Siampilaibu 13

Paite Bible

Vun Natna tawh kisai Dante

13 TANGTAWN Toupa’n Mosi leh Aron a houpih a: ² Mi khat peuh in a vuna chibawk hiam, a dulh hiam, a kaang tuam hiam, kilawh theih a neih leh, siampi Aron kiang ah hiam, ahih kei leh, siampi nasem a tapate laka khat peuh kianga paipih ding ahi. ³ Siampi in tua mipa’ vuna natna a vel ding a, tua natna muna a mul a kaan a, a natna zong a vun sanga thukzaw hi-a a kilat leh, kilawh theih vun natna ahi. Siampi in a vel khit chiangin, tua mipa a siangloua ngaih ahi, chi-in a phuang ding ahi. ⁴ Tua a vuna mun khat a kaang tuam a hih a, vun sanga thukzaw hi-a a kilat kei a, a mul zong a kaan kei leh, siampi in tua mipa ni sagih sung a khumtuam ding ahi. ⁵ A ni sagih ni-in, siampi in amah a vel kik ding a, a vun natna kilamdang tuan loua, a om a, vuna a ban a peh tuan kei leh, ni sagih dang a khumtuam kik ding ahi. ⁶ A ni sagih ni-in, siampi in amah a vel kik ding a, a natna a kiam a, a vuna a kizalh kei leh, siampi in tua mipa a sianga ngaih ahi, a dulh maimai ahi, chi-in a phuang ding hi. Tua mipa’n a puansilhte a sawp ding a, amah a siang ding hi. ⁷ Ahihhangin, a siang ahi, chi-a phuan dinga siampi’ maia a kilak nunga, tua a dulh pen a vuna a ban peh-a a om leh, siampi’ maia a kilah kik ding ahi. ⁸ Siampi in amah a veel ding a, tua a dulh pen a vuna a ban peh a na hih leh, tua mipa a sianglou ahi, chi-in a phuang ding ahi. Kilawh theih natna khat ahi.

⁹ Mi khat peuh in kilawh theih vun natna a neih leh, siampi’ maia paipih ding ahi. ¹⁰ Siampi in amah a vel ding a, tua vun natna pen a kaanga a bawk a, a mul a kaan a, tua a bawkna dulha a keh leh, ¹¹ vun natna dam thei lou ahi a, siampi in tua mipa a sianglou ahi, chi-in a phuang ding ahi. A sianglou hi khin ahih manin, a khumtuam ding ahi kei hi.

¹² Tua natna pen a vun tenga a kithehzak leh, siampi muh dana tua vun natna neipa a khe apan a luzang donga a vun tenga a om leh, ¹³ siampi in a vel ding a, tua mipa a pumpi-a tua natna in a khuh leh, a siang ahi, chi-in a phuang ding ahi. A pumpi-a a kaang vek ahih manin, a siang ahi. ¹⁴ Ahihhangin, tua banga dulha kehna a satunga hong kilat peuhpeuh chiangin, a sianglou ahi ding hi. ¹⁵ Siampi in tua banga dulha keh a muh chiangin, tua mipa a sianglou ahi, chi-in a phuang ding ahi. Dulha keh pen kilawh theih natna ahih manin a sianglou ahi. ¹⁶ Tua dulha chikeh mel hong lamdang a, hong kaan leh, siampi a naih ding a, ¹⁷ siampi in a vel ding a, tua a meimatna hong kaang ahih leh, tua mipa a siang ahi, chi-in a phuang ding a, a siang ahi ding hi.

¹⁸ Mi khat peuh in a vuna meimatum a vei a, a dam chianga, ¹⁹ tua meimatum omna mun a bol a, a kaang hiam, a sansim hiam hong kilat leh, siampi kianga a kilah teitei ding ahi. ²⁰ Siampi in tua a natna mun a vel ding a, a vun sanga thukzaw hi-a a kilat a, a mul zong a kaan leh, siampi in amah a sianglou ahi, chi-in a phuang ding ahi. Meimatum omna muna kilawh theih vun natna hong om ahi. ²¹ Ahihhangin, siampi in a vel a, a mul kaang lah om lou, tua natna a vun sanga thukzaw lah hilou ahih leh, siampi in ni sagih sung amah a khumtuam ding ahi. ²² Tua natna in a ban a peh leh, siampi in amah a sianglou ahi, chi-in a phuang ding ahi. Kilawh theih natna ahi. ²³ Ahihhangin, tua a natna mun a mel a kikhek kei a, a ban lah a peh kei leh, meimatum pawn ahi lel a, siampi in amah a siang ahi, chi-in a phuang ding hi.

