Mathai 11

Paite Bible

Jesu leh Baptispa Johan^(A)

11 JESU’N a nungzui sawm¬lenihte a thuhilh khitin, a khawpite ua sinsak ding leh thugen dingin tua mun a nusia hi.

² Johan in Khrist’ nasepte suangkul apan a na zak takin, a nungzuite nih a sawl a, ³ amah kiang ah: Hong pai dingpa na hi hia, ahih kei leh, mi dang na ngak lai ding

ka hi uhia? a chisak hi.

⁴ Jesu’n a dawng a: Pai unla, na zakte uleh na muhte uh Johan hilh unla: ⁵ Mittawte’n khua mutheita, khebaite paitheita, phaakte siansak hita, nangongte’n zatheita, misite kaihthawh hita, gentheite’n tang¬thupha zata. ⁶ Keima hanga kipal lou mi, mi nunnuam ahi, chi-in vagen un, a chi hi.

⁷ Johan’ nungzuite a paikhiak takun, Jesu’n mipite kiang ah Johan tungthu a gen a: Bang mu nuama gamdai-gamkeua vapai na hi ua leh? Pumpeng huihmut liing en ding in maw? ⁸ Ahih kei leh, bang mahmah mu nuama vapai na hi ua? Puan hoih silh mi maw? Puan hoih silh mite zaw kumpi’ innsung khawnga om eive. ⁹ Bang mahmah mu nuama vapai na hi ua? Kamsang mi maw? Ahi tawk vele! Noute kon hilh ahi: Amah zaw kamsang mi sanga thupizaw ahi ve. ¹⁰ Hiai mi ahi a tungthu hibanga kigelhpa:

Ngai in, na maia ka thangkou

sawl ding ing a,

ama’n na maia na lampi

bawlkhol ding hi,

chi-a kigelh ahi.

¹¹ Noute thutak kon hilh ahi: Numei apan piang lak ah Baptispa Johan sanga thupi zaw mi a piang ngei nai kei. Ahihhangin, vantung kumpigama neupen nangawn amah sangin a thupi zaw hi. ¹² Baptispa Johan’ dam lai apan tuni dongin, vantung kumpigam in hiamgamna a thuak a, hiamgamte’n thagumin a la uhi. ¹³ Ahang bel, Johan hong kilat dongin, kamsangte leh Dan in na genkhol khinta hiven. ¹⁴ Tua na saan nop uleh amah ahi hong pai ding Elija. ¹⁵ Zak nading bil nei peuh in zata hen!

Mite’ Thudonlouhna^(B)

¹⁶ Tulai khanga mite bang tawh hon teh ding ka hia? Sumsinna muna tu a, a lawmte uh sam a:

¹⁷ Tamngai hon tumsak ung a,

lam lou uchin a,

dahla hon saksak ung a,

lah kap tuanlou uchin a,

a chi naupangte bang na hi uhi.

¹⁸ Ahang bel, Johan hong pai a, ne lah nelou, dawn lah dawn louin a om a, amaute’n: Dawizawl eive, a chi uhi. ¹⁹ Mihing Tapa kong pai a, ka ne a, ka dawn a, amaute’n: En un, anhaipa, zuhaipa siahdongte leh mikhialte’ lawmpa! hon chi zel uhi. Ahihhangin, pilna zaw a thilhihte khempeuh in dik a tangsak hi, a chi hi.

Lunghei Nuamlou Khawpite Tunggikna^(C)

²⁰ Tua khitin, Jesu’n thillam¬dangte a hih tamna pen khawpite kisika a lunghei noplouh manun a taai a: ²¹ Korazin, na tung a gik hi! Bethsaida, na tung a gik hi! Ahang bel, noute sunga thillamdang ka hihte, Tura leh Sidon sunga kihih hi leh, sawtpi-in saiip puan silh a, vutkhu-in lungheita ding uhi. ²² Ahihhangin, noute kon hilh ahi: Thukhen ni chiangin, noute’ thuak sangin, Tura leh Sidon thuak a phadawm zaw ding hi. ²³ Nang Kapernaum, Pathian in van sunin hon tawisang a, khukthuk ^[a] donga hon laikhesuk ding ahi aw! Ahang bel, na sunga ka hih thillamdangte Sodoma kihih hi leh, tuni donga om nalai ding hi. ²⁴ Ahihhangin, kon hilh ahi. Thukhen ni chiangin, nang thuak sangin, Sodom thuak a phadawm zaw ding, a chi hi.

Tawlngakna Khawlna^(D)

²⁵ Tua hun lai mahin, Jesu’n: Lei leh vaan Toupa, ka Pa aw, nang a pilte leh a lemtheite apan hiai thilte na sel a, naungekte kianga na lakkhiak manin kon pahtawi hi. ²⁶ Ahi, Pa aw, hibanga hih mah na kipahlam ahi, a chi hi.

²⁷ Tua khitin, ama’n mipite kiang ah: Ka Pa’n ka khut ah thil bangkim hon pekhia a, Pa loungal kuama’n Tapa hon thei kei. Pa zong, Tapa loungal leh amah ka latsak nopna mi loungal kuama’n a thei kei.

²⁸ Semgim leh puakgik pua noute khempeuh ka kiang ah hong pai un, keima’n tawlngak khawlna kon pe ding. ²⁹ Ka hakkol kisuan unla, kei apan kisin un. Kei a lungnem leh lungtanga a kiniamkhiat ka hi a, a hinna ua dingin tawlngak khawlna na ngah ding uhi. ³⁰ Kei’ hakkol puaknop a, ka puak zong zaang ahi, a chi hi.