Phatnalate 6

Paite Bible

Zahngaihna Ngena Thumna

Lapulian ading. Kaihging Guineia Sak. Sheminith ^[a] banga sak. David’ Phatnala.

6 TANGTAWN Toupa aw, heh-in

hon tai ken.

Thangpaiin hon thunun sam ken.

² Tangtawn Toupa aw, ka tung ah

zahngai in.

Kei zaw zawngkhalpi hi ing.

Tangtawn Toupa aw, hon

damsak in,

ka guhte na vek hi.

³ Ka hinna zong nakpitaka

lungkham hi.

Ahihhangin, Tangtawn Toupa aw,

bangtan hi ding ahia,

bangtan hi ding ahia?

⁴ Tangtawn Toupa aw,

hong kiik inla,

hon hukhia in.

Na itna zahngaihna hangin

hon hondam in.

⁵ Sisa-a nang theih gige chih

om lou hiven.

Hankhuka kua’n nang phatna

la sa ding ahia?

⁶ Ka thuum ka mauna-a tawlta hi’ng.

Zankhua-a ka lupna kawtsak ing a,

khituia ka lupna kawtsak hi’ng.

⁷ Dahna hanga ka mit seta a,

ka galte khempeuh hanga

ka mit mialta hi.

⁸ Thulimlouhna nasem noute

khempeuh aw, hon taisan un.

Tangtawn Toupa’n ka kah aw

zata hi.

⁹ Tangtawn Toupa’n ka ngetna zata a,

Tangtawn Toupa’n ka thumna

sang ding hi.

¹⁰ Hon doute khempeuh zahlak

uh henla,

nakpitakin buaigawp uhen.

Kilehhei uh henla,

thakhatin zahlak uhen.