Jeremia 18
Paite Bible
Belvelpa’ Inn ah
18 TANGTAWN Toupa apan Jeremia kianga thu hong tung hiai ahi: 2 Belvelpa’ inn ah va hawhsuk inla, tua ah ka thupuak kon pe ding, chi hi. 3 Tuachi-in, belvelpa’ inn ah ka hawhsuk a, amah, belvelna peia nasemin ka mu hi. 4 Ahihhangin, bellei apan a belvel, a khut ah a deih bang mel pulouin hong om a, tuachi-in, belvelpa’n bel dang khat dingin
a vel a, ama’ hoihsak dan penin a bawl hi.
5 Tua khitin, Tangtawn Toupa’ thu ka kiang ah hong tung a: 6 Israel innkawte aw, hiai belvelpa’ hih bangin nang tung ah ka hih thei keia hia? chi-in Tangtawn Toupa’n a phuang hi. Israel innkawte aw, belvelpa’ khuta tungman bangin, ka khuta om na hi uh aw. 7 Nam khat peuh hi-in, kumpigam khat peuh hita leh, bulkalh, phelgawp leh hihmanthat ahi ding, chi-a hun khat peuh-a ka phuan a, 8 tua nam ka vauhilhna pen, a thilgilou hih a kisik leh, ka lunghei ding a, siatna tut ka sawm, a tung ah a tung kei ding. 9 Tua baan ah, nam khat peuh hi-in, kumpigam khat peuh hita leh, lamtouh leh suankip ahi ding, chi-a hun dang khat peuha ka phuan a, 10 tua nam in ka mitmuha thilgilou a hih a, ka thu a man kei leh, ama’ adinga thil hoih hih ka sawm ka kikhelsak ding.
11 Tua bang ahih manin, tuin Judah mite leh Jerusalema teengte kiang ah thu gen inla: Hiai Tangtawn Toupa’ thugen ahi: Ngai dih uh! Noute adinga tuahsiatna gelkhol ing a, noute doua thil sawm ka hi. Tua bang ahih manin, na gamtatna giloute uh kiheisan unla, na lampite uleh na gamtatna uh puahpha un, chi in. 12 Ahihhangin, amaute’n: Phatuam kei. Ka gelsa bangbang uh hih n’ung. Michih in ka lungtang genhak mah uh zui n’ung, chi-a hon dawng ding uhi, a chi hi.
13 Tua bang ahih manin, Tangtawn Toupa’ thugen hiai ahi:
Namte lak ah kan unla:
Kua’n hibang thu za ngei ahia?
Israel nungak siangthou in
thil mulkimhuaipen khat hih hi.
14 Lebanon vukte, a pangken
suang laka
tuimang ngei hia?
A tui vot didite, gamlapi-a a nakte
apan luan tawp ngei hia?
chi-in kan un.
15 Hinapi-a ka mite’n kei hon
mangngilhta a,
a mannabei milimte’ maia
gimnamtuite hal uhi.
Tuate’n lah a lampite uleh,
tanglai lampite-a amaute
kipalpaisak uhi.
Amaute lamneu kawchikte leh,
a kikemlou lampite
tawnsak uhi.
16 A gam uh hihsiat hi ding a,
simmawh gige hi ding hi.
Tua gam tawnte peuhmah in
lamdang sa ding uh a,
lu sinkhum ding uhi.
17 Suahlam apan huih nung banga,
a melmate uh maia amaute
thehthang ding hi’ng.
Amaute a tuahsiat ni ua,
ka maitang hilou a, ka
nunglam musak ding hi’ng,
chi hi.
18 Amaute’n: Kisa unla, Jeremia sawm ni. Ahang bel, siampi in a sinsak dan mang lou dinga, mipilte apan thuhilhna zong, kamsangte apan thugen zong mang lou ding hiven. Tua bang hi a, kisa unla, i leite in amah dou ni, a thugen bangmah thudon kei ni, chi uhi.
19 Tangtawn Toupa aw, hon
ngaikhia inla,
kei hon hekte’ thugen za in!
20 Thil hoih, thilhoihloua
thuk hi ding hia?
Hinapi-a kei adinga gum
khuak uhi.
Na maia ding ing a, na thangpaihna
amaute apan heimang dinga,
amaute tanga thu gen ka hi,
chih thei gige in.
21 Tua bang ahih manin, a tate uh,
kialpi ah pekhia inla,
namsau vangletna ah pekhia in.
A zite uh tabei leh
meigong suaksak in.
A pasalte uh thahin om uhenla,
a tangvalte uh kidouna phuala
namsaua thahin om uhen.
22 Galsimmite amaute tunga na tunsak
guih chiangin, a innte uapan
kah husa kiza hen,
kei hon mat nading ua
gum khuak uh a,
ka khe adinga a sima
thang hon siah uh hiven.
23 Ahihhanga, Tangtawn Toupa aw,
kei thah hon sawmna
khempeuh uh
nang theivek na hi.
A mawhna liante uh
ngaidam kenla,
a khelhnate uh zong na mitmuh apan
thaimang ken.
Na maia paihkhiakin om uhenla,
na heh ni-in, amaute
tung ah gamtang in.
The Holy Bible in Paite, Copyright © 2004 Bibles International: Grand Rapids, Michigan.