Jeremia 44

Paite Bible

Milimbiakna hanga Siatna

44 AIGUPTA mallam Migdol, Tapanhes leh Memfis leh Aigupta simlama teeng, Judate khempeuh tawh kisai hiai thu Jeremia kiang ah hong tung hi. ² Tangtawn Toupa Vanglianpen, Israel’ Pathian’ thugen hiai ahi: Jerusalem tung leh Judah khawpite tunga siatna thupi ka tut na muta uh. Tuni-in a sesa-a taisan leh loih ahi uh. ³ Thil gilou a hih man uh ahi. Amaute hi-in, noute hi-in, na pu na pate uh hita leh, na theih ngeilouh uh pathiante’ maia gimnamtuite hal a, bia a, kei hon hehsak uhi. ⁴ Amaute kiang ah ka sila kamsangte ka sawl a, amaute’n: Hiai ka huat thil kihhuai hih kei un! a chi uhi. ⁵ Ahihhangin, a ngaikhe kei uh a, a thudon kei uh a, pathian dangte’ maia gimnamtui hal lah a tawp tuan kei uhi. ⁶ Tua bang ahih manin, ka hehna nasia a soukhia a, Judah khawpite leh Jerusalem kongzingte tung ah a sou a, tuni-a bangin a sia leh loih a suaksak hi.

⁷ Tu’n Tangtawn Toupa Pathian Vanglianpen, Israel’ Pathian’ thugen hiai ahi: Banghanga Judah apan numei pasalte, naupang leh naungekte satkhia-a, noumau tunga hizahta-a siatna kitut a, a khawsuak omlou-a kikoih na hi ua? ⁸ Banghanga Aigupta gama teeng dinga nong paina ua, pathian dangte’ maia gimnamtuite hal a, noumau khutsuakte-a hon hehsak na hi ua? Noumau ki-hihse ding uchin a, leitung namte khempeuh laka hamsiat leh zahlakna kisuah ding na hi uhi. ⁹ Na pu na pate uleh, Judah kumpipate leh kumpinute’n gitlouhna a hihte uleh, noute leh na zite un Judah gam leh, Jerusalem kongzing khawnga gitlouhna na hihte uh mangngilhta maw? ¹⁰ Tuni donga kingainiam nai lou a, zahtakna lah lak lou, noute leh na pu na pate uh maia ka koih ka dan piak leh thukhennate lah zui lou uhi.

¹¹ Tua bang ahih mana, Tangtawn Toupa Vanglianpen, Israel Pathian’ thugen hiai ahi: Noute tunga siatna tut ding leh, Judah gam khempeuh hihmanthat ding tum tinten hi’ng. ¹² Aigupta gama teeng dinga pai sawm tinten Judah mi khaw¬suaksunte lamang ding hi’ng. A vekpi ua Aigupta gama mangthang ding uh a, namsaua puk ding uh a, kiala si ding uhi. A neupen apan a lianpen dong namsau hiam, kial hiama si ding uhi. Hamselawh

leh mulkimna, mawhpaihna leh zahlakna mite suak ding uhi. ¹³ Ke’n Jerusalem ka gawt banga, Aigupta gama teengte, namsau leh kial leh hipi-a gawt ding hi’ng. ¹⁴ Judah gama khawsuaksun, Aigupta-a teeng dinga paite kuamah suakta lou ding uh a, hong kik a, teen a lunggulhna uh Judah gam tung dinga suakta lou ding uhi. A tavaih tawmchik loungal kuamah hong kik lou ding uhi, chi ahi.

¹⁵ Tua khitin, a zite uh, tua-a om numeite khempeuh tawh, tampi petmah in pathian dangte’ mai ah gimnamtui a hal uh, chih thei pasalte khempeuh leh Aigupta mallam leh simlama teengte’n Jeremia kiang ah: ¹⁶ Tangtawn Toupa’ mina koute kianga thupuak na gen ngaikhe lou ding hi ung! ¹⁷ Hih ding ka chihsa peuhmah uh hih ngeingei ding hi ung. Koute leh ka pu ka pate uh, ka kumpipate uleh ka uliante un, Judah khawpite leh Jerusalem kongzing khawnga ka hih ngeisa bang ua, Vantung Kumpinu’ maia gimnamtui hal leh dawn thillatte sung baw ding hi ung. Tua hun laia an hau ung a, khawsa thei ung a, a sia thuak lou hi ung. ¹⁸ Ahihhanga, Vantung Kumpinu’ maia gimnamtui hal leh, a maia dawn thillatte sun ka tawp nungsang uh bangmah nei lou ung a, namsau leh kiala mangthang thang hi ung, a chi uhi.

