Kisimna 13

Paite Bible

Kanan Gam Velna

13 TANGTAWN Toupa’n Mosi a houpih a: ² Israelte ka piak ding Kanan gam va vel ding pawl khat sawl in. Nam khat laka a makaite uh laka khat zel sawl in, a chi hi.

³ Tuachi-in, Tangtawn Toupa’ thupiak bangin Mosi in Paran Gamdai-gamkeu apan amaute a sawlkhia hi. Amaute Israel makaite ngen ahi uhi. ⁴ A minte uh hiaite ahi:

Reuben nam apan Zakur’ tapa Shamua,

⁵ Simeon nam apan Hari’ tapa Shafat,

⁶ Judah nam apan Jefune’ tapa Kaleb,

⁷ Isakhar nam apan Josef’ tapa Igal,

⁸ Efraim nam apan Nun’ tapa Hoshea,

⁹ Benjamin nam apan Rafu’ tapa Palti,

¹⁰ Zebulun nam apan Sodi’ tapa Gadiel,

¹¹ Manase nam apan Susi’ tapa Gadi, Manase bel Josef’ nam khat ahi.

¹² Dan nam apan Gemali’ tapa Amiel,

¹³ Asher nam apan Mikhael’ tapa Sethur,

¹⁴ Naftali nam apan Vofsi’ tapa Nabi,

¹⁵ Gad nam apan Maki’ tapa Geuel.

¹⁶ Gam vel dinga Mosi in a sawlte’ min hiaite ahi. Mosi in Nun’ tapa Hoshea’ min dingin Joshua a phuak hi.

¹⁷ Mosi in Kanan gam vel dinga a sawlkhiak laiin, amaute kiang ah: Negev tawnin paitou unla, tanggam ah lut un. ¹⁸ A gam bang chi bang hi hiam, tua-a tengte mihat hi uhiam, hat lou, tam uhia, tawm uhiam chihte en un. ¹⁹ A tenna uh bangchi bang gam hi hiam, gam hoih hi hiam, hoihlou chihte, a gam khawpite bangchi bang hi hiam, kulhbaang nei hiam, neilou chihte, ²⁰ a leitang bangchi bang hi hiam, lei hoih hi hiam, hoih lou chihte, singkungte a pou hiam, pou lou chihte en un. A gam gah hon paw teitei un, a chi hi. Tua hun bel, grep gah masate min hun ahi.

²¹ Tuachi-in, a kuantou uh a, Zin Gamdai-gamkeu apan Lebo Hamath lampanga Rehob dong a vel uhi. ²² Negev tawnin a paitou uh a, Hebron a tung uhi. Tua ah Anak suante Ahiman, Sheshai leh Talmai a teng uhi. Hebron bel Aigupta gama Zoan a kilam ma kum sagiha kilam ahi. ²³ Amaute Eshkol Phaizang a tun takun grep hiang khat, grep gah bom khat gah a sattan uh a, mi nih in singzawlin a zawng uhi. Mimthei ^[a] leh theipi bangzah hiam tawh a pua uhi. ²⁴ Tua mun bel Israelte’n tua laia grepgah bom a satkhiak manua Eshkol ^[b] Phaizang kiminvawh ahi. ²⁵ Ni 40 a bei takin gam velna apan a chiahkik uhi.

Gam Velna Thutut

²⁶ Amaute, Paran Gamdai-gamkeua Kadesh mun ah Mosi, Aron leh Israel mipite khempeuh kiang hong tungkik uhi. Tua ah, amaute leh mipite kiang ah thu a tun uh a, a gam gah zong a lak uhi. ²⁷ Mosi kiang ah hiai thu a tun uhi: Non sawlna gam ah ka valut uh a, nawitui leh khuaizuin a luang taktak hi! Hiai ah a gam gah a om. ²⁸ Ahihhangin, tua-a teng mite a hat uh a, khawpite kulhbaang nei lianpipi ahi. Anak suante nangawn tua ah ka mu uhi. ²⁹ Negev ah Amalekte a teng uh a, tanggam teng ah Hitte, Jebuste leh Amorte a teng uh a, tuipi gei leh Jordan lui dung teng ah Kanante a teng uhi, a chi uhi.

³⁰ Tua laitakin, Kaleb in Mosi mai ah mipite a khamdai a: Kuantouin a gam i valuah ding uh ahi. Hih zou mahmah ding i hi, a chi hi.

³¹ Ahihhangin, amah tawh kuantoukhawmte’n: Tua mite dou zou talou zen ni ei! Eite sanga hat zaw hi uh, a chi uhi. ³² Tua bangin a vavel uh tua gam thu Israelte lak ah a selamin a thangsak uhi. Amaute’n: Ka vavel uh tua gam zaw a sunga tengte’ nawmvalh gam ahi. Ka vamuh uh mite zong mi lianpipi ahi uh. ³³ Tua ah Nefilimte ka mu uhi. Anak’ suante bel Nefilimte apan hong khangkhia ahi uhi. Koumau’ mitmuhin khaukhup bang lelin ka kimu uh a, amaute’ mitmuh in zong tua bang mah ka hi uhi, a chi uhi.