Kilakna 21

Paite Bible

Jerusalem Thak

21 TUA nungin, vaan thak leh lei thak ka mu a, vaan masa leh lei masa a paimangkhinta a, tuipi himhim a om nawnta kei hi. ² Tua khitin, Pathian apan vaana hong paisuk Khawpi Siangthou, Jerusalem thak ka mu hi. Tua khawpi bel, mou, a pasal adinga kilawmtaka kizem banga bawl ahi. ³ Tua khitin, kumpitutphah apan aw ngaihtak ka za a, tua in: Ngai un, tuin Pathian’ tenna mihingte lak ah hong omta. Amah amaute tawh a teengkhawm ding hi. Amaute ama’ mite ahi ding uh a, Pathian mahmah in amaute a ompih ding a, a Pathian uh ahi ding hi. ⁴ Ama’n amaute’ mit apan khitui khempeuh a nulhul ding. Sihna zong, dahna zong, kahna zong, natna zong, a om nawn kei ding. Thilte' paidan lui a beita hi, a chi hi.

⁵ Kumpitutphah tunga tupa’n: Ngai un, thil bangkim a vekpi-in ka bawlthakta! a chi hi. Tua baan ah, ka kiang ah: Gelh in, hiai thute a dik a, a saantaak hi, a chi hi.

⁶ Ama’n ka kiang ah: Sepzawh vek ahita! Kei Alfa leh Omega, a Bul leh a Tawp ka hi. Ke’n a dangtak khempeuh kiang ah hinna tuikhuk apan dawn ding, a manbeiin ka pe ding. ⁷ A vualzoupa’n hiaite khempeuh a luah ding a, ama’ Pathian ka hi ding a, amah ka tapa ahi ding. ⁸ Ahihhangin, dawilokte, umloute, gilou kihhuaite, tualthatte, kingaihna nina bualte, bumhatte, milimbete leh zuautheite khempeuh’ tan bel, kaata kaang meidil ahi ding hi. Hiai ahi sih nihna, a chi hi.

⁹ Tua nungin, hii nanung sagihte-a dim belkuang sagih tawi, tua vansawltak sagihte laka khat a hong pai a, ka kiang ah: Hong pai in! Mou, Belamnou’ zi kon ensak ding, a chi hi. ¹⁰ Tua bangin, ama’n Khain kei hon pua a, mual lianpi leh sangpi tung ah hon tun a, Khawpi Siangthou Jerusalem, Pathian apan vaana hong paisuk hon ensak hi. ¹¹ Tua khawpi in Pathian’ thupina a khu a, a thupina taangpha, suang manpha penpen jaspar suang bangin a taang a, khrustal bangin a siang hi. ¹² Tua khawpi in kulh baang sang thupi a nei a, kongpi sawmlenih a nei a, tua kongpite ah vansawltak sawmlenih a om uhi. Tua kongpite tung ah, Israel suan nam sawmlenihte’ minte a kigelh hi. ¹³ Suahlam ah kongpi thum, mallam ah kongpi thum, simlam ah kongpi thum leh tumlam ah kongpi thum a om hi. ¹⁴ Tua khawpi kulh baang in kingakna suangphum sawmlenih a nei a, tuate tung ah Belamnou’ sawltaklian sawmlenihte’ minte a tuang hi.

¹⁵ Kei hon houpih vansawltak

in tua khawpi leh a kongpite leh,

a kulhbaang teh nading khama kibawl tehna chiang ^[a] a tawi hi. ¹⁶ Tua khawpi kiuli kikima kilam ahi a, a dung leh a vai a kikim hi. Ama’n tehna chiangin tua khawpi a teh a, louchiing ^[b] 12,000 ahi. A dung leh a vai leh a san lam a kikim hi. ¹⁷ Tua khitin, a khawpi kulhbaang a teh a, tong 144 in a sah hi. Tua bel, vansawltak in mihing’ gen dana tonga a teh ahi. ¹⁸ Tua khawpi kulhbaang bel jaspar suanga kilam ahi a, tua khawpi lah kham

sianga kilam, limlang banga

siang ahi. ¹⁹ Tua khawpi kulh

baang kingakna suangphumte bel, suangmanpha namkima zep ahi. Suangphum khatna pen jaspar ahi a, a nihna safaiar, a thumna kalsedon, a lina emeral, ²⁰ a ngana sardoniks, a gukna sardi, a sagihna krusolait, a giatna beril, a kuana topazi, a sawmna krusopa, a sawmlekhatna jasin, a sawmlenihna amethi suang manphate ahi. ²¹ Tua kongpi sawm¬lenihte kep suang ahi uh a, kongpi khat zel kep suang beu khata kibawl ahi. Tua khawpi kongzing lah kham sianga kibawl ahi a, tua kham lah limlang muh paisuak theih bang ahi.

²² Tua khawpi sung ah tempul ka mu kei hi. Ahang bel, Toupa Pathian Vanglianpen leh Belamnou, a tempul ahi. ²³ Tua khawpi in a taanvak ding ni zong, kha zong a kul kei hi. Pathian’ thupina in taanvak a, Belamnou a meivaak ahi. ²⁴ Tua vaak ah hotdam namte a tualleeng ding uh a, leitung kumpipate’n a thupina uh a lalut ding uhi. ²⁵ A kongpite a kikhak ni a om ngei kei ding a, zan lah a om ngei kei ding hi. ²⁶ Tua ah namte’ thupina leh pahtawina a kilalut ding hi. ²⁷ Tua ah a sianglou peuhmah

a lut kei ding a, a zumhuai, ahihkei leh a zuautheihhuai hih mi kuamah zong a lut kei ding, Belamnou’ hinna laibu sunga min kigelhte kia a lut ding hi.