaka, a kihihnit leh, a pa a zahlaksak ahi. Tua bang numei meia hallup ding ahi.

Siampilian tawh kisai Dante

¹⁰ A sanggampate laka siampiliana pang, a luzanga sathau kisung a, thaunilhna tang, siampi puansilhte silh dinga namkip pen in, a lukhu a lakhe ding ahi kei a, a puansilhte zong a botkek ding ahi kei hi. ¹¹ Misi luang khat peuh omna ah a lut ding ahi kei. A pa hiam, a nu hiam nangawn hangin zong a sianglouin a kibawl ding ahi kei hi. ¹² Amah a Pathian’ thaunilhna tungtawna kinamkip ahih manin, a Pathian’ mun siangthou a nuse ding ahi kei hi. Nin zong a ninsak ding ahi kei hi. Kei Tangtawn Toupa ka hi.

¹³ Numei a kitenpih zong nungak siangthou ahi ding ahi. ¹⁴ Meigong a kitenpih ding ahi kei a, maksa numei hiam, ahih kei leh, kizuaka kihihnin numei a kitenpih ding ahi kei. Ama’ mite laka nungak siangthou kia a kitenpih ding ahi. ¹⁵ Tuachi-in, a mite lak ah, a suan a khakte a ninsak kei ding hi. Kei amah hihsiangthoupa Tangtawn Toupa ka hi, chi in, a chi hi.

Siampi Nasem Theilou Mite

¹⁶ Tangtawn Toupa'n Mosi a houpih a: ¹⁷ Aron kiang ah thu gen inla: Hong tung ding khangsawn sawnte lak ah zong, na suan na khakte laka melhemna nei mi peuhmah in a Pathian’ an lan dingin hon naih ding ahi kei hi. ¹⁸ Melhemna nei kuamah, a mittaw hiam, a khebai hiam, a mel kisia hiam, poihlong hiam kuamah in hon naih kei hen. ¹⁹ Khe kitan hiam, khut kitan hiam, ²⁰ ahih kei leh, nungkul hiam, neupian tuam hiam, mit sia hiam, meima dam theilou tuikai huphup hiam, chiltang kitam hiam kuamah in thillan dingin hon naih kei hen. ²¹ Siampi Aron’ suan, melhemna nei kuamah in Tangtawn Toupa’ maia meia thillat dinga kisa dingin hon naih ding ahi kei. Melhemna nei ahi a, a Pathian’ an lan dingin hon naih ding ahi kei hi. ²² A Pathian an siangthoupen leh an siangthou bel a ne thei ding. ²³ Ahihhangin, a melhemna hangin, puanzak kaanin a lut ding ahi kei a, maitam zong a naih ding ahi kei hi. Tua banga paiin ka mun siangthou a ninsak ding ahi kei. Kei tuate hihsiangthoupa Tangtawn Toupa ka hi, chi in, a chi hi.

²⁴ Tuachi-in, Mosi in Aron leh a tapate leh Israelte khempeuh kiang ah tua bangin thu a gen hi.