Ezra 8

Paite Bible

Ezra tawh Ton Inkuan Lutangte

8 KUMPIPA Arteksersa’ vaihawm chila Babulon apan kei hon zuite laka min kikhum inkuan lutangte hiaite ahi.

² Fineha’ suante lak apan Gershom;

Ithamar’ suante lak apan Daniel;

David’ suante lak apan Hatush,

³ amah Shekania’ tapate laka khat ahi;

Parosh suante lak apan, Zekharia.

Amah tawh minkhum khawm

mi 150 ahi.

⁴ Pahath Moab’ suante lak apan

Eliehoenai. Eliehoenai bel Zerahia’

tapa ahi. Amah tawh minkhum

khawm mi 200 ahi.

⁵ Zatu’ suante lak apan Shekania.

Shekania bel Jahaziel’ tapa ahi.

Amah tawh minkhum khawm

mi 300 ahi.

⁶ Adin’ suante lak apan Ebed. Ebed

bel Jonathan’ tapa ahi. Amah tawh

minkhum khawm mi 50 ahi.

⁷ Elam’ suante lak apan Jeshaia.

Jeshaia bel Athalia’ tapa ahi.

Amah tawh minkhum khawm

mi 70 ahi.

⁸ Shefatia’ suante lak apan Zebadia.

Zebadia bel Mikhael’ tapa ahi.

Amah tawh minkhum mi 80 ahi.

⁹ Joab’ suante lak apan Obadia.

Obadia bel Jehiel’ tapa ahi. Amah

tawh minkhum khawm mi 218

ahi.

¹⁰ Bani’ suante lak apan Shelomith.

Shelomith bel Josifia’ tapa ahi.

Amah tawh minkhum khawm

mi 160 ahi.

¹¹ Bebai’ suante lak apan Zekharia.

Zekharia bel Bebai’ tapa ahi. Amah

tawh minkhum khawm mi 28 ahi.

¹² Azgad’ suante lak apan Johanan.

Johanan bel Hakatan’ tapa ahi.

Amah tawh minkhum khawm

mi 110 ahi.

¹³ Adonikam’ suante’ lak apan, a

nanungpente’ min Elifelet, Jeuel

leh Shemaia. Amau tawh

minkhum khawm mi 60 ahi.

¹⁴ Bigvai’ suante lak apan Uthai

leh Zakur. Amaute tawh

minkhum khawm mi 70 ahi.

Jerusalema Kikna

¹⁵ Ke’n amaute, Ahava lama luang Tuilam ah ka kaikhawm a, tua mun ah ni thum sung giahphual ah ka giak uhi. Amaute leh siampite lak ka et leh Levite kuamah ka mu

kei hi. ¹⁶ Tuachi-in, Eliezer, Ariel, Shemaia, Elnathan, Jarib, Elnathan, Nathan, Zekharia leh Meshulam ka samsak hi. Amaute makaite ahi uhi. Hiaite baan ah, laisiam Joiarib leh Elnathan zong ka samsak hi. ¹⁷ Amaute, Kasifia khua-a makai Ido kiang ah ka sawl a, Ido leh a behte tua Kasifia-a tempul sawltawlte tawh kianga gen ding ka hilh hi. Tua bel, i Pathian’ inn-a hong sem ding mi hon sawl theih nading uh ahi. ¹⁸ I Pathian’ hehpihna khut koute tunga om a hih manin, amaute’n hiai mite hon pia uhi. Israel’ tapa Levi’ tapa Mali’ suante lak apan mi kizentak Sherebia leh Shenabia’ tapate leh sanggampate a vek-un pasal sawmlegiat hon tonpih uhi. ¹⁹ Tua baan ah, Merari suante lak apan Jeshaia tawh Hashabia leh a sanggamte leh tupate a vekun mi ²⁰ zong hon tonpih uhi. Tua baan ah, tempul sawltawl mi 220 hon tonpih uhi. Amaute bel Levite huh dinga David leh a uliante’n a na sehte ahi uhi. Amaute a min minun minkhumna ah minkhum ahi uhi.

