Siampilaibu 14

Paite Bible

Vun Natna apan Mihing Siansuahna

14 TANGTAWN Toupa’n Mosi a houpih a: ² Chinatna vei mi, siampi’ maia hong kipaipih a, a kisiansuah chianga zat ding dan hiaite ahi. ³ Giahphual pawlam ah siampi a paikhe ding a, tua natna vei mi a vel ding ahi. Tua natna vei mi, kilawh theih vun natna apan a damtaak leh, ⁴ siampi in a kisiansuah nadingin vasa siang, a hing nih, sidar sing them bang zah hiam tawh khausan leh husawp hon tawi dingin thu a pe ding ahi. ⁵ Tua khit chiangin, siampi in lei bel sunga tui thak siang tunga tua vasate khat gawh dingin thu a pe ding ahi. ⁶ Siampi in vasa hing lai pen a la ding a, tua tui siang tunga kigou vasa sisan ah, tua sidar sing them tawh, tua khausan tawh, tua husawp tawh a diah ding ahi. ⁷ Tua-in kilawh theih natna vei mi sagihvei a theh ding a, amah a siang ahi, chi-in a phuang ding ahi. Tua khit chiangin, vasa hing lai pen gampalak ah a khah ding ahi.

⁸ Siansuah ding mi in a puansilhte a sawp ding a, a sam a metmai ding a, tuiin a kisil ding ahi. Tuachi-in, amah a sianga ngaih ahi ding hi. Hiai nungin, giahphual sung ah hong lut thei ding a, ahihhangin, ama’ puanbuk pua ah ni sagih sung a giak ding ahi. ⁹ A ni sagih ni-in, a mul a metmai ding ahi. A lu tunga sam, a khamul, a mitkhu mul leh a mul khempeuh a metmai ding ahi. A puansilhte a sawp ding a, tuiin a kisil ding a, a siang ahita ding hi.

¹⁰ A ni giat ni-in, ama’n belamnoupa nih leh belamnounu khat, kum khata upa, genbaanglou chiat tawh, an thillat ding anvui nel ephah seh sawm suah seh thum, sathau tawh kihel leh sathau log ^[a] khat hon tawi ding ahi. ¹¹ Amah a siang ahi, chi-a phuangpa siampi in siansuah ding mipa leh a thillatte Kihoupihna Puanbuk lutna ah, Tangtawn Toupa’ mai ah a paipih ding ahi.

¹² Tua khit chiangin, siampi in tua belamnoupate laka khat a la ding a, tua sathau log khat tawh, mawhna thillat-in a lan ding ahi. Tuate mah vei thillatin, Tangtawn Toupa’ mai ah a vei ding ahi. ¹³ Ama’n mun siangthou, khelhna thillat leh haltum thillat a kigawhna mun ah, tua belamnou a gou ding ahi. Khelhna thillat bang mahin, mawhna thillat pen siampi’ tan ahi. A siangthou penpen ahi. ¹⁴ Siampi in tua mawhna thillat a sisan bang zah hiam a la ding a, siansuah ding mipa’ taklam bilteep, a taklam khutpi leh a taklam khepite a nuh ding ahi. ¹⁵ Tua khit chiangin, siampi in tua sathau log khat apan sathau bang zah hiam a la ding a, a veilam khutpek sung ah a sung ding a, ¹⁶ a taklam khuttal, tua sathau ah a diah ding a, Tangtawn Toupa’ mai ah sagih vei a theh ding ahi. ¹⁷ Tua khit chiangin, a khut pek sunga sathau om lai apan bang zah hiam, tua siansuah ding mipa’ taklam bilteep, a taklam khutpi, a taklam khepi ah, tua mawhna thillat sisan kitatte tung ah a tat ding ahi. ¹⁸ Siampi in tua khutpek sunga sathau omlai tengin, siansuah ding mipa’ luzang ah a tat ding a, Tangtawn Toupa’ mai ah, ama’ adingin khuhna a bawlsak ding ahi.

¹⁹ Tua khit chiangin, tua khelhna thillat a lan ding a, siansuah ding mipa adingin, sianlouhna khuhna a bawl sak ding ahi. Tua khit chiangin, siampi in haltum thillat a gou ding a, ²⁰ maitam tung ah, an thillat tawh a lan ding a, ama’ adingin khuhna a bawlsak ding a, amah a siang ahita ding hi.

²¹ Ahihhangin, amah pen a zawng a hih a, hiaite a neih zawh kei leh, mawhna thillat dingin belamnoupa khat hon tawi ding a, amah adinga khuhna bawlsak nadinga vei ding ahi. Hiai tawh kitonin, an thillat anvui nel dimdem ephah seh sawm suah seh khat, sathau tawh kihel, sathau log khat leh ²² vakhu nih, ahih kei leh, kawl vakhu nou nih, ama’ neih zawh dan dan, veikhawm ding ahi. Vasa khat pen khelhna thillat ding ahi ding a, a dang khat pen haltum thillat ding ahi ding hi.

