Hosia 5

Paite Bible

Israel leh Judah tunga Thukhenna

5 SIAMPITE aw, hiai za un!

Israel innkawte aw, thudon un!

Kumpi innkawte aw, ngai un!

Na tung ua hiai thukhenna

tu ding hi:

Mizpa khua ah thaangantah hi

uchin a,

Tabor mual ah lenthaang hi

na hi uhi.

² Helhatte’ mithahna ah kihel uh a,

amaute a vekpi ua thunun dinga

gawt ding hi’ng.

³ Efraim gam thei ing a,

Israel gam ka maia kisel theilou hi.

Efraim gam kizuak a,

Israel gam amah leh amah

kihihsia hi.

⁴ Amaute’ gamtatna in Pathian lama

kik nading dal hi.

Ahang bel, a lungsung ua kizuakna

lungsim om a,

Tangtawn Toupa theilou uh hiven.

⁵ Israel a kisaktheihna in amaute

mawhtangsak a,

Israel leh Efraim gam a mawhna ua

kisui uhi.

Judah gam zong amaute tawh

kisuikhawm hi.

⁶ A belamhonte uleh bawnghonte

utawh

Tangtawn Toupa zong dinga

kuan ding uh a,

amah mu lou ding uhi.

amah amaute apan

kihemkheta hi.

⁷ Tangtawn Toupa tung ah

muanhuailouin omta uhi.

Ahang bel, zawlta khawng nei uh a,

a Khathak angkuangluite un

amaute leh a goutante uh negai ding

hiven.

⁸ Gibea khua ah pengkul mut unla,

Rama khua ah belamtal'

kii mut un.

Beth Aven khua ah galdouna

aw suah unla:

Benjamin aw! masawnzel in,

chi un.

⁹ Salhna thuak ni chianga,

Efraim gam segawp ding hi.

Ke’n a tung ngeingei ding thil

Israel namte lak ah phuang

ding hi’ng.

¹⁰ Judah gam makaite lah gamgi suang

suansuante bang uhi.

Ka thangpaihna-a amaute tuikhang

banga tum ding hi’ng.

¹¹ Pathian in Efraim gam tunga

thu khenin nuaisiah a, sikden hi.

Ahang bel, Efraim in mihing’ thupiak

kilawptaka zui zaw hiven.

¹² Efraim gam adinga puannget

hi ding ing a,

Judah inkawte adinga

muatna hi ding hi’ng.

¹³ Efraim in a chinatna mu a,

Judah in a liamma a muh laia,

Efraim in lah Asuria lam nga a,

tua kumpipa thupi’ huhna ngen a,

ahihhanga, ama’n na chinatna

damsak theilou a,

na liamma lah damsak thei lou hi.

¹⁴ Ahang bel, kei Efraim tunga

humpinelkai banga

gamta ding ing a,

Judah innkawte tunga

humpinelkai banga

gamta ding hi vengin.

Keimah mah in amaute

botzan ding ing a,

taisan ding hi’ng.

Amaute pawmang ding ing a,

kuama’n amaute hukhe lou

ding hi.

¹⁵ A mawhna uh kiphawk a, ka mai

a zon mateng uh,

amaute pawmang ding ing a,

ka omna-a kiksan ding hi’ng.

Tua hun chianga lungkham

mangbanga kei hon zong

taktak ding uhi, chi hi.