Ezekiel 36

Paite Bible

Israel Mualte kianga Genkholhna

36 MIHING’ tapa, Israel mualte kiang ah genkholhna gen inla, amaute kiang ah: Israel mualte aw, Tangtawn Toupa’ thu za un. ² Toupa Tangtawn Pathian’ thugen hiai ahi: Melma in na kiang ah: Ka chita ve! Tanglai mualsangte eite’ tan hong hita, chi ahi, chi in. ³ Tua bang ahih manin, genkholhna gen inla: Toupa Tangtawn Pathian’ thugen hiai ahi: Amaute’n na kimkota hon hihsia a, sabeta hon bet man ua, namdangte’ luah hong hi chin a, mite’n a sia sia-a hon gen uh a, hon minsesak uhi. ⁴ Tua hangin, Israel mualte aw, Toupa Tangtawn Pathian’ thugen za un. Mualte, tangte, luikuamte leh phaizangte kiang leh, a kisesa munte leh, na kim na kianga namte’ suam leh nuihsan khawpi loihsate kianga Toupa Tangtawn Pathian thugen hiai ahi. ⁵ Tua bang ahih mana, Toupa’n Tangawn Pathian in mei banga kuang a, namdangte leh Edom khempeuh dema thu genta ka hi. Ahang bel, amaute’n a lungtang ua kipahna leh, a sia deihsakna tawh ka gama gantatna loupa munte a tan theih nading ua, ka gam amau adinga bawl uh hiven, chi ahi, chi in. ⁶ Tua ahih manin, Israel gam tawh kisaiin genkholhna gen inla, mualte leh tangte tung ah, luikuamte leh phaizangte kiang ah: Toupa Tangtawn Pathian’ thugen hiai ahi: Noute’n namte’ simmawhna na thuak manun, ka thikthusiatna thangpaihna hangin thu ka genta. ⁷ Tua bang ahih manin, hiai Toupa Tangtawn Pathian’ thugen ahi: Na kim na kiang ua namte’n zong simmawhna a thuak ding uh, chi-in baanzaakin ka kichiamta.

⁸ Ahihhangin, Israel mualte aw, ka mi Israelte adingin kahiangte leh gah na suah ding uhi. Ahang bel, inn-a hong pai pah ding hi ve-un. ⁹ Noute kon awlmawh a, deihsakna tawh kon en ding a, na lei a kilet ding a, hai a kipawi ding a, ¹⁰ tua chiangin, na tung ah mite ka pungsak ding, amaute Israel inkawte mah ahi uhi. Khawpite a kiluah ding a, a kisesate a kilamthak ding hi. ¹¹ Na kiang ah mihingte leh gantate ka pungsak ding a, a chipha ding uh a, hong tam ding uhi. Nidang laia bangin na tung ah mite ka teengsak ding a, a malam sangin kon lawhchingsak zaw ding hi. Tua hun chiangin, kei, Tangtawn Toupa ka hi, chih na thei ding uhi. ¹² Mite, tua ka mi Israelte na tung ah ka paisak ding. Nang hon luah ding uh a, nang, a goutan uh na hi ding. A tate uh na lakmangsak ngei nawn kei ding.

¹³ Toupa Tangtawn Pathian’ thugen hiai ahi: Mite’n na kianga: Noute’n mite na negai uh a, na minam uh tabeiin na koihsak uh, hon chih manun, ¹⁴ mite lah na negai nawn kei ding uh a, na minam uh lah suan leh khak beiin na koih nawn kei ding, chi-a Toupa Tangtawn Pathian in phuang ahi. ¹⁵ Namte’ totna kon zasak nawn kei ding a, namte’ simmawhna lah na thuak nawn kei ding uh a, na minam uh lah ka puksak nawn kei ding, chi-a Toupa Tangtawn Pathian in phuang ahi, chi ahi, chi in, a chi hi.

¹⁶ Tangtawn Toupa’ thu ka kiang ah hong tung kik a, ¹⁷ ama’n: Mihing’ tapa, Israelte amau gam sunga a teen laiun, a gamtatna uleh a thilhihteun gam a buahsak uhi. A gamtatna uh ka mitmuhin numei sinei banga niin ahi. ¹⁸ Tuachi-in, amaute’n gamsunga sisan a suah man uleh, a milimte ua a buahsak manun, amaute tung ah ka thangpaihna ka sungbua hi. ¹⁹ Namte lak ah amaute ka dalhsak a, gamte lak ah a kithehzak uhi. Amaute’ gamtatna leh thilhihte bangin amaute tung ah thukhenna gawtna ka tun hi. ²⁰ Namte lak a tunna peuh uah, ka min siangthou a niinsak uhi. Ahang bel, amaute tawh kisaia: Hiaite Tangtawn Toupa’ mite hi uh a, hinapi-a hiai gam a nutsiat louh theihlouh uh hita, kichi hi. ²¹ Namte laka a paina ua, Israel inkawte’n a nitsak uh ka min siangthou gum ka hi.