²⁴ Mi khat peuh’ vun mei in a kat a, a katna keh a, san sima kaang sim hiam, a kaang hiam hong kilat leh, ²⁵ siampi in tua a katna mun a vel ding a, a mul hong kaang a, a vun sanga thukzawa pehsuk leh, tua a kaatna muna kilawh theih natna hong piang ahi. Siampi in amah a sianglou ahi, chi-in a phuang ding ahi. Kilawh theih vun natna ahi. ²⁶ Ahihhangin, siampi in a vel a, a mul kaang lah a om kei a, a vun sanga thukzaw lah peh lou ahih a, ahihhanga ama sipa mual ahih leh, siampi in ni sagih sung amah a khumtuam ding ahi. ²⁷ A ni sagih ni-in, siampi in amah a vel ding a, a ban a peh leh, siampi in amah a sianglou ahi, chi-in a phuang ding ahi. Kilawh theih vun natna ahi. ²⁸ Tua a natna mun a mel kikheng tuan lou, a ban lah peh lou a, a ma sipa mual ahih leh, siampi in amah a siang ahi, chi-in a phuang ding ahi. A kaatna pawn lel ahi ahi.

²⁹ Pasal hiam, numei hiam khat peuh in a lutang ah hiam, a khabe ah hiam meima a vei leh, ³⁰ siampi in tua meima a vel ding a, a vun sanga thukzaw hi-a a kilat a, tua-a a mul hiam, a sam hiam zong eng a, a ngaat leh, siampi in amah a sianglou ahi, chi-in a phuang ding ahi. Vunthak, kilawh theih natna a lutang hiam, a khabe hiama om ahi. ³¹ Ahihhangin, siampi in hibang meima a vel khit nunga, a vun sanga thukzaw hi-a a kilat kei a, tua muna mul vom a om kei leh, siampi in ni sagih sung tua bang vunthak meima vei pen a khumtuam ding ahi. ³² A ni sagih ni-in, siampi in tua meima a vel ding a, tua chithak in a ban a peh kei a, a mul eng a om kei a, a vun sanga thukzaw hi-a a kilat kei leh, ³³ a meimatna mun chih louh peuh mul hiam, sam hiam metmai ding a, ni sagih dang amah a khumtuam lai ding ahi. ³⁴ A ni sagih niin siampi in tua vunthak a vel kik ding a, a ban peh lou a, a vun sanga thukzaw hi—a a kilat kei leh, siampi in amah a siang ahi, chi-in a phuang ding ahi. Ama’n a puansilhte a sawp ding a, amah a siang ding. ³⁵ Ahihhangin, amah a siang ahi, chi-a a kiphuan nunga, tua vunthak in a ban a peh leh, ³⁶ siampi in amah a vel ding a, tua chithak in a ban peh ahih leh, siampi in mul eng a om hiam, chi-a a zon a kul kei. Tua mipa a sianglou ahi. ³⁷ Ahihhangin, siampi et dana a mel kikhekna a om kei a, a muna mul vom a pou tak leh, tua vunthak damta ahi. Amah a siang ahi a, siampi in amah a siang ahi, chi-in a phuang ding ahi.

³⁸ Pasal hiam, numei hiam khat peuh in a vuna a kaan tuamna a neih leh, ³⁹ siampi in tuate a vel ding ahi. Tua a kaannate a mual pian ahih leh, a vun a dulh maimai a lauhuai lou ahi. Tua bang mi a siang ahi.

