Kisimna 3

Paite Bible

Levite’ Mawhpuakna

3 TANGTAWN Toupa’n Sinai Muala Mosi a houpih laia, Aron leh Mosi innkuan tangthu hiai ahi:

² Aron’ tapate hiaite ahi: Nadab a piang masapen ahi a, tua baan ah Abihu, Eleazar leh Ithamar ahi. ³ Aron’ tapate’ min tuate ahi. Amaute thaunilh siampite ahi uh a, siampi nasem dinga namkip ahi uhi. ⁴ Nadab leh Abihu bel Gamdai-gamkeua, Tangtawn Toupa’ maia, phallouh meia thillat a lat laiun Tangtawn Toupa’ mai ah a si uhi. Tapate a neih louh manun, a pa uh Aron dam sung teng Eleazar leh Ithamar kiain siampi nna a sem uhi.

⁵ Tangtawn Toupa’n Mosi kiang ah: ⁶ Levi nam hon tonpih inla, siampi’ Aron huh dingin a mai ah pia in. ⁷ Aron ading leh Israel mi khempeuh adingin Kihoupihna Puanbuk ah, biakbuk nna a sem ding uh ahi. ⁸ Tua banga biakbuk nna semin, Israelte hih ding khempeuh hihin Kihoupihna Puanbuk vanzat khempeuh a keem ding uh ahi. ⁹ Aron leh a tapate mai ah Levite pia in. Amaute zaw ama’ maia pumpiak ding Israelte ahi uhi. ¹⁰ Siampi nasem dingin Aron leh a tapate sep in. Midang himhim in mun siangthou a naih leh tuabang mi thah teitei ding ahi, a chi hi.

Kisimna

¹¹ Tangtawn Toupa’n Mosi a houpih lai a: ¹² Israel numei apan pasal piang masapen sik leh tangin, Israelte lak apan Levite ka lata hi. Levite keia ahi uh. ¹³ Tapa piang masapen khempeuh keia hiven. Aigupta gama tapa piang masapente ka satlup laiin Israelte laka tapa piang masapen peuhmah mihing hi-in ganta hita leh, kei adingin ka septuam hi. Amaute keia ahi ding uh ahi. Kei Tangtawn Toupa ka hi, a chi hi.

¹⁴ Tangtawn Toupa’n Sinai Gamdai-gamkeu ah Mosi a houpih a: ¹⁵ Levite a innkuan kuanun a beh behin sim in. Pasal peuhmah kha khat leh a tunglama upa sim in, a chi hi. ¹⁶ Tuachi-in, Mosi in Tangtawn Toupa’ thupiak bangin, amaute a sim hi.

¹⁷ Levi’ tapate min hiaite ahi:

Gershon, Kohath leh Merari.

¹⁸ Gershon behte minte hiaite ahi:

Libni leh Shimei.

¹⁹ Kohath behte minte hiaite ahi:

Amram, Izhar, Hebron leh

Uziel.

²⁰ Merari behte minte hiaite ahi:

Mali leh Mushi.

Hiaite Levi behte, a innkuan kuana kiminlawh ahi.

Gershon Suante Simna

²¹ Libni behte leh Shimei behte bel Gershon suante ahi uh a, Gershon behte kichi ahi uhi. ²² Gershon behte laka pasal kha khat leh a tunglama upa khempeuh 7,500 a pha hi. ²³ Gershon behte’n tumlam ah biakbuk nung ah giahphual a nei ding uh ahi. ²⁴ Gershon behte laka makai Lael’ tapa Eliasaf ahi. ²⁵ Kihoupihna Puanbuk ah, Gershonte’ mawhpuakna bel, biakbuk, tua baan ah, puanbuk leh a tungkhuhnate, Kihoupihna Puanbuk lutna-a puanzak, ²⁶ kongtual umna puanzakte, biakbuk kimkot kongtual lutna puanzak leh maitam leh a khauhualte leh a zatna tawh kisai khempeuh kep ahi.

