Kisimna 6

Paite Bible

Nazir Suaka Kisehtuamna

6 TANGTAWN Toupa’n Mosi kiangah thu a gen a: ² Israelte kiang ah thu gen inla: Pasal hiam numei hiam in thuchiam poimawh, Tangtawn Toupa adinga nasem mi suak dinga kisehtuamna thuchiam bawla Nazirmi a suah nop leh, ³ zu hi-in, silngou sawh dawn thil hiam hita leh, tuate apan a kihemkhe ding a, greptui thuk zong a dawn ding ahi kei hi. Greptui a dawn ding ahi kei a, grep gah leh grepgah keu zong a ne ding ahi kei hi. ⁴ Nazirmi a hih lai teng grepgui apan thil himhim, a tang leh a hawng zong, a ne ding ahi kei hi.

⁵ Tua banga kisehtuamna thuchiam a om sung teng, a lu ah mulmet tem himhim zat louh ding ahi. Tangtawn Toupa adinga sehtuam a hihna a bei mateng, amah a siang ahi ding a, a lu-a sam a hawisau ding ahi. ⁶ Tangtawn Toupa adinga a kisehtuam sung teng siluang naihin a pai ding ahi kei. ⁷ Ama’ pa mahmah, a nu mahmah, a sanggampa mahmah, a sanggamnu mahmah zong a sih leh, tuate hanga siangloua ngaih dingin a kikoih ding ahi kei hi. Pathian adinga sehtuam a hihna chiamtehna a lutunga om ahi. ⁸ A kisehtuam sung khempeuh, Tangtawn Toupa adinga sehtuam siangthou ahi.

⁹ Ama’ omna muna mi khatpeuh a sih guih a, tua in, a latsa a sam a hihbuah leh, a kisiansuah ni, a ni sagih ni-in a metkhiak ding ahi. ¹⁰ A ni giat ni-in Kihoupihna Puanbuk lutna ah, siampi kiang ah vakhu nih, ahih kei leh, kawl vakhu nih a hon tawi ding ahi. ¹¹ Siampi in khelhna thillat dingin khat a laan ding a, haltum thillat dingin khat pen a laan ding hi. Misi luang omna-a om a hih mana khial ahih manin, tua bangin ama’ adingin khuhna a bawlsak ding ahi. Tua ni mahin, a lutang sehtuam siangthouin a bawl ding ahi. ¹² Amah a kisehtuam sung teng adingin Tangtawn Toupa’ mai ah a kilaan ding ahi. Tua dingin, mawhna thillat dingin belamnoupa kum khata upa hon kai ding ahi. Amah a kisehtuam sunga kihihbuah ahih manin, a malam nite a kisim kei ding hi.

¹³ Nazirmi adingin, a kisehtuam hun a bei chianga zat ding hiai daan ahi. Amah Kihoupihna Puanbuk lutna-a tonpih ding ahi. ¹⁴ Ama’n Tangtawn Toupa’ mai ah haltum thillat ding belamnoupa kum khata upa khat, khelhna thillat ding belamnounu kum khata upa genbaanglou khat, lemna thillat ding belamtal khat, thillatin a pe ding ahi. ¹⁵ Tuate tawh kitonin an thillatte, dawn thillatte leh silngou sawhlouh tanghou lawhbeu khat, tua bel, anvui nel, sathau tawh kihel tanghou peite leh tanghou pei neu, sathaua zut tawh a laankhawm ding ahi.

¹⁶ Siampi in hiaite Tangtawn Toupa’ mai ah a laan ding a, khelhna thillat leh haltum thlllat a bawl ding ahi. ¹⁷ An thillat tawh kitonin Tangtawn Toupa’ mai ah silngou sawh louh tanghou lawhbeu a lui ding a, tua belamtal lemna thillatin a laan ding ahi.

¹⁸ Tua khit chiangin, Kihoupihna Puanbuk lutna ah tua Nazirmi in a latsa a sam a metkhe ding ahi. Tua sam a la dinga lemna thillat nuaia mei ah a khul ding ahi.

¹⁹ Tua Nazirmi in a kilatna sam a met khit chiangin, siampi in tua belamtal liang kihuan tawh, lawhbeu sunga tanghou pei leh a pei neu silngou sawhlouh tuak tawh, tua mipa khut ah a pe ding ahi. ²⁰ Siampi in Tangtawn Toupa’ mai ah vei thillatin tuate a vei ding ahi. Hiaite a siangthou ahi a, a kiveisa a awm tawh, a kilaansa a phei tawh siampi’ tan ahi. Tua khit chiangin, tua Nazirmi in zu a dawn theita ding hi.

²¹ Nazirmi in a piak theih khatpeuh bana a kisehtuamna banga Tangtawn Toupa’ maia thillat ding chiampa Nazirmi tawh kisai dan hiai ahi. Ama’n a chiamsa thil pen, Nazirmi a kisehtuamna dan bangbanga a tangtun teitei ding ahi, chi in, a chi hi.

Siampi’ Vualzawlna

²² Tangtawn Toupa’n Mosi kiang ah: ²³ Aron leh a tapate kiang ah thu gen inla: Israelte na vualzawl dingdan uh hibang ahi: Amaute kiang ah:

²⁴ Tangtawn Toupa’n noute

hon vualzawl henla,

hon ching hen.

²⁵ Tangtawn Toupa’n noute tung ah

a mai taangsak henla,

na tung uah hehpih siam

hen.

²⁶ Tangtawn Toupa noute’ lam

hong nga henla,

lungmuanna hon pia hen,

chi-in hilh in.

²⁷ Tuachi-in, Ka min Israelte tung ah a koih ding uh a, ke’n amaute ka vualzawl ding hi, a chi hi.