⁴⁰ Mi khat peuh sam a pulh a, a lu a giau leh, amah a siang ahi. ⁴¹ A sam a pulh a, a mailam a giau a, talkolha a om leh, amah a siang ahi. ⁴² Ahihhangin, tua a lu giauna hiam, a tal kolhna hiama sansim ngousim meima a om leh, a lutang hiam, a tal hiam apan kilawh theih natna om ahi. ⁴³ Siampi in amah a vel ding a, tua a lutang hiam, taltang hiama a dulha meimatna a bawk a, kilawh theih natna banga sansim ngousim a om leh, ⁴⁴ tua natna veipa a sianglou ahi. A lutanga meima hangin amah a sianglou ahi, chi-in siampi in a phuang ding ahi.

⁴⁵ Tua banga kilawh theih natna vei mi in, puan sesa a silh ding a, sam gumsakin, a mai nuailam puan khuhin: Siang lou! Siang lou! chi-in a kikou ding ahi. ⁴⁶ Kilawh theih natna a vei sung teng, amah a sianglou ahi. Amah kia—in a tolten ding a, giahphual pawlam ah a teeng ding ahi.

Apna tawh kisai Dante

⁴⁷ Apna ^[a] in puansilh khat peuh a neksiat leh samul puan hi-in, ziza puan hita leh, ⁴⁸ gatthawh hi-in phanthawh ziza hiam, samul hiam hita leh, ahih kei leh, savun hiam, savuna kibawl van khat peuh, ⁴⁹ tua puansilh hiam, savun van hiam, gat thawh himhim hiam hita leh, a kineksiatna hing zelhzulh pian hiam, san sim pianin om ta leh, a ban peh thei apna ahih leh, siampi kianga etsak teitei ding ahi. ⁵⁰ Siampi in tua apna a vel ding a, ni sagih sung tua puansilh a tuam koih ding ahi. ⁵¹ A ni sagih ni-in, siampi in a vel kik ding a, tua apna in a ban a peh leh, tua gat thawh ahih keileh phanthawh puansilh, ahih kei leh savun puansilh a kizatna bang teng hita leh zong, nesia thei apna ahi a, tua puan a sianglou ahi. ⁵² Tua apna, thil nesia thei apna ahih manin, tua apna in a lawh puansilh, gat thawh hi-in, phanthawh hita leh, ziza khau hiam, samul khau hiam, savun van hiam a haltum ding ahi. Tua vanzat haltum ngeingei ding ahi.

⁵³ Ahihhangin, siampi in tua puansilh a vel chiangin, a apna in tua gat thawh ahih kei leh phanthawh puansilh hi-in, savuna bawl van hita leh, a ban a peh kei leh, ⁵⁴ tua ap thil pen sawp dingin thu a pe ding ahi. Tua khit chiangin, ni sagih dang a tuam koih lai ding ahi. ⁵⁵ Tua a ap puan a kisawp khit chiangin, siampi in a vel ding a, tua apna mel a kikhen tuan kei leh, a ban peh kei mah leh, a sianglou ahi. Tua apna in pang khat peuhpeuh peh ahih nak leh, meiin haltum un. ⁵⁶ Siampi in a vel chiangin, apna in a nek pen a kisawp nunga na mualta ahih leh, tua puansilh gat thawh hiam, phanthawh ziza puan hiam, samul puan hiam, savun hiam hita leh, a apna teng a atkhia ding ahi. ⁵⁷ Ahihhangin, puansilh ah hiam, gat thawh ahih kei leh phanthawh puan hiam, savun puan hita leh, apna hong kilat kik leh, a ban peh ahi a, tua banga ap puan peuhmah meia haltum ding ahi. ⁵⁸ A kisawpsa tua puansilh, gat thawh hi-in phanthawh, ahih kei leh savuna kibawl van khat peuh, a apna beisa zong sawp kik teitei ding ahi. Tua khit chiangin, a siang ahi ding hi, chi-in gen in, a chi hi.

⁵⁹ Hiai dante, samul puan hi-in, ziza khau zangngat puan hita leh, gat thawh hi-in phanthawh hita leh, ahih kei leh, savuna kibawl van khat peuh, apna in a nitsakte, a siang hiam, a siang lou hiama phuan ding dan tawh kisai ahi.