Jeremia 4

Paite Bible

4 TANGTAWN Toupa’n

phuang a:

Israel aw, nong kik nawn a,

ka kianga nong kik nawn aleh

na milim kihhuaite ka muhna

apan koihmang a,

na vakmang nawn kei a,

² thutak leh dik leh diktata,

Tangtawn Toupa hing hi,

chih siala na kichiam leh,

tua hun chiangin, amah

tungtawnin

namte vualzawlin om ding uh a,

amah suang ding uhi, chi hi.

³ Judah leh Jerusalem kianga Tangtawn Toupa’ thupuak hiai ahi:

Na lei lehlouh hihnen unla,

ling lak ah haichi pawi kei un.

⁴ Tangtawn Toupa lam ah zek

kisum unla,

na lungtang uh sum un,

nou Judah mite leh

Jerusalem mite aw.

Tua ahih kei leh, thil gilou

na hih man ua,

ka hehna puakzak ding a,

mei banga kuang ding a,

kuama’n phelh zoulou ding hi,

chi hi.

Mallam apan Siatna

⁵ Tangtawn Toupa’n: Judah gam ah genkhia unla, Jerusalem ah phuang unla:

Gamsung khempeuh ah pengkul

mut un! chi un.

Nakpi-in kikou unla:

Kikaikhawm un!

Khawpi kulhneite ah taai ni!

chi un.

⁶ Zion-a pai nading puanlap khai un!

Zekai louin bitna delhin tai un!

Ke’n mallam apan siatna,

hihsiatna mulkimhuai nangawn

hon tun ding hi’ng, chi hi.

⁷ Humpinelkai khat a bukna

apan hong paikhia a,

namte hihmangthangpa khat

kuankhia hi.

Ama’n na gam uh hihse dinga,

ama’ omna nuseta hi.

Na khawpite uh a luah omlou a,

kisegawp ding hi.

⁸ Tua bang ahih manin, saiippuan

teeng unla,

dah-a kapin mau un.

Tangtawn Toupa’ hehna mulkimhuai,

eite apan kiheimang lou hiven.

⁹ Tua ni chianga, kumpipa leh uliante

lungke ding a, siampite mulkim

ding a, kamsangte’n lamdang

sa-a, dip-hawm ding uhi, chi-a

Tangtawn Toupa’n phuang hi.

¹⁰ Tua khitin, ke’n: Eh, Toupa Tangtawn Pathian aw, ka gawl ua namsau a kisuktuah laitaka, Lemna muanna na nei ding uh, na chih hiai mite leh Jerusalem nak khemthal hi na maizen chia ka chi hi.

¹¹ Tua hun chiangin, hiai mite

leh Jerusalem kiang ah: Gamdai gamkeua mualsang giaute apan keuna huih, ka mite lam ah hong nung, haihsiang ding leh hihsiang dinga nung hi lou hi. ¹² Tua dinga hat lua huih keima’ thupiakin hong nung hi. Amaute tunga ka thukhenna tu-a genkhia hi’ng, chi-a kihilh ding hi.

¹³ Ngai un! Amah meipi bangin

kaltou-in mainawt a,

a kangtalaite pingpei bangin,

hong kuan a,

a sakolte, muvanlaite sangin

thakin zaw hi.

Eite tung gik hi! Hihsiat hita hang!

¹⁴ Jerusalem aw, na lungtang apan

thil gilou silsiang inla,

hotdamin om in.

Ngaihtuahna giloute bang tan

kem ding na hia?

¹⁵ Dan apanin aw khat in phuang a,

Efraim tang gam apan

siatna phuang hi.

¹⁶ Tangtawn Toupa’n: Hiai thu,

namte kiang ah hilh unla,

Jerusalem ah phuang unla:

Gam gamlapi apanin, Judah

gam khawpite langbawla dou

dingin, sepaihhon galdouna aw

ngaihtak suaha hong kuan

ding hi.

¹⁷ Judah gam ka tunga a hel mana,

tua sepaihhonte’n lou vengmite

banga umchip uhi, chi-a

Tangtawn Toupa’n phuang hi.

¹⁸ Ama’n: Na gamtatna leh thilhihte’n

na tunga hiai tun hita.

Hiai nang hong kigawtna hita.

Nase na maizen e!

Lungtang sun na maizen e! chi hi.

¹⁹ Ka lungzing e, ka lungzing!

Na sain kipek ing.

Ka lungtang na e, ka lungtang na!

Ka lungtang kihot a,

om kinken theilou hi’ng,

pengkul ging zata ing a,

galla zata hi’ng.

²⁰ Siatna in siatna zui a,

gamsung bup kisia-a om hi.

Thakhata ka puanbukte hihsiata om a,

mitphiat kalloua ka bukna sia hi.

²¹ Bangtan kidouna puanlap mu ding a,

pengkul ging za ding ka hia?

²² Ama’n: Ka mite lah mihai hi uh a,

kei hon thei lou uhi.

Thil kilawm theilou naupangte

hi uh a, theihsiamna

neilou uhi.

Thil gilou hih lam siam uh a,

thil hoih hihdan thei lou

uhi, chi hi.

²³ Leitung en ing a, lim leh mel bei,

a mial hi a,

vaante en ing a, amaute’ vaak

bei hi uhi.

²⁴ Tangsangte en ing a, liing uh a,

mualte kivuang uhi.

²⁵ En ing a, mihingte omlou a,

vaana vasate lengmang vek uhi.

²⁶ En ing a, gam gahsuahthei

gamdai-gamkeu suak a, a khawpite

khempeuh, Tangtawn Toupa’

mai leh a hehna maia

sesa-a om uhi.

²⁷ Tangtawn Toupa’ thugen hiai ahi:

Gamsung bup a vekin

hihmangthang

kei mah leng, sesa-a

om ding hi.

²⁸ Tua bang ahih mana, leitung in

kah ding a,

tunga vaante mial ding hi.

Ahang bel, ke’n genkhinta ing a,

lakik lou ding ing a,

thu khentatta ing a,

lehkik nawn lou ding hi’ng,

chi ahi.

²⁹ Sakoltungtuangte leh thaltawite

ging za a,

khawpi-a teeng khempeuh

taikeek hi.

Pawl khat loupa laka lut uh a,

pawl khat suang laka

kaltou uhi.

Khawpite khempeuh kilawita a,

a sunga kuamah teeng lou hi.

³⁰ Hihsiata ompa nang aw,

bang hih na hia?

Banghanga a sanau silh a,

banghanga khama kizem?

Banghanga na mukte nuhvom a,

a mawkna-a kizem na hia?

Nang hon deihtate’n hon

simmawh a,

na hinna lak sawm uhi.

³¹ Numei nauvei banga kap,

a ta masa nei banga mau

zata hi’ng.

Zion’ tanu kap a, nak hawphawp a,

a khut zankhia a: Maizen!

sidangta ing a,

ka hinna tualthatte’ khuta

piakkhiak hita hi,

chi hi.