Kilakna 6

Paite Bible

Belhchipnate

6 TUA khitin, Belamnou in belhchipna sagihte laka khatna a phel lai ka mu hi. Tua lai mahin, thilhing lite laka khat in, vanpi ging banga ngaih awin: Hongpai inla, hong en in! hon chih zong ka za hi. ² Tua banga ka et leh, ngai un, sakol kaang khat ka mu hi. Tua sakol kaang tunga tuangpa’n thalphel khat a tawi a, a kiang ah pahtakna lukhu khat a kipia a, vualzoua zou zel dingin a kuankhia hi.

³ Belamnou in belhchipna nihna a phel takin, thilhing nihna in: Hong pai inla, hong en in! hon chih ka za hi. ⁴ Ka et leh, ngai un, sakol dang khat, meikuang banga san hong pai ka mu hi. Tua sakol tunga tuangpa kiang ah, leitung apan galmuanna

a lakmang nading leh, mite kithahtuahsak nading vangletna leh namsau lianpi khat zong piak ahi.

⁵ Belamnou in belhchipna thumna a phel takin, thilhing thumna in: Hong pai inla, hong en in! hon chih ka za hi. Ka et leh, ngai un, sakol vom khat ka mu a, a tunga tuangpa’n a khut in buukna phala kopkhat a tawi hi. ⁶ Tua khitin, thilhing lite lak apan aw hi leh kilawm ka za a, tua in: Ni khat thaman huitbuh man dingin omer ^[a] kimkhat hisak inla, barlibuh ahih leh omer khat leh alang hisak in. Sathau leh grepzu bel hihse ken, a chi hi.

⁷ Belamnou in belhchipna lina a phel takin, thilhing lina’ aw in: Hong pai inla, hong en in! hon chih ka za hi. ⁸ Ka et leh, ngai un, sakol daang khat ka mu hi. A tunga tuangpa’ min bel Sihna ahi a, Misikhua ^[b] in amah a zui hi. Amah kiang ah leitung mi sehli suah seh khat tunga thuneihna piak ahi. Amah kiang ah namsau leh kial leh, sihna leh leitung gamsate zanga amaute thah ding thu piak ahi.

⁹ Belamnou in belhchipna ngana a phel takin, Pathian’ thu hang leh a theihpihna uh hanga thahna thuakte’ hinna khate, maitam nuaia om ka mu hi. ¹⁰ Amaute’n aw ngaihtaka kikouin: A Siangthoupa leh a Dikpa, Thuneihnakim uun Toupa aw, leitunga teengte tunga ka sisan phuba uh lak ding bangtan hal lai ding na hiam? a chi uhi. ¹¹ Tua khate kiang ah, kumpipuan ngou khat tek piak ahi. Tua baan ah, amaute banga thaha hong om ding, a sila hihpihte uleh, sanggamte uh a kim masiah, na ngak lai tadih dinga hilhin a om uhi.

¹² Belamnou in belhchipna gukna a phel takin, ka et leh, ngai un, zinpi nakpitakin a ling hi. Ni lah samul vom ippi bangin hong vom a, khapi lah sisan bangin hong san hi. ¹³ Vaan aksite, theipi hut huihpi’ mut pulh bangin, leitung ah a

ke duamduam uhi. ¹⁴ Vandum lah laipek zial bangin a kizialkhia a, mualsangte leh tuikulh gamte a omna uapan lakkhiak ahi uhi.

¹⁵ Tua khitin, leitung kumpipate, kumpi tapate ^[c] , sepaih makai liante, a haute, a thahatte, sila leh noplen khempeuh, mual tunga kawkhukte leh suangpi lakte ah a kibu uh a, ¹⁶ mualsangte leh suangpite kiang ah: Koute hon delhkhum unla, kumpitutphah tunga tupa’ maitang leh, Belamnou’ thangpaihna ni thupi apan hon sel un! ¹⁷ Ama’ thangpaihna ni thupi hong tungta, kua mahmah ding zou ding hiam? a chi uhi.