Kisimna 17

Paite Bible

Aron’ Chiangsel

17 TANGTAWN Toupa’n Mosi kiang ah: ² Israelte kiang ah thu gen inla, amaute apan chiang sawmlenih la in, nam khat makai apan chiang khat zel ahi ding ahi. Tuate’ min a chiang tung chiat uah gelh in. ³ Levi’ chiang tung ah Aron’ min gelh in. Nam khat tuulpi adinga chiang khat chiat hi ding ahi. ⁴ Kihoupihna Puanbuk sung ah nang kon kimuhpihna Theihpihna mai ah tua chiangte koih in. ⁵ Ka teelpa’ chiang a sel ding a, Israelte nang dema a phun gigena uh kei apan ka koihmang ding, a chi hi.

⁶ Tuachi-in, Mosi in Israelte kiang ah thu a gen a, a makaite un chiang sawmlenih a pia uhi. Nam khat makai apan chiang khat zel ahi a, tuate lak ah Aron’ chiang zong a om hi. ⁷ Mosi in tua chiangte Theihpihna Puanbuk sung ah Tangtawn Toupa’ mai ah a koih hi.

⁸ A zing chiangin, tua Theihpihna Puanbuk sung ah Mosi a lut a. Levi’ innkuan tanga ding Aron’ chiang a sel kia hilouin a pakmum a, a pakpalh a, almon gahte a suah chih a mu hi. ⁹ Tua khitin, Mosi in Tangtawn Toupa’ omna apan Israelte khempeuh mai ah tua chiangte hon lakhia hi. Amaute’n tua chiangte a en uh a, michih in ama’ chiang a la hi.

¹⁰ Tangtawn Toupa’n Mosi kiang ah: Helhatte adinga chiamtehna hi dingin, Aron chiang, Theihpihna mai ah koih kik in. Hiai in ka tunga amaute’ phunna a beisak ding a, a si kei ding uh, a chi hi. ¹¹ Mosi in Tangtawn Toupa’ thupiak bangbangin a hih hi.

¹² Israelte’n Mosi kiang ah: Koute ka si ding uh! Mangthang ka hita uh, ka vekpi-un mangthang ka hita uh. ¹³ Tangtawn Toupa’ biakbuk naiha hong pai peuhmah nangawn a si ding. Ka vekpi-ua si ding ka hita uh maw? a chi uhi.