²¹ I Pathian’ maia ka ki-ngaihniam theih nading uleh, ka tu ka tate utawh ka neih ka lam khempeuh utawh bittaka ka zinsuak theih nading ua ka thuum theih nadingin, tua Ahava Tuilam kiang ah anngolh ding ka phuang hi. ²² Lampi-a melmate apan hon veng ding kumpipa kianga sepaihte leh sakoltungtuangte nget ding ka zum hi. Ahang bel, koute’n kumpipa kianga ka Pathian uh’ mai zong peuhmahte tunga a hehpihna khut om a, amah taisante tunga bel a hehna om hi, ka na chihkhit man uh ahi. ²³ Tuachi-in, an ka ngawl uh a, hiai thu tawh kisaiin ka Pathian uh kiang ah ngetna ka bawl uh a, ama’n ka thuumna uh hon dawng hi.

²⁴ Tua khitin siampi makaite

lak apan sawmlehnih, Sherebia, Hashabia leh a sanggamte uh sawm khat tawh, ka sepkhia a, ²⁵ i Pathian’ inn adinga kumpipa, amah thuhilh mite, a uliante leh tua laia om Israelte khempeuh in a piak uh kham leh ngun leh thildangte, tua ka mi sehkhiakte puak dingin ka buukkhia hi. ²⁶ Ka buukkhiak ngun sik talen 650, ngun sika bawl vante talen 100 -a gik, khamsik talen 100, ²⁷ khama bawl belkuang 20, darik ^[a] 1,000 man, sumsan nawtteta kibawl kham banga manpha tuium belsuan nih ahi.

²⁸ Amaute kiang ah: Noute leh hiai tuium belsuante Tangtawn Toupa’ adinga sehtuam siangthou na hi uh ahi. Ngunte leh khamte, Tangtawn Toupa, i pu i pate’ Pathian’ maia ut thillat ahi. ²⁹ Jerusalema Tangtawn Toupa inn-a inndante sunga siampi makaite leh Levite leh Israel inkuana lutangte’ maia na buukkhiak mateng uh pilvangtakin hiaite kembit un, ka chi hi. ³⁰ Tua khitin, siampite leh Levite’n Jerusalema Pathian’ inn adinga ngun leh kham leh tuium belsuan siangthou kibuukkhete a sang uhi.

³¹ A kha khatna, a ni sawmlenih ni-in, Jerusalem zuan dingin Ahava Tuilam apan ka kipankhia uhi. I Pathian’ khut ka tung uah a om a, lampi ah, melmate leh gutate

khut apan ama’n hon humbit hi. ³² Tua-chi-in, Jerusalem ka tung uh a, tua ah ni thum sung ka tawlnga uhi.

³³ A ni li ni-in i Pathian’ inn sung ah ngun leh kham leh tuium belsuan siangthoute, siampi Uria’ tapa Meremoth khut ah ka pia uhi. Amah kiang ah Fineha’ tapa Eleazar a om a, Levite, Jeshua’ tapa Jozabad leh Binui’ tapa Noadia zong a om uhi. ³⁴ Bangkim a tam dan leh a gik dan a kisim sipsip a, a gikdan tua hun mahin laibu ah a kichiamteh hi.

³⁵ Tua khitin, saltanna apan hong kik tua saltangte’n Israel Pathian’ mai ah haltum thillatte a laan uhi. Israel mi khempeuh adinga bawngtal sawmlenih, khelhna thoihna thillat dingin belamtal 96, belamnoupa 77 leh keltal sawmlenih a kilaan a, a vekin Tangtawn Toupa’ maia haltum thillat ahi.

³⁶ Tua khitin, kumpipa’ gam ukte leh Luipi gala ukpipate’ khut ah kumpipa’ thupiakte a pekhia uhi. Amaute’n Pathian’ mite leh Pathian’ inn lam a huh uhi.