Nehemia 6

Paite Bible

Kilempihna zanga Dal Tupna

6 TUA hunin, kongpite ah kongkhakte bulh nai kei mah leng, kulhbaang lam ka zouta a, awngvang a om nawn kei, chih thu Sanbalat, Tobia, Arab mi Geshem leh ka melma dang khempeuhte uh kiang a tun takin, ² Sanbalat leh Geshem in thu hon khak uh a: Hong pai inla, Ono phaizanga khua khat ah kimu ni, a chi uhi.

Ahihhangin, kei hon suksiat sawm ahi uh a, ³ amaute kiang ah mi ka sawla: Na thupitak sem ka hi a, kong paisuk thei kei. Hiai nna nusia-a noute kianga kong paisuk kala banghanga nasep khawl ding ahia? chi-in thu ka pawsak hi. ⁴ Livei tak thu kibang hon khak uh a, hon khak teng-un dawnna kibang ka pia hi.

⁵ Tua khitin, a ngaveina dingin, Sanbalat in ama’ silapa, thu kibang mah pua-in ka kiang ah hon sawl a, a khut ah laikhak honsa hon tawi hi. ⁶ Tua laikhak ah:

Namte lak ah thu a thang a, Geshem in a dik ahi, a chi hi. Tua bel, nang leh Judate’n hel na sawm man ua kulhbaang lamlam na hi uh. Tuachi-a amaute’ kumpipa-a na pan theih nading ahi. ⁷ Judah gam ah kumpipa khat a om, chi-a Jerusalema nangmah tungtang thu phuang ding kamsangte nangawn septa na hi. Tua bang ahih manin, hong pai inla, thu kikum ve ni,

chi-in a kigelh hi.

⁸ Ke’n hiai dawnna ka khak a: Na gen bang thu bangmah om lou ahi. Na lungsunga na phuahtawm thu hi lel ahi, ka chi hi.

⁹ Ahang bel, amaute khempeuh in koute hon suklau sawma hibanga hih ahi uh a: Nasem dingin a khutte uh hong zawngkhal ding a, kulhbaang a kilamkhin kei ding, chi-a ngaihtuah ahi uhi.

Ahihhangin, ka thuum a: Pathian aw, tu’n ka khutte hatsak in, ka chi hi.

¹⁰ Ni khat, Delaia’ tapa Shemaia’ inn ah ka vahawh hi. Delaia bel Mehetabel’ tapa ahi. Shemaia bel kong kikhakkhum in a om a: Pathian’ inn ah, tempul sung ah kimu ni. Ahang bel, nang that ding mi hong kuan ding ahi uh. Nang that dinga zana hong kuan ding uh ahih manin tempul kongkhakte kikhakkhum ni, a chi hi.

¹¹ Ahihhangin, ke’n: Kei bang mi, lauin a taai dia hia? Ka hinna humbit dinga tempul sunga bu ding kua ka hia? Kong pai peuhmah kei ding! ka chi hi. ¹² Ngai dih uh, amah Pathian sawl hi louin, Tobia leh Sanbalat in a guai ua, ka siat nadinga thu genkhol ahi zaw, chih ka phawk hi. ¹³ Hon lausak a, hiai thil hiha ka khelh theih nading leh hon hihminsiat ua, hon simmawh theih nading ua goiha om a na hi hi.

¹⁴ Tuachi-in ka thuum a: Ka Pathian aw, a thil hih manun Tobia leh Sanbalat thei gige in. Kei hon lausak sawm kamsangnu Noadia leh kamsang dangte zong thei gige in, ka chi hi.

Kulhbaang Lamkhitna

¹⁵ Tuachi-in, Elul ^[a] kha, ni 25 ni-in, kulhbaang a kilamkhin siang hi. Tua bel, ni 52 sunga kizou ahi. ¹⁶ Ka melmate un hiai thu a zak takun leh hiai nna ka zouta uh, chih ka kim ka kiang ua namte khempeuh in a muh takun, ka Pathian uh thilhih ahi, chih a thei uh a, amau’ kimuanna a mansuahta uhi.

¹⁷ Tua lou zong, tua hun laia Judah gama dinmun liante’n Tobia kianga laikhakte na-khak khak uh ahi a, Tobia apan dawnnate amau kiang tungtung mai ahi. ¹⁸ Ahang bel, Tobia lah Ara’ tupa Shekania adingin makpapa ahi a, tua baan ah, Tobia’ tapa Jehohanan in Meshulam’ tanu a na kitenpih a, Meshulam lah Berekia’ tapa ahi a, Judah gama mi tampite Tobia’ maia kichiamna—a kihenkhin a na hi uhi. ¹⁹ Tua tham louin, amaute’n Tobia’ nasep hoihte ka kiang ah a gengen uh a, kei’ thugen zong amah a na hilh zel dan uh ahi. Tua bang maha Tobia in kei hon lausak dinga laikhakte hon khakkhak na hi ahi.