Isai 47

Paite Bible

Babulon Pukna

47 KUMSUK inla, leivui lak ah tu in.

Nang Babulon Tanu Nungak

siangthou aw,

kumpitutphah tung hilouin,

leilak ah tu in.

Nang Kaldaite’ tanu aw, dawng

thinthen leh nou ngikngiak

chih hi nawn lou ding na hi.

² Buhgawina suang la inla,

buh gawineel in.

Na maikhuhna hawkkhia inla,

na nik lemtou in.

Na pheipi dawksain tuite

ngap in.

³ Na vuaktanna dawk ding a, ahi,

na zahmawh kimu ding hi.

Ke'n phu lading ing a,

kua mah hawi lou ding hi'ng.

⁴ Koute’ Tanpa a min Tangtawn

Toupa ahi.

Amah Israel Misiangthoupa ahi.

⁵ Dai didein tu inla, miallak ah pai in.

Nang Kaldaite’ tanu aw,

kumpigamte’ kumpinu,

chih hi nawn

lou ding na hi.

⁶ Ka mite’ tunga heh ing a,

ka goutan hihniin ing a,

Na khut sunga hon pekhia hi’ng.

Amaute tunga zahngaihna suah

lou chin a,

a tate uh tunga hakkol gik

suan na hi.

⁷ Nang lah: Kumpinu hiden ding

ka hi, chi chin a,

hiai thilte ngaihsak lou na hi.

A tawpna ding zong thei gige

lou na hi.

⁸ Tuin, nou bittaka om a,

nuamtatte’n hiai za un.

Kei lou kuamah dang om lou,

meithai ngeilou ding hi’ng,

tate zong suun lou ding hi’ng,

na chi umaw!

⁹ Mitphiat kallouin hiai thil

nihte hong tung ding a,

ni khat thuin hong tung ding hi.

Tate sunna leh meigong hihna a

kimsipsipa

hong tungkhawm ding.

¹⁰ Na gitlouhna muang a: Kuama’n

hon mu kei, chi chin a,

kei ka hi, kei lou kuamah dang

om kei, na chih laia,

na pilna leh theihna in

hon kaimang ahi.

¹¹ Tua bang ahih mana na tunga

tuahsiatna hong tung ding a,

beisak nading dan lah thei

lou ding na hi.

Lungkhamna in hon tum ding a,

thoihdam thei lou ding na hi.

Na theihkholh louh siatgawpna

thakhata na tunga

hong tung ding ahi.

¹² Na tuailai hun apan na khop,

na aisan siamna teng tawh,

na mibumna teng tawh,

tuin diang ve le, na lawhching

khamawh ding hia,

mulkimna na tun khamawh

ding hia!

¹³ Thuhilhna na don zouzaite’n

hon bahsak hial hilou maw!

Tuin na vaanlam thil suite, aksi

etsiam, a kha a kha-a

thugenkholte’n hon dinpih

uh henla, na tunga thil

tung dingte apan hon

hukhe le uh ake!

¹⁴ En dih, buhpawl bang lel hi ding

uh a, mei in kangtum ding hi.

Meikuang apan amau leh amau

kihukhe thei lou ding uhi.

Meilum ding meihol am lel hi

lou ding a, awithawh

ding meikuang lel hi sam

lou ding hi.

¹⁵ Na neu apan na seppih, na

kisuanpih na sumsinte hibang

lel hi ding uhi.

Michih a khelhna lama vakmang

ding a,

kuamah nang hon hondam ding

om lou ding hi.