Ezra 4

Paite Bible

Tempul Lamthak Dalna

4 SALTANGA pimanga omte’n Tangtawn Toupa, Israel Pathian’ tempul a lam uh chih Judah leh Benjamin’ melmate’n a zak takun, ² Zerubabel kiang leh tua innkuan lutangte kiang ah hong pai uh a: Hiai san hon tun Asuria kumpipa Esarhadon hun laia pan noute’ Pathian zong a, a maia kithoihnate lan sam ka hih manun, koute’n zong inn hon lampih n’ung, a chi uhi.

³ Ahihhangin, Zerubabel, Jeshua leh Israel inkuan lutangte’n a dawng uh a: Koute’ Pathian ading tempul lam dingin koute lak ah

tan na nei kei uhi. Kumpipa Kura, tua Persia kumpipa’n koute thu hon piak bangin, Tangtawn Toupa, Israel Pathian adingin koute

kiain tempul ka lam ding uhi, a chi uhi.

⁴ Tua khitin, a kim a kiang ua mite’n Judah mite lungkiaksak sawmin a kipan uh a, inn lam zom ding a lausak uhi. ⁵ Persia kumpipa Kura’ vaihawm sung teng leh Persia kumpipa Daria’ vaihawm dong tua mite’n amaute’ thil sawm dou a, lawhsamsak dingin thuhilh mite a guai uhi.

Ahasuera’ Vaihawm laia Douna

⁶ Ahasuera ^[a] vaihawm kum a kipat chil laiin Judah gama teengte leh Jerusalema teengte hekna lai amah kiang ah a gelh uhi.

Arteksersa’ Vaihawm laia Douna

⁷ Persia kumpipa Arteksersa’ vaihawm laiin zong Bishlam, Mithredath, Tabeel leh a seppih dangte khempeuh in Arteksersa kiang ah hekna lai a gelh uhi. Tua lai bel Aram pauin Aram laimalin a kigelh hi.

⁸ Sepaih makai Rehum leh laigelhpa Shimshai in kumpipa Arteksersa kiang ah Jerusalem hekna lai a gelh uh a:

⁹ Amaute bel, sepaih makai Rehum leh laigelhpa Shimshai leh a seppihte uh— Tripolis, Persia, Erek leh Babulon leh Susa khawpi-a Elamte ¹⁰ leh mi thupi leh zahtakhuai Ashurbanipal in a hawlkhiak Samaria khawpi leh Luipi gal gam khawnga teengte tunga vaihawm-mite leh unliante ahi uh.

¹¹ Arteksersa kianga a laigelh uh kawpi hiai ahi: Kumpipa Arteksersa kiang ah kou na silate, Luipi gal gama teengte’n lai kon gelh uhi.

¹² Nang apan hong paitou Judate Jerusalem ah a paitou uh a, tua khawpi gilou leh helhat a lamthak uh, chih na thei lechin ka chi uhi. Kulhbaangte a lam thak uh a, a suangphumte a puahpha uhi.

¹³ Tua baan ah, hiai khawpi a kilamthak a, kulhbaangte a kilamkhit leh, leimante, siahte, zuaksum mante, a pe kei ding uh a, kumpipa’ summuhna a kiam ding chih na thei in. ¹⁴ Koute’n kumpi’ innpi apan huhna ngah ka hih manun, kumpipa’n zahlakna a tuah ka muh ding uh koute adingin kilawm lou hi. Tua banga mi hon sawl a, hiai thu hon theisak hi ung. ¹⁵ Na pu na pate’ thillui koihkhawmna-a Laibute apan kizong leh hiai khawpi helhat hi a, tanglai apan kumpite leh gam sehkhente adinga buaihuai leh

helna kipatna mun a hih lam kimu ding hi. Tua hang maha hiai

khawpi hihsiat na hita ahi. ¹⁶ Hiai khawpi kilam thakin a kulhbaangte kipuahpha thak peuhmah leh, Luipi gal gam peuhmah ah thu na nei

zou kei ding chih kon hilh uhi, a chi uhi.

¹⁷ Kumpipa’n hiai dawnna a khak hi:

Sepaih makai lian Rehum, laigelhpa Shimshai leh a seppih dangte uh, Samaria leh Luipi gala teengte khempeuh kiang ah lai kon gelh hi.

Chibai!

¹⁸ Noute’n non laikhak uh ka mai ah a kisim a, kei pauin a kilet khia a, ka za hi. ¹⁹ Thupiak ka pia a, a kizon zon leh, tuma lamin kumpipate’ douin hiai khawpi a pang a, helna leh kituamhuina kipatna ahi chih a kimu hi. ²⁰ Jerusalem in kumpi hattakte a nanei a, Luipi gal gam khempeuh a na uk uh a, leimante, siahte leh zuaksum mante a na dong uhi. ²¹ Tuin, hiai mite nasep tawp dingin thu pia un. Thu ka piak masiah hiai khawpi kilam kei hen. ²² Hiai thu limsak louha koihlou dingin pilvang un. Kumpi’ makhua siatsak ding lauhuaina banghanga tung semsem ding ahia? a chi hi.

²³ Kumpipa Arteksersa’ laikhak kawpi pen Rehum leh laigelhpa Shimshai leh a seppihte kianga a kisim takin, Judate dal ding leh thagum zanga nasep tawpsak dingin Jerusalem ah a kuantou pah uhi.

²⁴ Tua bangin Persia kumpipa Daria’ vaihawm kum, a kum

nihna chiang dong Jerusalema Pathian’ inn lam a khawl dideta

mai hi.