Phatnalate 62

Paite Bible

Pathian Ngakna

Lapulian ading. Jeduthun ading. David’ Phatnala.

62 KA hinna in Pathian kia ah

khawlna mu a,

amah apan ka hotdamna

hong tung hi.

² Amah kia ka Suangpi leh

ka hotdamna ahi.

Amah ka Kulhpi hi a, hihliina

om ngei lou ding hing.

³ Bangtan ahia mi khat

na dou ding uh?

Hiai baang awn leh gawl

puk dekdek bang lel,

na vek ua phukpai ding maw?

⁴ A dinmun sang apan paikhesuk

ding lel a,

thu kikuma zuauthu gen

nuamsa uhi.

Kama vualzawl uh a, sunggil

lama bel hamsiat uhi. Sela

⁵ Ka hinna aw, Pathian kia ah

khawl tawldamna mu in.

Ahang bel, ka lametna

amah akipan hiven.

⁶ Amah kia ka Suangpi leh

ka hotdamna hi ahi.

Amah ka Kulhpi hi a, hihliina

om lou ding hi’ng.

⁷ Ka hotdamna leh ka minletna

Pathiana kinga ahi.

Amah ka Suangpi kip hi a,

ka bukna hi ahi.

⁸ Mite aw, hun khempeuh-in

amah muang unla,

ama’ mai ah na lungtangte uh

sungbua un.

Pathian, eite adinga

bukna hi ahi. Sela

⁹ Dinmun niam mite lah tuihu bang

lel hi taktak uh a,

dinmun sang mite lah

zuau leltak hi uhi.

Buuknain kibuk leh, a vekpi ua

zong tuihu sanga

zaangzaw ding uhi.

¹⁰ Nuaisiaha mi’ neihsa laksak

muang ken,

guksa vante zong kisaktheihpih

ken, a mawkna hi uhi.

Na hauhna a pun hangin tuate

ah na lungtang nga ken.

¹¹ Pathian in khatvei thu gen a,

hiai nih vei za hi’ng:

Vangletna Pathian-a hi ahi,

chih.

¹² Toupa aw, itna muanhuai zong

nanga hi ahi.

Michih a nasep bangbang ua

dinkik taktak ding na hi.