²² Tua bang ahih manin, Israel innkawte kiang ah: Toupa Tangtawn Pathian’ thugen hiai ahi: Israel innkawte aw, hiai thil ka hih dingte, noute vang ahi kei a, na tenna uh namte laka na hihnit uh ka min siangthou vang ahi zaw. ²³ Namte laka kihihniin, noute’n namte laka na hihnit uh ka min thupi a sianthouna ka ensak ding. Tuachi-a namte’ mitmuha, noute’ tungtawna a siangthoua ka kietsak chiangin, kei, Tangtawn Toupa ka hi, chih tua namte’n a thei ding uh, chi-a Toupa Tangtawn Pathian in phuang ahi, chi ahi.

²⁴ Ahang bel, ke’n namte lak apan noute hon lakhe ding ing a, gamte khempeuh apan hon kaikhawm ding ing a, noumau’ gam sung hon tunkik ding hi vengin. ²⁵ Na tung ua tuisiang hon theh ding ing a, siang ding na hi uh. Na sianlouhna khempeuh uleh, na milimte khempeuh uapan hon siangsak ding ka hi. ²⁶ Noute sunga lungtang thak koih ding ing a, noute sunga kha thak koih ding ka hi. Noute sung apan suang banga taak na lungtang uh paikhe ding ing a, sa lungtang hon pe ding ka hi. ²⁷ Noute sunga ka Kha koih ding ing a, ka danthusehte hon zuisak ding, ka danpiakte kem dinga hon pilvangsak ding ka hi. ²⁸ Na pu na pate uh kianga ka piak gama teeng ding uchin a, noute ka mite hi ding, kei na Pathian uh hi ding ka hi. ²⁹ Na sianlouhnate khempeuh ua-pan hon hondam ding ing a, buh leh bal piangsak ding, kichingsak ding, na tung ua kial tungsak lou ding ka hi. ³⁰ Kialpi hanga namte laka na maimawk nawn louh nading ua, singgahte leh loua haigahte pungsak ding ka hi. ³¹ Tua hun chiangin, na gamtatna giloute uh, na thilhih giloute uh theigige ding uchin a, na khelhnate uleh a kihhuai mahmah na thilhihte uh hanga kikih ding na hi uh. ³² Noute vanga hiai thilte hih ding ka hi kei, chih na theih uh ka deih, chi-a Toupa Tangtawn Pathian in phuang ahi. Israel inkawte aw, na gamtatna uh hangin maizumin zahlak un! chi ahi.

³³ Toupa Tangtawn Pathian’ thugen hiai ahi: Na khelhnate khempeuh uapan kon siansak ni chiangin, na khawpite uh ka kiluahsak kik ding a, a sesate khempeuh a kilamthak ding. ³⁴ Gam kilawisa, a tawnkhate khempeuh’ mitmuha sesa hi nawnlouin, ka kiletthaksak ding. ³⁵ Amaute’n: Hiai gam sesa, Eden huan hong bangta a, khawpi sesa, a kilawisa leh hihsiatsate tu’n kulhin kium a, kiluahta, a chi ding uhi. ³⁶ Tua hun chiangin, na kim na pam ua omlai namte’n, kei, Tangtawn Toupa’n a kihihsesate ka lamthak a, gamdai-gamkeu ka niimsak dimdem nawnta, chih a thei ding uh. Kei, Tangtawn Toupa’n ka genkhinta a, ka hih ding, a chi hi.

³⁷ Toupa Tangtawn Pathian’ thugen hiai ahi: Israel innkawte’ thuumna leh ngetna khatvei ka sang lai ding a, amaute adingin hiai ka hihsak ding: A mite uh, belamte bangin ka tamsak ding a, ³⁸ sehsa ankuanglui laia Jerusalem khua-a thillat siangthou ding belamhonte bangin ka tamsak ding. Tuachi-in, khawpi kisesate mihontein a dim ding. Tua hun chiangin, kei, Tangtawn Toupa ka hi, chih a thei ding uh, chi ahi, chi in, a chi hi.