Kisimna 24

Paite Bible

24 ISRAEL vualzawl ding Tangtawn Toupa’ lungkimna ahi, chih Balaam in a muh takin, hun dang bangin, bumna zat a sawm kei a, gamdai-gamkeu lam a nga zawta hi. ² Balaam a dakkhia a, Israelte a nam a nama giahphual sat a muh takin, ama’ tung ah Pathian Kha hong tung a, ³ a thupuak a genkhia a:

Beor’ tapa Balaam’ thugen,

a mita teltaka mupa’ thugen,

⁴ Pathian’ thute zapa,

Vanglianpen mupa,

khupbawhpa leh a mitvakpa’

thugen:

⁵ Jakob aw, na puanbukte,

Israel aw, na tenna munte,

kilawm na mah e!

⁶ Phaizang bangin kiphalh uh a,

lui geia huante bang hi uhi.

Tangtawn Toupa’ suansa tawsaw

singte bang,

tuite geia sidar singte bang

hi uhi.

⁷ Amaute’ baltin apan tuite

luangkhe ding a,

a khaichite un tui tampi

mu ding uhi.

A kumpipa uh Agag sanga

lianzaw ding a,

a kumpipa uh tawisanga

om ding hi.

⁸ Pathian in Aigupta gam

apan amaute piikhia a,

amaute’n gam bawngtalte

hatna nei uhi.

Helhat namte nawmvalh uh a,

a guhte uh hihzan uhi.

A thalte-un amaute

kap pailet uhi.

⁹ Humpinelkai banga bok uh a,

lumsuk uhi.

Humpinelkainu bang

amaute kuan tokthou

ngam ding eita?

Nou hon vualzawlte

vualzawlin om uh henla,

nou hon hamsiatte

hamsiatin om uhen!

a chi hi.

¹⁰ Tua khitin, Balaam tunga Balak hehna a kuang a, a khutte a nuai tuah a, amah kiang ah: Ka melmate hamsiat dingin kon sam a, thumvei tak amaute na vualzawl zawsopta. ¹¹ Tu’n kintakin paikhia inla, inn ah pai in! Thupitakin pahtakman kon pe ding, ka chi a, ahihhangin, Tangtawn Toupa’n pahtakman piaka na om ding hon dal ahi, a chi hi.

¹² Balaam in Balak a dawng a: Thupua non sawlte ka hilh keia hia: ¹³ Balak in a inpi ngun leh khama dimin hon pe mah leh, Tangtawn Toupa’ thupiak ban paiin, bangmah a sia zong, a pha zong ka hih thei kei. Tangtawn Toupa’ gen kia ka gen teitei ding, ka chi keia hia? ¹⁴ Tu’n ka mite lak ah ka kilehta ding. Ahihhangin, hong pai dih, hun hong tung dingtea hiai nam in na mite tunga a hih ding uh hon hilhkhol ning, a chi hi.

Balaam’ Thugen Lina

¹⁵ Ama’n a thugen a genkhia a:

Beor’ tapa Balaam’ thugen,

a mittea teltaka mupa’ thugen,

¹⁶ Pathian’ thute zapa’ thugen,

Tungnungpen apan theihna neipa,

Vanglianpen apan mengmuh

mupa,

khupbawhpa, a mit vaksaka

ompa’ thugen:

¹⁷ Ke’n amah mu hi’ng,

tuin bel hi kei.

Ke’n amah mu hi’ng,

a naiin bel hi kei.

Jakob apan aksi khat

hong suak ding a,

Israel apan kumpi chiang khat

hong dingkhe ding hi.

Ama’n Moab taltangte leh

Seth’ tapate’ luguhte

gawpsak ding hi.

¹⁸ Edom zawhin om ding a,

a melma Seir zawhin

om ding hi.

¹⁹ Jakob apan ukpa khat

hong pawt ding a,

ama’n khawpi-a suaktasunte

hihmangthang ding hi,

a chi hi.

Balaam’ Thugen Nunung

²⁰ Tua khitin, Balaam in Amalek a mu a, a thugen a genkhia a:

Amalek zaw namte laka

masapen hi ahi.

Ahihhanga hong se khongkhong

ding hi,

a chi hi.

²¹ Tua khitin, Kente ^[a] a mu a, a thugen a genkhia a:

Na tenna mun bit a,

na bu suangpi henga

seh hi a,

²² ahihhanga, Ashur in

sala hon mat chianga,

Kente hihmanthata om ding

hi uteh,

a chi hi.

²³ Tua khitin, ama’n a puakgik thu a genkhia a:

Maizen aw! Pathian in

hiai a hih chianga,

kua nungta zou ding?

²⁴ Kitim tuipi gei apan

longte hong pai ding a,

Ashur leh Eber zou ding hi.

Ahihhanga amaute zong

hong segawp ding uhi,

chi hi.

²⁵ Tua khitin, Balaam a dingkhia a, inn ah a kik a, Balak zong a paita hi.