Jeremia 20

Paite Bible

Jeremia leh Pashur

20 JEREMIA in hiai gen¬kholhna thute a gen Imar’ tapa siampi Pashur, Tangtawn Toupa’ tempula ulian makaipa’n a zaktakin, ² Jeremia a vawsak a, Tangtawn Toupa’ tempula Benjamin Kongpi Saknung ah kol a bunsak hi. ³ A zingchianga, Pashur in tua kolte apan Jeremia a khah takin, Jeremia in Pashur kiang ah: Tangtawn Toupa’n na min dinga a sak Pashur ahi kei a, Magor Misabib ^[a] ahi. ⁴ Ahang bel, Tangtawn Toupa’ thugen hiai hiven: Nangmah ading leh na lawmte khempeuh adinga mulkimna-a nang hon bawl ding ing a, amaute a melmate uh’ namsaua a puk lai uh na mit mahmaha mu ding na hi. Judah khempeuh Babulon kumpipa khuta pekhe ding ing a, ama’n amaute, Babulona pawmang ding a, ahih kei leh, namsaua that ding ahi. ⁵ Hiai khawpi’ hauhnate khempeuh, a sepsuah khempeuh, a melmate uh khuta pe ding hi’ng. Amaute’n gallak suma tua la ding uh a, Babulon tun ding uhi. ⁶ Nang Pashur leh na inna teengte khempeuh, Babulon ah kaihmangin na om ding uh a, tua ah na si ding a, na kivui ding a, nang leh genkholhna thuzuau na genna na lawmte khempeuh tawh, tua muna si-in na kivui ding uhi, chi ahi, a chi hi.

Jeremia’ Lungkimlouhna

⁷ Tangtawn Toupa aw, hon khem

chin a,

khemzawha om hita ing.

Hon thazawh chin a, vualzou hita

na hi.

Sun nitum tuma nuihzabuk hita

ing a,

kuapeuh in hon enghou hi.

⁸ Thu ka gen peuhmah chianga,

kikoukhia a, hiamgamna leh

hihmanthatna tangkoupih hi’ng.

Tuachi-a Tangtawn Toupa’ thu in

ka tunga selphouna leh

zahlakna hon tun hi.

⁹ Ahihhanga, ama’ min gen lou dinga

a mina zong thu gen nawn

lou ding hi’ng,

chi dek leng,

Ama’ thu ka lungsunga mei

banga om a,

ka guhte sunga bilh bang hi.

Ka sunga kep tawl ing a,

kem thei lou taktak hi’ng.

¹⁰ Kilchih ah mulkimna om!

Amah hek un! Amah hek ni!

chi-a kihuau tampi za hi’ng.

Ka lawmte khempeuh in ka kipuk

ding tang uh a: Khempaiha

om kha ding a, tua hun chianga

amah zou ding hang a,

ama’ tunga phuba la ding hi hang,

kichi uhi.

¹¹ Ahihhanga, Tangtawn Toupa’n

galhat mahmah banga

hon ompih a,

kei hon bawlsete kipal ding uh a,

hon zou lou ding uhi.

Amaute lawhsam ding uh a,

zahlak ding uh a,

a zahlakna uh kimangngilh

ngeilou ding hi.

¹² Tangtawn Toupa Vanglianpen,

midiktatte entel a,

lungtang leh lungsim ensuakpa aw,

nang khuta ka thu

nga hi vengin,

maute tunga na phulakna

hon musak in.

¹³ Tangtawn Toupa phatin la sa un!

Ama’n migiloute’ khut apan

a tasamte’ hinna hukhia hi.

¹⁴ Ka pian ni hamsiatin om hen!

Ka nu’n hon neihkhiak ni

vualzawlin om kei hen!

¹⁵ Ka pianni vualzawla, ka pa kianga:

Ta na nei a, tapa ahi!

chipa hamsiatin om hen!

¹⁶ Tua bang mi pen, Tangtawn Toupa’n

lainatna beia a lumlet

khawpite bang hen.

Zingsangin kapa mauna za henla,

sun laiin galla za hen.

¹⁷ Ahang bel, ama’n sula hon that

lou a, ka nu’ sung, ka hankhuk

suaksak a, a sul

khaksakden lou hiven.

¹⁸ Banghanga lungkham dahna mu

ding leh,

ka nite zumhuaitaka beisak dinga,

sul apan hong pawtkhe

mahmah ka hia?