¹⁹ Numeite’n: Vantung Kumpinu’ maia gimnamtui ka hal ua, a maia dawn thillatte ka sun lai ua, ama’ lim leh mel suna tanghou peite bawl ung a, a maia dawn thillatte sung ka hi uh, chih ka pasalte un thei uh hilou hia? a chi behlap lai uhi.

²⁰ Tua khitin, Jeremia in mite khempeuh, amah dawng numeite leh pasalte kiang ah: ²¹ Tangtawn Toupa’n noute leh na pu na pate uh, na kumpipate uleh, na uliante uleh, gamsung mite’n Judah khawpite leh Jerusalem kongzing khawnga gimnamtui na hal uh

thei gige a, ngaihtuah lou hia? ²² Tangtawn Toupa’n na gamtat giloute uleh, thil kihhuai na hihte uh a thuak zawh nawn louh taka, na gam uh tuni-a banga hamselawh leh a teeng ding omlou gamsia leh loih hong hi ahi ve. ²³ Gimnamtui na hal man uleh, Tangtawn Toupa tunga na khelh man uleh, a thu mang lou a, a dan hi-in, dan banga a thukhennate hi-in, a thu theihsakte hita leh, na zuih louh man ua, tu-a na muh bang ua, na tung ua hiai siatna hong tung ahi, a chi hi.

²⁴ Tua khitin, Jeremia in mite khempeuh, numeite tawh kiang ah: Nou, Aiguta gama Judah gam mite aw, Tangtawn Toupa’ thugen za un. ²⁵ Tangtawn Toupa Vanglianpen, Israel Pathian’ thugen hiai ahi: Vantung Kumpinu’ maia gimnamtui hal ding leh, dawn thillatte sungkhe dinga kichiamna ka bawl uh tangtun taktak ding hi ung, na chih uh, noute leh na zite un na thilhihte-un na langsakta uhi.

Hih ve ua, na chiamsa uh hih ve ua! Na kichiamna uh tangtun ve ua! ²⁶ Ahihhangin, Aigupta-a teeng Judah gam mite khempeuh in Tangtawn Toupa’ thu za un. Ama’n: Keima min thupi sialin ka kichiam a, Aigupta gam koimun peuha teeng, Judah gama kipan kuamah in ka min lou a, ahih kei leh, kichiama: Toupa Tangtawn Pathian hing hi, chi ngei nawn lou ding hi. ²⁷ Ahang bel, amaute adinga a hoih sawm lou a, a sia sawm a, amaute enkhia khia hi vengin, Aigupta gama Judah gam mite hihmanthat vek ahih mateng ua, namsau leh kiala mangthang ding uhi. ²⁸ Namsau apan suakta a, Aigupta apan Judah gama kik tawm mahmah ding hi. Tua hun chianga Judah gam mi, a suaktasun, Aigupta-a teeng hong paite’n a vekpi ua, kua thu ahia kip ding kei thu maw, amaute’ thu — chih thei ding uhi.

²⁹ Hiai mun ah noute kon gawt ding, chih chiamtehna hiai ahi ding. Tuachi-in, noute hihnat sawma kon vaunate a kip, chih na thei ding uhi, chi-a Tangtawn Toupa’n phuang ahi. ³⁰ Tangtawn Toupa’ thugen hiai ahi: Judah kumpipa Zedekia, a melma’ hinna lak sawma zong Babulon kumpipa’ Nebukhadnezar khuta ka piak banga, Aigupta kumpipa Faro Hofra a hinna lak sawma zong melma khuta pe ding hi’ng, chi hi, a chi hi.