²³ A ni giat ni-in, a kisiansuah nadingin, Kihoupihna Puanbuk lutna ah, Tangtawn Toupa’ mai ah, siampi kiang ah hiaite hon tawi ding ahi. ²⁴ Siampi in mawhna thillat belamnou a la ding a, tua sathau log khat tawh, Tangtawn Toupa’ mai ah vei thillatin a vei ding ahi. ²⁵ Ama’n mawhna thillat dingin tua belamnou a gou ding a, a sisan bang zah hiam a la ding a, siansuah ding mipa’ taklam bilteep, a taklam khutpi, leh a taklam khepi ah a tat ding ahi. ²⁶ Siampi in tua sathau bang zah hiam a veilam khutpek sung ah a sung ding a, ²⁷ a taklam khuttalin tua sathau, Tangtawn Toupa’ mai ah sagih vei a theh ding ahi. ²⁸ A khut pek sunga bang zah hiam lain, mawhna thillat sisan a tatna munte, siansuah ding mipa’ taklam bilteep, taklam khutpi leh taklam khepi ah a tat ding ahi. ²⁹ A khutpek sunga sathau om laite, siampi in siansuah ding mipa’ luzang ah a tat ding a, Tangtawn Toupa’ mai ah, amah adingin khuhna a bawlsak ding ahi. ³⁰ Tuachi-in, tua vakhute, ahih kei leh kawl vakhu, tua mipa’ neih zawh dan dan, a lan ding ahi. ³¹ Vasa khat khelhna thillat ding, a dang khat haltum thillat ding ahi ding, an thillat tawh latkhawm ding ahi. Hibangin, siampi in, siansuah ding mipa adingin, Tangtawn Toupa’ mai ah, khuhna a bawlsak ding ahi, a chi hi.

³² Hiai dante, kilawh theih vun natna vei a, a kisian suah nadinga thillat ngeinate nei zouloute mi khat peuh’ kisiansuahna dan ahi.

Apna apan Inn Siansuahna

³³ Tangtawn Toupa'n Mosi leh Aron a houpih a: ³⁴ Na luah ding ua kon piak ding Kanan gam na lut chiang ua, tua gama inn khat peuh a, a pehlawh thei apna ka koih chiangin, ³⁵ tua inn neipa, siampi kianga va paiin: Ka inn ah apna hileh kilawm khat ka mu hi, chi-in a va hilh ding ahi. ³⁶ Siampi in tua apna a vel main, inn awngsak dingin thu a pe ding ahi. Tua bel, tua inn-a thil khat peuh a siangloua phuan ahih louh nading ahi. Hiai nungin, siampi, tua inn ah a lut ding a, inn a vel ding ahi. ³⁷ Baangte-a apte a vel ding a, a hing zelhzulh pian hiam, a san pian hiama kuak, a baang pawtham sanga thukzaw-a om hi-a a kilat leh, ³⁸ kong vang ah siampi a pawtkhe ding a, ni sagih sung tua inn a khakchip ding ahi. ³⁹ A ni sagih ni-in, tua inn vel dingin tua siampi hong pai kik ding ahi. Tua baangte-a apna in a baan a peh leh, ⁴⁰ a pehlawh suangte lakkhiak a, khaw pawlama a sianglou muna paih dingin thu a pe ding hi. ⁴¹ Tua inn sung lam baangte kiat siang ding leh a kikiatkhete, khaw pawlama a sianglou muna buakkhiak dingin thu a pe ding ahi. ⁴² Tua khit chiangin, suang dangin a kilakkhiakna munte kihuin, leiman thakin inn a kizut thak ding ahi.

⁴³ Suangte a kilakkhiak a, a kikiatsiang a, a kizut thak nung a, tua inn-a apna hong kilat kik leh, ⁴⁴ siampi in va paiin, a va vel ding ahi, tua ap in a ban peh ahih

leh, hihse thei apna ahi. Tua inn a siang lou ahi. ⁴⁵ Tua inn phel ding a, a suangte, a singzawlte leh baangzutnate, phelkhiak vek ding, khaw pawlama a sianglou muna paih ding ahi.

⁴⁶ Tua inn a kikhak chip sunga mi khat peuh a va lut leh, amah nitak lam dong a sianglou ahi ding hi. ⁴⁷ Tua inn sunga va lum hiam, an va ne hiam peuhmah in a puansilhte a sawp ding ahi.

⁴⁸ Ahihhangin, siampi hong pai a, tua inn a vel a, tua inn baangte a kizut nunga apna in a ban peh lou ahih leh, tua apna damta ahih manin, tua inn a siang ahi, chi-in a phuang ding ahi. ⁴⁹ Tua inn siansuah dingin, vasa nih leh sidar singthem bang zah hiam tawh khausan leh husawp a tawi ding ahi. ⁵⁰ Tua vasa khat, leibel sunga tui siang thak tung ah a gou ding ahi. ⁵¹ Tua khit chiangin, sidar sing them, husawp leh khausan leh vasa hing, vasa sipen’ sisan leh tui siang ah a diah ding a, tua inn sagih vei a theh ding ahi. ⁵² Tua vasa sisan, tua tui siang, tua a hing lai vasa, tua sidar sing them, tua husawp leh tua khausanin tua inn a siansuah ding ahi. ⁵³ Tua khit chiangin, tua a hing lai vasa pen, khaw pawlam gam lak ah a khah ding ahi. Hibangin, tua inn adingin khuhna a bawlsak ding a, a siang hong hi ding hi, a chi hi.

Vun Natna tawh kisai Dan Thiltup

⁵⁴ Hiai dante, kilawh theih vun natna khempeuh, chithak, ⁵⁵ puansilh hiam, inn hiama apna leh, ⁵⁶ chi bawk, dulh, ahih kei leh, chikaang chihte tawh kisaia, ⁵⁷ thil khat peuh a siang leh a siang lou theih nading dan ahi.

Hiai, kilawh theih vun natna leh apna tawh kisai dan ahi.