Isai 41

Paite Bible

Pathian’ Huhna

41 NOU tuikulh gamte aw,

ka mai ah dai dide unla,

namte’n a thahatna uh

thaksak uhen.

Hon naih uh henla, thu gen uhen.

Thukhenna mun ah

kikaikhawm ni.

² Kua ahia suahlam apan mi tokthou a,

diktatna-a nna sem dinga

amah sam?

Ama’n namte ama’ khutsung ah

pekhia a,

ama’ mai ah kumpite zougawp a,

namsauin amaute leivui

suaksak a,

a thalphelin huihmut vai

suaksak hi.

³ Ama’n amaute delh a, nidanga

a tot ngeihlouh lampi ah

bittakin paisuak hi.

⁴ Kua ahia a chil apan mite a khang

a khanga samkhia a,

hiai hih a, hih zouvek?

Kei, Tangtawn Toupa, amaute a

masapen apan a nanungpen tawh

om keimah amah hiveng e.

⁵ Tuikulh gamte’n tua mu uh a,

lau uhi.

Lei mong dong lauin ling hi.

Hon naih uh a, hong pai uhi.

⁶ Michih in a innveng huh a,

a sanggampa kianga:

Thahat suah in, chi hi.

⁷ Khutsiam mi in khamsik sekmi

hanthawn a, seka sekmam mi in,

seknuaiphaha siksekmi hanthawn a,

a sikpeh thu gen a:

A hoih e, chi hi.

Ama’n tua milim a kilawi louh

nadinga,

a kilhna-a kilhkip hi.

⁸ Ahihhanga ka sila nang Israel,

ka telsa nang Jakob,

ka lawm Abraham’ suan,

⁹ Lei mong dong apan hon la ing a,

mun gamlapen apan hon

sam ing a,

na kiang ua: Noute ka telsa

ka silate hon paaikhe lou hi’ng.

¹⁰ Lau kei un, hon ompih hi’ng,

Lungke kei un, na Pathian

uh hi ing.

Hon hatsak ding ing a,

hon huh ding hi’ng.

Ka khut taklam diktatnain

hon tungding ding hi.

¹¹ Ngai un, noute hon dou dinga,

lungsim nei khempeuh,

maizum ding a, zahlaak ding hi.

Bangmah suak lou ding uh a,

nou hon sualte mangthang

ding uhi.

¹² Amaute zong mah le uchin,

mu lou ding hi uteh.

Nou hon sualte mu lou ding

hi uteh.

Na tung ua gal bawlte

bangmah suak lou ding uhi.

¹³ Kei, Tangtawn Toupa, na Pathian

un na khut taklam uh hon

len ding hi’ng.

Lau kei un, hon huh ding hi’ng,

chipa kei hi’ng.

¹⁴ Jakob, nang tangteel lel,

nang a neu Israel aw,

lau ken, hon huh ding hi’ng,

Tangtawn Toupa leh nang

hon Tanpa,

Israel’ Misiangthoupa’n chi hi.

¹⁵ Ngai in, buhkhetna chiang thak

a ha lian neia hon bawl

ding ing a,

mualte khen ding chin a,

zansak ding chin a,

buhsi suaksak ding hi teh.

¹⁶ Amaute khi ding chin a,

huih in mutleeng ding a,

pingpei in thehthaang ding hi.

Nang bel, Tangtawn Toupa-a

nuam ding chin a,

Israel Misiangthoupa suang

ding na hi.

¹⁷ A zawng leh gentheite’n tui

zong uh a, tui om lou a,

dangtaka a lei uh keugawp hi.

Kei, Tangtawn Toupa’n amaute

za ding ing a,

Kei, Israel Pathian in amaute

taisan lou ding hi’ng.

¹⁸ Mual gumgawtaak laka lui

luangsak ding ing a,

Luikuam lian leh za teng

tuinakte-a luangsak

ding hi’ng.

Gamkeute-a tui vung suaksak

ding ing a,

gamkeute-a luinakte phulsak

ding hi’ng.

¹⁹ Gamdai-gamkeu ah sidar

singte leh akasia singte,

Martil singte,

oliv singte suan ding ing a,

gamdai-gamkeu ah tengtere

kungte taksingte,

meilah singte suan ding hi’ng.

²⁰ Ahang bel, mite’n tuate mu a,

Tangtawn Toupa’ hih ahi,

Israel Misiangthoupa’ hih ahi,

chih a muh chiang ua,

a theih nading uh, a suutsuut

ding uh, a theihsiam

nading uh hiven.

Mannabei Milimte

²¹ Tangtawn Toupa’n: Na thu uh

hon tun un, chi a,

Jakob’ Kumpipa’n: Na paulam

pansante uh gen un, chi hi.

²² Ama’n: Thil hong tung dingte

gen dingin na milimte uh

hon lalut ve ua.

Thil tung masate zong bang ahia,

hon hilh le uh ake.

Hileh, i ngaihtuah dia,

a tawp nading i thei ke.

Ahih kei leh, thil hong tung

dingte hon hilh le uh ake.

²³ Tunung thil om dingte hon

hilh le uchin, pathiante

na hina uh, chih thei

ding ka kei ua.

I lungzin nading uleh

i laukhawm nadingun,

thil khat beek, a hoih hi-in

a hoihlou hita leh, hih ve ua.

²⁴ Bangmah lou sanga neu zaw

hi uteh,

na nasep uh mannabei hi,

noute hon telpa kihhuai.

²⁵ Mallam apan mi khat

tokthouta ing a,

amah hong kuankhia hi.

Ama’n ni suahna lam apan

ka min sam ding a,

ama’n kumpipate buanchil banga

chil ding a,

belvelmi in tungman a chil

banga chil ding hi.

²⁶ Hiai i theih nadinga a chiila

kua’n hiai hon hilh ahia?

Amah dik mah e, i chih nadinga

kua’n genkhol ahia?

Kuama’n hiai hon hilh lou a,

kuama’n genkhol lou,

kuama’n noute apan thu himhim

za lou hi.

²⁷ En un, hiai ah om uh, chi-a

Zion hilh masapen kei hi ve’ng.

Ke’n Jerusalem tunga tangthupha

tun mi pia ka hi.

²⁸ En ing a, kuamah mu lou,

thuhilhna pe ding amaute laka

kuamah om lou.

Amaute ka dot chianga hon dawng

ding kuamah om lou.

²⁹ En un, amaute dik lou hi vek uhi!

A nasepte un bangmah

man lou,

a milimte uh huih hi lel,

buaina hi lel uhi.