²⁷ Amram behte, Izhar behte, Hebron behte leh Uziel behte bel Kohath suante ahi uh a, Kohath behte kichi ahi uhi. ²⁸ Kohath behte, pasal kha khat leh a tunglama upa khempeuh 8,600 a pha hi. Kohathte’ mawhpuak bel, mun siangthou kep ahi. ²⁹ Kohath behte giahphual biakbuk simlam pang ah a om ding ahi. ³⁰ Kohath behte laka makai bel Uziel’ tapa Elizafan ahi. ³¹ Amaute’ mawhpuak bel thukhun singkuang, meivak mung, maitamte, mun siangthou, tua-a nasepna tawh kisai vanzatte, puanzak leh tuate zatna tawh kisai khempeuh kep ahi. ³² Levite laka makaipipen bel siampi Aron’ tapa Eleazar ahi. Mun Siangthou kema mawhpawte tunga makaia seh ahi.

Merari Suante Simna

³³ Merari suante laka behte Malite leh Mushite ahi a, Merari behte kichi ahi uhi. ³⁴ Pasal kha khat leh a tung lama upa khempeuh 6,200 a pha hi. ³⁵ Merari behte laka makai bel, Abihail’ tapa Zuriel ahi. ³⁶ Merari behte bel, biakbuk guhgelte, a zawlte, a khuamte, khuamtunnate, a vanzatte leh hiaite zatna tawh kisai thilte, ³⁷ a huang umna khuamte leh a tunnate, puanbuk khetphimte leh a khauhualte kepna mawhpaw dinga seh ahi uhi.

Kisimna Lakkhawm

³⁸ Mosi leh Aron leh a tapate’n bel, Kihoupihna Puanbuk maia biakbuk suah lampang nisuahna lam ah giahphual a nei ding uh ahi. Israel sik leh tangin, munsiangthou kepna amaute’ mawhpuak ahi. Midang, mun siangthou vanaih peuhmah thah ding ahi.

³⁹ Mosi leh Aron tungtawna Tangtawn Toupa’ thupiak banga a behbeh-a kisim pasal kha khat leh a tunglama upa 22,000 a pha hi.

Tamasate taanga Levite Lakna

⁴⁰ Tangtawn Toupa’n Mosi kiang ah: Israelte’ tamasa pasal kha khat leh a tunglama upa khempeuh sim inla, a min minun khum in. ⁴¹ Kei adingin Israel suan’ tamasa khempeuh taangin Levite la inla, Israel suante’ ganta piang masate taangin Levite’ gantate la in, Kei Tangtawn Toupa ka hi, a chi hi.

⁴² Tuachi-in, Tangtawn Toupa’n amah thu a piak bangin, Mosi in Israel suan tamasapente khempeuh a sim a, ⁴³ tamasa pasal kha khat leh a tunglama upa khempeuh, a min mina kikhum 22,273 a pha hi.

⁴⁴ Tangtawn Toupa’n Mosi kiang ah: ⁴⁵ Israel suan tamasa khempeuh taangin Levite la inla, Israel suante’ gantate taangin Levite’ gantate la in. Levite keia ahi. Kei Tangtawn Toupa ka hi. ⁴⁶ Levite sanga Israel suan tamasate tamzawkna 273 tat nadingin, ⁴⁷ mi khat zel ah mun siangthou shekel buk shekel nga la in. Shekel khat bel gera ^[a] 20 buk ahi. ⁴⁸ Israel suan tamasa tamzawkna tatna sum pen Aron leh a tapate khut ah pia in, a chi hi.

⁴⁹ Tuachi-in, Levite’ tat zah valte tatna sum Mosi in a la hi. ⁵⁰ Israel suante’ tamasa tatna a lak ngun shekel 1,365 buk a hi a, tua bel mun siangthou shekel buk zah ahi. ⁵¹ Tangtawn Toupa’n thu a piak bangin, Mosi in tua tatna sum, Aron leh a tapate’ khut ah a pia hi.