2 Khangtangthubute 34

Paite Bible

Josia’ Puahphatte^(A)

34 JOSIA, kumpipa-a hong pan chilin kum giata upa ahi a, Jerusalem ah kum 31 sung vai a hawm hi. ² Ama’n Tangtawn Toupa’ mitmuhin thildik a hih a, a pa David’ lampite khempeuh a tawn a, veilam hiam taklam hiam ah zong a pialsan kei hi.

³ A vaihawm kum, a kum giatna ah, tuailai a hih laiin, a pa David’ Pathian a zong pan a, a kum sawm leh nihna ah Judah leh Jerusalem apanin munsangte, Ashera songte, khuakthawh milimte leh sunthawh milimte a paikhia hi. ⁴ Ama’ thu-hilhna nuai ah, Baalte’ maitamte a kilaichim a, tuate tunga om gimnamtui halna maitamte a satnen a, ama’n Ashera songte, milimte leh limte a satzan hi. Hiaite a satzan a, tua a nente, hiaite’ maia kithoihna laante’ hantung ah a theh hi. ⁵ Ama’n siampite’ guhte, amau’ maitamte tung ah a hal a, tua bangin Judah leh Jerusalem a hahsiang hi. ⁶ Manase, Efraim leh Simeon khawpite ah, Naftali dongin leh tuate’ kim leh kianga khawpi sesate-a ⁷ maitamte leh Ashera songte a laipai a, milimte a gawivui a, Israel gam sung tenga gimnamtui halna maitamte a satzan vek hi. Tua khitin Jerusalem ah a kilehkikta hi.

⁸ Josia’ vaihawm kum, a kum sawmlegiatna ah, gam sung leh tempul hihsiang dingin Azalia’ tapa Shafan leh khawpi ukpa Maaseia a sawl a, amaute tawh kitonin Tangtawn Toupa, a Pathian’ tempul puahpha dingin Joahaz’ tapa Joa, laibu-a thil chiamtehpa, a sawl hi.

⁹ Amaute, siampilian Hilkia kiang ah a hawh uh a, Pathian’ tempula hong kitawilut sumte a pia uhi. Tua sumte bel kongkhak venga pang Levite’n Manasete, Efraimte leh Israel mi khawsuak sunte leh Judah leh Benjamin mite khempeuh leh Jerusalema teengte apan a donkhiak uh ahi. Hiai mite’n tempul puahpha-a bawlthak nasemte a pia uhi. ¹⁰ Tua khitin, Tangtawn Toupa’ tempul puahpha-a nasep enkai dinga seh mite khut ah tua a kemsak uhi. ¹¹ Amaute’n sing nasemte leh innlamte kiang ah zong suangseksa leh singzawlte a lian a neu lei nading sum a pia uhi. Tua van leite bel, Judah kumpipate’n a siat ding a na phal uh, tua innte lamthak nading ahi.

¹² Mipite’n muanhuaitakin nna a sem uh a, amaute uk a, makaih dingin Merari’ suan Levite Johath leh Obadia, tua chiangin, Kohath’ suan Levite Zekharia leh Meshulam a pang uhi. Tumging lam siam chiat Levite bel, ¹³ khut nasemte tunga mawhpua in a pang uh a, nna tuamtuam semte ukin a enkai uhi. Levite pawlkhat leuleu lah, laigelh mi, dan sinsakmi leh kongkhak veengin a pang uhi.

Dan Laibu Kimukhia^(B)

¹⁴ Tangtawn Toupa’ tempula kikoihlut sumte a lakkhiak laiun, siampi Hilkia in Tangtawn Toupa’ Dan Laibu, Mosi tungtawna kipia, a mukhia hi. ¹⁵ Hilkia in laigelhpa Shafan kiang ah: Tangtawn Toupa’ tempul sung ah Dan Laibu ka mukheta, a chi a, a kiang ah a pia hi.

¹⁶ Tuachi-in, Shafan in tua laibu kumpipa kiang ah a va tawi a, a kiang ah: Na uliante’n amau sep dinga kipete peuhmah a sem uhi. ¹⁷ Tangtawn Toupa’ tempula om sumte a pekhia uh a, nasemte tunga mawhpawte leh nasemte a kemsak uhi, a chi hi. ¹⁸ Tua khitin, laigelhpa Shafan in kumpipa kiang ah: Siampi Hilkia in laibu khat kei hon pia, chi-in, a hilh a, kumpipa’ mai ah tua laibu apan a sim hi.

