Hosia 14

Paite Bible

Israel Tundingkikna

14 ISRAEL aw, Tangtawn

Toupa na Pathian

kiang ah kik nawn in.

Na mawhnate hanga kipalpai na hi.

² Thute hon pua inla, Tangtawn

Toupa kiang ah kik nawn inla,

amah kiang ah: Ka mawhnate

khempeuh uh maisak inla,

hehpihsiamin hon nasang in.

Muk apan kithoihna hon

laan ding hi ung.

³ Asuria in koute hon hukhe theilou.

Sakol tung ah tuang lou

ding hi ung.

Ka khutsuakte uh kiang ah zong:

Ka pathiante na hi uh, chi nawn

lou ding hi ung.

Ahang bel, pabeite’n nang ah

zahngaihna mu hi, chi un.

⁴ Ama’n: A hon taisanna uh damsak

ding ing a,

manbeia amaute it ding hi’ng.

Ahang bel, ka hehna amaute apan

kiheimangta hiven.

⁵ Israel gam adinga daitui bang hi

ding ing a, lilipak banga paklun

ding uh a,

Lebanon singkungte banga zung

kha ding uh a,

a selnoute khangtou ding hi.

⁶ Hiang thakte selkhe ding a, oliv

singkung banga kilawm ding

uh a, a gimnamtui Lebanon sidar

singkung bang ding hi.

⁷ Sing limliap ah mite teeng kik ding a,

amah buhvuipha banga

gahpha ding a,

grepgui banga paklun ding uh a,

a minthanna Lebanon apan grepzu

bang hi ding hi.

⁸ Efraim in: Milimte tawh bang

kisaina nei lai ding ka hia?

chi ding hi.

Ke’n amaute zata ing a, khawtuah

ding hi’ng.

Kei zaw meilah sing hing bang

hi ing a,

na gah suahna kei apan ahi,

chi hi.

⁹ A pil kua ahia? Hiai thilte

theisiam hen.

A theikaksiam kua ahia?

Hiai thilte thei hen.

Ahang bel, Tangtawn Toupa’

lampite dik a,

midiktatte’n tuate tawn ding a,

a helhatte bel tuatea kipalpai

ding hiven.