Isai 40

Paite Bible

Pathian’ Mite Khamuanna

40 NOUTE’ Pathian in:

Khamuan un, ahi, ka mite

khamuan un! chi hi.

² Jerusalem kiang ah kamdamtakin

gen unla, a sepgimna beita a,

a mawhna kidamsakkhinta hi.

A mawhnate thukna lehnihin

Tangtawn Toupa’ khut apan

muta hi, chi-in hilh un.

³ Kikoupa’ aw in: Gamkeu ah

Tangtawn Toupa’ adingin

lampi bawlkhol unla,

gamdai-gamkeu ah i Pathian

ading lamlian tang bawl un.

⁴ Luikuam teng hihsang hi ding a,

mual leh tangte hihniam hi

ding hi.

Lamkawite hihtang hi ding a,

a phoklaite hihmam hi ding hi.

⁵ Tuachi-a, Tangtawn Toupa’ thupina

latsak hi ding a, mi khempeuh in

tua mukhawm ding uhi.

Ahang bel, Tangtawn Toupa’

kam in

genkhinta hiven, chi hi.

⁶ Tua aw in: Kikoukhia in! chi a,

Ke’n: Bang gena kikou ding

ka hia, ka chi hi.

Tua aw in: Sa nei khempeuh loupa

bang hi a, a kilawmna uh

zong gampalak pakte bang hi

lel hi.

⁷ Tua loupa vuai a, a pakte pulh hi.

Ahang bel, Tangtawn Thuneipen in,

kama hu-a tua mut hiven.

Mihingte loupa leltak hi taktak hi.

⁸ Tua loupa vuai a, a pakte pulh a,

ahihhanga, Pathian’ thu bel

kipden hi.

⁹ Ziona thu kipahhuai hon tun mi aw,

mual sang tung ah kaltou in.

Jerusalema thu kipahhuai

hon tun mi aw, ngaihtakin kikou

inla, lau ken.

Judah gam khawpite kiang ah:

Hiah na Pathian uh om, chi in.

¹⁰ En in, Toupa Tangtawn Pathian,

ban thahat tawh hong pai a,

a ban thahatin vai hawm hi.

En in, a pahtakman tawi a,

a ditna zong masuan hi.

¹¹ Ama’n belamchingpa banga

a belamte ching a, a banin

belamnoute huai a, angpom hi.

A noukaite damdamin pii hi.

¹² Kua’n ahia tuite khut

sunga teh a,

vaan zong a khuta khapteh?

Kua’n ahia leitung leivuite

lawha teh a,

mualte buukna-a buuk a,

tangte selphala-a buuk?

¹³ Kua’n ahia Tangtawn Toupa’

Kha’ lungsim thei a,

thuhilh mi-a pang a,

amah thuhilh?

¹⁴ Tangtawn Toupa’n amah

navaksak ding

a kua ahia a dot a, kua’n ahia

amah diktatna lampi hilh?

Kua’n ahia ama’ theihlouh sinsak a,

ahihkei leh theihsiamna

lampi lak?

¹⁵ Ngai in, namte lah tuibela tui

mal khat taak bang lel hi a,

buukna selphala-a leivui mal

khat baang bang lel hi ahi.

Ama’n zaw tuikulh gamte thil

neuchik banga lik toua teh hi.

¹⁶ Lebanon singte thillat haltum

nadinga kiching lou a,

Lebanon gamsa khempeuh zong

haltum kithoih nadinga

ching lou hi.

¹⁷ Namte khempeuh ama’ maia

bangmah tham hi lou hi.

Amah adinga a vuak sanga

neu zaw lai uhi.

¹⁸ Pathian kua tawh teh mahmah

ding na hia?

Bang batpih ahi, chi mahmah

ding na hia?

¹⁹ Khutsiam mi in milim sung a,

khamsik sek mi in

khamtuia luan a,

ngun sik sek mi in ngun

khainiangte-a zem hi.

²⁰ Tua bangte nei zoulou-a zawnglua

mi in, sing muattheilou teel a,

khutsiam mi zongkhia a,

a kitan lou ding suihthawh

milim bawlsak hi.

²¹ Noute’n theilou maw?

Noute’n zata lou maw?

A chil apan hilh a omlou maw?

Leitung kilamkhiak apana

theisiam nailou maw?

²² Lei bem tunga tupa amah hi a,

a tunga teengte khaupe

bang lel hi uhi.

Kua’n ahia vaante puan

banga zak a,

teenna ding puanbuk banga

amaute zalh?

²³ Ama’n kumpi tapate bangmahlou

suaksak a,

leitung thukhen mite mannabei

suaksak hi.

²⁴ Amaute a kisuan khit pheta,

amaute a kipawi khit phetin,

a kungte’n leia zung a

khak ma-a amaute muat ding a,

vuai ding uhi.

Pingpei in amaute loupa keu

banga mutmang ding hi.

²⁵ Kei kua tawh hon teh ding na hia?

Ka kimpih kua ahia?

a Siangthoupa’n chi hi.

²⁶ Daktou inla, vaante en in.

Hiai thilte khempeuh

kua siam ahia?

Ama’n vaan aksite khat khata

piikhia a,

amaute a min minun sam hi.

Ama’ thahatna thupi leh

ama’ vangletna thahatna

hanga a kim lou khat lel zong

om lou hi.

²⁷ Jakob aw, banghanga thu gen a,

Israel aw, banghanga phun a,

Tangtawn Toupa’n ka

gamtatna mu kei,

ka Pathian in ka ngetna

ngaihsak kei, chi na hia?

²⁸ Nang thei lou maw?

Nang za lou maw?

Tangtawn Toupa zaw, Tangtawn

Pathian, ^[a] leitung mong

dong Siampa ahi.

Amah tawl lou a, bah lou hi.

A theihsiamna kuama’n

suikhe zou lou ding hi.

²⁹ Ama’n a tawlte thahatna pia a,

a bahte thahatna behlapsak hi.

³⁰ Tuailaite nangawn tawl

ding uh a, bah ding uhi.

Tangvalte kisui ding uh a,

puk ding uhi.

³¹ Ahihhanga, Tangtawn Toupa

ngakmite’n zaw, thahatna

thaksak kikkik ding uhi.

Muvanlaite banga kha-a

lengtou ding uhi.

Taai ding uh a, bah lou ding,

pai ding uh a,

sawlsam lou ding uhi.