2 Kumpipate 1

Paite Bible

Ahazia tunga Gawtna

1 AHAB’ sih nungin, Israel tung ah Moab a hel hi. ² Tua hun laiin, Ahazia bel Samaria-a

a inndan tungnung vathangkalh awnga kia, liamin a na omkhin hi. Tua bang ahih manin, mi a sawl a, a misawlte kiang ah: Pai unla, hiai liamma apan ka damzou nading hiam, chih Ekronte’ pathian Baal Zebub va dong un, a chi hi.

³ Ahihhangin, Tangtawn Toupa’ vansawltak in Tishbe mi Elija kiang ah: Paitou inla, Samaria kumpipa’ misawlte vatuak inla, amaute kiang ah: Israela Pathian a om louh mana Ekronte’ pathian Baal Zebub thu dong dinga kuan na hi uhia? ⁴ Tua bang a hih manin, Ahazia kianga Tangtawn Toupa’ thu gen hiai ahi. Ama’n: Tu-a na lupna nuse nawn lou ding na hi. Si ngeingei ding na hi! chi ahi, chi in, a chi hi. Tua chi-in, Elija a kuantou hi.

⁵ Misawlte, kumpipa kiang hong tunkik takun, ama’n amaute kiang ah: Banghanga hong kileh pah na hi ua? a chi hi.

⁶ Amaute’n a dawng uh a: Mi khat, koute tuak dingin hong pai a, ama’n: Noute hon sawlpa kumpipa kiang ah paikik unla, amah kiang ah: Hiai Tangtawn Toupa’ thugen ahi. Ama’n: Israela Pathian a om louh mana Ekronte’ pathian Baal Zebub thu dong dinga kuan na hi uhia? Tua bang a hih manin, tu-a na lupna nuse nawn lou ding na hi. Si ngeingei ding na hi! chi ahi, a chi, a chi uhi.

⁷ Kumpipa’n: Noute hon tuak dinga hong pai a, hiai thu hon hilh, mi bangchi ahia? chi-in a dong hi.

⁸ Amaute’n a dawng uh a: Amah samulpuan silh, savuna a kawng gak mi khat ahi, a chi uhi.

Kumpipa’n: Tua pa, Tishbe mi Elija ahi ve, a chi hi.

⁹ Tua khitin, ama’n sepaih kepten khat, a mite 50 tawh Elija kiang ah a sawl hi. Tua kepten in mual tunga tu Elija a va naih a: Nang, Pathian’ mi aw, kumpipa’n: Hong hawhsuk in, chi ahi, a chi hi.

¹⁰ Elija in keptenpa a dawng a: Kei Pathian’ mi ka hih taktak leh, vaan apanin mei hong kesuk henla, nang leh na mi 50 -te hon kangtum hen! a chi hi. Tuachi-in, vaan apan mei hong kesuk a, tua kepten leh a mite a kangtum hi.

¹¹ Hiai a theih takin, kumpipa’n Elija kiang ah, kepten dang khat, a mite 50 -te tawh a sawl thak hi. Tua kepten in Elija kiang ah: Nang, Pathian’ mi aw, kumpipa’n: Hong hawhsuk in, chi ahi, a chi hi.

¹² Elija in a dawng a: Kei Pathian’ mi ka hih taktak leh, vaan apanin mei hong kesuk henla, nang leh na mi 50 -te hon kangtum hen! a chi hi. Tuachi-in, vaan apanin mei hong kesuk a, amah leh a mi 50 -te a kangtum hi.

¹³ Tua baan ah, kumpipa’n kepten thumna leh a mite 50 -te a sawl thak leuleu hi. Hiai kepten thumna a kuantou a, Elija mai ah a bok a: Nang, Pathian’ mi aw, ka hinna leh na sila hiai mi 50 -te’ hinna hehpihtakin na mitmuhin manpha sakin aw! ¹⁴ Ngai in, van apana mei hong kesuk in kepten masa nihte leh amaute’ mite khempeuh a kangtum hi. Ahihhangin, kei hinna na mitmuhin manpha sa in aw! chi-in a ngen ngutngut hi.

¹⁵ Tua Tangtawn Toupa’ van-sawltak in Elija kiang ah: Amah zuisuk in. Amah lau ken, a chi hi. Tuachi-in, Elija a dingkhia a, kumpipa kiang ah tua kepten a zuisuk hi.

¹⁶ Elija in kumpipa kiang ah: Hiai Tangtawn Toupa’ thugen ahi. Ama’n: Israel-a Pathian om lou chi-a Ekronte’ pathian Baal Zebub thu dong dinga mi sawl na hi hia? Hiai na hih manin, tu-a na lupna nuse ngei nawn lou ding na hi. Si ngeingei ding na hi, chi ahi, a chi hi. ¹⁷ Tangtawn Toupa’n Elija kama a gen bangin, Ahazia a sita hi.

Ahazia in tapa a neih louh manin, Jehoshafat’ tapa Jehoram, Judah kumpipa-a a pan kum, a kum nihna ah, Joram in Ahazia’ mun luahin kumpipain a pang hi. ¹⁸ Ahazia’ vaihawm sunga thiltung dangte, a thilhihte ahih leh, Israel kumpite’ tungthu kigelhna laibu sunga kigelh hilou hia?