Ezekiel 35

Paite Bible

Edom Mawhsakna Genkholhna

35 TUA baan ah, Tangtawn Toupa’ thu ka kiang ah hong tung a, ² ama’n: Mihing tapa, Seir mual mawhsain ensal inla, amaute mawhsain genkholhna gen inla, ³ amaute kiang ah: Toupa Tangtawn Pathian’ thugen hiai ahi: Nang, Seir mual kon dou ahi. Nang douin ka khut ka liik ding a, a kisia leh loihin kon bawl ding. ⁴ Na khawpite a sia ka suaksak ding a, a kisia leh loih na hi ding. Tua hun chiangin, kei Tangtawn Toupa ka hi, chih na thei ding.

⁵ Tanglai kisiat kihoutheihlouhna nei lailai a, Israel a tuahsiat ua, amaute gawtna in a tawpkhawk a tun huna, namsaua thah dinga na piakkhiak manin, ⁶ ka hinna sialin ka gen ahi, chi-a Toupa Tangtawn Pathian in phuang ahi. Sisan suahna ah kon pekhe ding a, tua in nang hon nungzuih ding. Sisan suahna haw lou na hih manin, sisan suahna in nang hon nungzuih ding. ⁷ Seir Mual a kisia leh a kilawi ka suaksak ding a, tua-a hong lut leh pawtte khempeuh, tua apan ka satkhe ding. ⁸ Na mualte thahsa siluangtein ka dimsak ding a, namsaua thahte, na mual tung ahte, na luiphai ahte, leh mualkal guamte khempeuh ah ka dimsak ding. ⁹ A sedenin kon bawl ding a, na khawpite a kiluahkik kei ding. Tua hun chiangin, kei, Tangtawn Toupa ka hi, chih na thei ding.

¹⁰ Kei Tangtawn Toupa tua-a om hinapi-in, nang: Hiai nam nihte leh gam nihte, eite-a hiven i luah ke, na chih manin, ¹¹ ka hinna sialin ka gen ahi, chi-a Toupa Tangtawn Pathian in gen ahi. Amaute na muhdahna hanga na hehna leh, hazatna na latsak bangbangin noute kon sai ding a, na tunga thu ka khen chiangin, amaute lak ah ka kitheisak ding. ¹² Tua hun chiangin, kei, Tangtawn Toupa’n Israel mualte dema thil kihhuai na gente khempeuh ka zata, chih na thei ding. Nang: Amaute hihsiat hita, nekgaih dinga eite’ khuta piakkhiak hita uh, na chi hi. ¹³ Ka tung ah na kiuangsak a, kidaam lou hialin kei demin thu tampi na gen a, ka za hi. ¹⁴ Toupa Tangtawn Pathian’ thugen hiai ahi: Leitung khempeuh lung nuama a kipah laitakin, nang a kisia leh a kilawi kon suaksak ding. ¹⁵ Israel inkawte’ goutan hihsiat leh loih ahih laitaka, nang lungnuama na kipah manin, tua bang mah ahi nang kon bawl ding dan. Seir Mual aw, nang leh Edom khempeuh hihsiat leh loiha om ding na hi uh. Tua hun chiangin, kei, Tangtawn Toupa ka hi, chih na thei ding, chi ahi, chi in, a chi hi.