Hebrute 4

Paite Bible

Khawl Tawldamna Taktak

4 TUA bang ahih manin, lau ni. Tuachi louin zaw, ama’ khawl tawldamna sung lut nading thuchiam omlai napi-in, na lak uah a lut lah khattou a om zenzen kha ding hi. ² Ahang bel, amaute kianga kigenta bangin, eite kiang ah zong tangthupha a kigenta hi. Ahihhangin, amaute’n thu’ a zak pen uh, upna tawh kithuaha saang lou uh a hih manin, amaute adingin a phatuam kei hi. ³ Pathian in:

Thangpaia kichiam zena:

Amaute ka khawl tawldamna

ah lut ngei kei unteh,

chi ka hi,

a chih bangbangin, a um eite bel, tua khawl tawldamna ah i lut lellel hi. Pathian in leitung khua vannuai a siam khitin, a nasep zou ahita hi. ⁴ Ahang bel, koilai hiam ah, ni sagih ni thu hibangin a na gen a: Ni sagih ni-in Pathian, a nasep khempeuh apan a khawl tawldamta hi, a chi hi. ⁵ Tua bang hinapi-in, ama’n a tunga kigensa bangin:

Amaute ka khawltawldamna ah

lut ngei kei unteh,

a chi kik lai hi.

⁶ Mi pawlkhat, tua khawl tawl¬damna-a lut ding om lai ahi, chih leh, nidang laia tangthupha kigen za masate’n a um kei uh a, thumanlouhna hangin, tua khawl tawldamna ah a lut kei uh, chih a kitel hi. ⁷ Pathian in nidang laia a gensa bangin, sawtpi nungin, David tungtawn-in:

Tuni-a a aw na zak chiangun,

na lungtang uh khauhsak

kei un,

chi-in, ni dang khat a sep kik a, Tuni, a chi hi. ⁸ Joshua in amaute khawl tawldamna na pekhin hita leh, a nunglamin, Pathian in nidang khat thu gen lou ding ahi. ⁹ Tua bang ahih manin, Pathian’ mite adingin Sabbath khawlna a om lai, chih a kitel hi. ¹⁰ Ahang bel, Pathian zong ama’ nasep apan khawl tawldam samta ahi. ¹¹ Tuabang ahih manin, amaute banga, uplahna hanga kuamah puk loua, tua khawl tawldamna-a lut dingin theihtawp suah ni.

¹² Ahang bel, Pathian Thu a hing a, a vanglian hi. Namsau hiamtuah bangteng sangin a hiamzaw a, hinna ^[a] leh kha, guhlawi leh guhsungngek nangawn tuamkhen hialin a sun thei a, lungtang’ ngaihsut leh tup a theitel hi. ¹³ Pathian’ muh louh dingin thilsiam bangmah a kisel thei kei. Thu khen dinga i thutut nadingpa’ mitmuhin bangkim hawksa leh vuaktang ahi.

Khrist’ Siampilian Hihna

¹⁴ Eite’n Siampilian thupi khat, vante-a paisuakpa i nei hi. Amah Jesu, Pathian’ Tapa ahi. Tua ahih nung, thu-up pen lenkip ni.

¹⁵ I hatlouhnate hon phawkpih theilou Siampilian nei i hi kei. Eite mah banga lam chitenga zolna tuak, ahihhanga, khiallou Siampilian nei i hi zaw hi. ¹⁶ Tua ahih nungsang, kimuangtakin, hehpihna kumpitutphah mai naih ni. Tuachi-in, i kul laitaka hon panpih ding zahngaihna leh hehpihna i ngah ding hi.