¹⁹ Kumpipa’n tua Dan thute a zak takin, a puansilhte a botkek hi. ²⁰ Kumpipa’n Hilkia, Shafan’ tapa Ahikam, Mika’ tapa Abdon ^[a] , laigelhpa Shafan leh kumpipa’ sawltawl Asaia thu a pia a: ²¹ Kuan unla, kei adingin leh Israel leh Judah khawsuaksunte adingin, hiai laibu kimukhia sunga kigelh tawh kisai, Tangtawn Toupa hon dotsak un. I pu i pate’n Tangtawn Toupa’ thu a man louh man ua, Tangtawn Toupa’ hehna eite tunga kisungbua thupi lua hi. Amaute, hiai laibu sunga kigelh banga na gamta lou uh hi, chi-in thu a pia hi.

²² Hilkia leh amah tawh tona kumpipa’ sawlte kamsangnu Hulda houpih dingin a kuan uhi. Hulda

bel Shalum’ zi ahi a, Shalum bel Tokhat’ ^[b] tapa ahi a, Tokhath lah Hasra’ tapa ahi. Hasra bel puankoihna kempa ahi. Hulda ahih leh, Jerusalema Bial ^[c] sehkhen Nihna-a teeng ahi.

²³ Hulda in amaute kiang ah: Hiai Tangtawn Toupa, Israel’ Pathian’ thugen ahi. Noute ka kianga hon sawlpa kiang ah hilh un, ²⁴ hiai Tangtawn Toupa thugen ahi. Ama’n: Hiai mun leh a mite tunga siatna tun ding ka hi. Judah kumpipa’ maia kisim laibu sunga kigelh hamsiate khempeuh tun ding ka hi. ²⁵ Kei hon taisan a, pathian dangte’ maia gimnamtui hal a, amau’ khuta a bawlte khempeuh uh zanga hon hehsak manun, ka hehna hiai muna sunbuaka om ding a kiphelh mit zoukei ding hi, chi ahi. ²⁶ Tangtawn Toupa thu dong dinga noute hon sawlpa, Judah kumpipa hilh un. Hiai Tangtawn Toupa, Israel’ Pathian in na thuzakte uh tawh kisaia a thugen ahi. ²⁷ Ama’n: Na lungtang in thu ngaikhe nuam a, hiai mun leh a mite doua a thugen na zak laia, Pathian’ maia na kingaihniam manin, leh ka maia kingainiama na puanakpi na bawhkek a, ka maia na kah manin, kon zata hi, chi-in Tangtawn Toupa’n phuang hi. ²⁸ Tua bang ahih manin, na pu na pate kiang ah kon la ding a, khamuangtaka vui in na om ding. Hiai mun leh hiaia teengte tunga ka tunsak ding siatna na mit in a mu kei ding, chi ahi, a chi hi.

Tuachi-in, Hulda’ dawnna, kumpipa kiang ah a tunkikta uhi.

²⁹ Tua khitin, kumpipa’n Judah leh Jerusalem upate khempeuh a samkhawm hi. ³⁰ Amah, Judah mite, Jerusalem mite, siampite leh Levite mi khempeuh a neupen apan a thupipen dong tawh, Tangtawn Toupa’ tempul ah a hawhtou hi. Tangtawn Toupa’ tempula kimukhia Thukhun Laibu-a thute khempeuh amaute’ zakin a sim hi. ³¹ Kumpipa bel ama’ mun ah a ding a, Tangtawn Toupa’ mai ah tua Thukhun a thaksak a, a lungtang khempeuh leh a hinna khempeuh tawh Tangtawn Toupa zui ding, a thupiakte, dante leh danthusehte zui ding leh hiai laibu-a kigelh thukhun thute mang dingin thukhun a thaksak hi.

³² Tua khitin, Jerusalem leh Benjamin gama mi peuhmah hiai thukhun zui dingin a kichiamsak a, Jerusalem mite’n Pathian, a pu a pate uh’ Pathian’ thukhun bangin hiai a hihta uhi.

³³ Josia in Israelte’ neih gam khempeuh apan milim kihhuaite khempeuh a paimang a, Israel gama omte khempeuh, Tangtawn Toupa, a Pathian uh’ nna a semsakta hi. Josia a dam sung teng, amaute’n Tangtawn Toupa, a pu a pate uh’ Pathian a zui khial kei uhi.