Hosia 6

Paite Bible

Lunghei dinga Sapna

6 HONG pai un, Tangtawn Toupa lam ah kik ni.

Ama’n hon botzanta mah leh,

hon damsak ding hi.

Ama’n hon liamsakta mah leh,

i liammate hon tuam ding hi.

² Ni nih nunga ama’n hon halhsak

ding a,

a ni thum ni-a ama’n hon

phongtou ding a,

a omna muna teeng ding hi hang.

³ Pathian thei ni, Tangtawn Toupa

theihna delh ni.

Zingsang phalvak a

tung ngeingei banga,

ama’ hong kilatna tung

ngeingei ding hi.

Amah vuahzu banga hong tung

ding a,

leitung buakkawt khawkhal

vuah masa banga hong tung

ding hi.

Israel leh Judah Lungheinoplouhna

⁴ Efraim aw, bang hon lawh

thei ding ka hia?

Judah aw, bang hon lawh

thei ding ka hia?

Na muanhuaina uh zingsang

tuimei bang hi a,

zingsang daitui theng

pah bang hi ahi.

⁵ Tua bang a hih mana,

ka kamsangte zanga

hon satzan ing a,

ka kama thutea hon that ing a,

na tung ua ka thukhennate

khawphia banga tangkhia hi.

⁶ Ahang bel, ke’n kithoihna sanga

zahngaihna lunggulh zaw ing a,

haltum thillatte sanga

Pathian' theihpihna lunggulh

zaw hi vengin.

⁷ Adam banga thukhun manglou uh a,

tua-a kei adinga muanhuai lou uhi.

⁸ Gilead lah migiloute’ khawpi hi a,

sisan baanna khekhapa dim hi.

⁹ Suamhatte’n mi a buk banga,

siampihonte’n Shekhem lampi-a

tual that uh a,

thil zumhuai hih uhi.

¹⁰ Israel innkawte laka thil

mulkimhuai mu hi’ng:

Tua Efraim kizuak a,

Israel hihnita om hi.

¹¹ Judah aw, nang adinga zong

buhlak hun sep ing a,

ka mite saltanna apan ka

piikik chianga tua hun

tung ding hi.