1 Samuel 26

Paite Bible

David in Saul’ Hinna Hawisak Lai

26 ZIFTE Gibea ah Saul kiang ah a va hawh uh a, amah kiang ah: Jeshimon gala Hakila muala David kisel hilou maw? a chi uhi.

² Tuachi-in, Saul, Zif Gamdai-gamkeu ah a teelkhiak tuam Israel mi 3,000 tawh David zong dingin a kuansuk hi. ³ Saul in tua Jeshimon gala Hakila muala lampi kiang ah giahphual a sat a, ahihhangin, David bel gamdai-gamkeu ah a om hi. Saul in amah gamdai-gamkeu ah a zui chih a muhtakin, ⁴ enkhete a sawl a, tua ah Saul hong tung taktak chih a theita hi.

⁵ Tua khitin, David a kipankhia a, Saul in giahphual a satna mun ah a hawh a, Saul leh a sepaihhon makailian Abner’ lupna mun a mu hi. Saul bel giahphual laizang ah a lum a, a sepaihhonte a kimkot ah a giak uhi.

⁶ David in Hit mi Ahimelekh

leh Joab’ sanggampa Zeruia’ tapa Abishai kiang ah: Giahphual sunga Saul kianga kua’n hon zuisuk ding ahia? a chi hi.

Abishai in: Ke’n kon zuisuk ding, a chi hi.

⁷ Tuachi-in, David leh Abishai, tua mihonte kiang ah zanin a hawhsuk uh a, ngai in, Saul bel giahphual laizanga, a lukhunga a teipi leilaka siattalsa-a ihmuin a om hi. Abner leh sepaihte a kimkot ah ihmuin a om uhi.

⁸ Abishai in David kiang ah: Tuni’n Pathian in na melmapa na khut sunga hon pia ahi. Ka teipi-in amah lei tawh ka kilhdensuk aw. Nihvei ka sut kul lou ding ahi, a chi hi.

⁹ Ahihhangin, David in Abishai kiang ah: Amah hihmangthang ken! Kua ahia Tangtawn Toupa’ thaunilh mi tunga khut kha a, mawhneilou hi thei ding? ¹⁰ Tangtawn Toupa’ hinna louin ka gen hi: Tangtawn Toupa’n tua bang mi tunga khut kha teitei ding ahi. Saul ama’ hun hong tung a, si hiam, ahih kei leh kidouna-a kuana mangthang hiam hi ding ahi. ¹¹ Ke’n Tangtawn Toupa’ thaunilh mi tung ah khut ka kha kei hial ding. A lukhunga teipi leh tuithawl la inla, pai ni, a chi hi.

¹² Tuachi-in, David in Saul’ lukhunga teipi leh tuithawl a la a, a paita uhi. Kuama’n tua a mu kei a, theih zong a thei kei a, kuamah lah a khanglou a om het kei hi. Tangtawn Toupa’n amaute ihmut limtaka ihmusak ahih manin, avek-un a ihmu huthut uhi.

¹³ Tua khitin, David lehlampang ah a galkah a, gamla kuam ah mualtung khat ah a ding a, a kal uh a kigamla hi. ¹⁴ David in sepaihhon leh Ner’ tapa Abner a galsap a: Abner, nang hon dawng lou ding maw? a chi hi.

Abner in a dawng a: Kumpipa sam nang kua na hia? a chi hi.

¹⁵ David in: Nang pasal na hi keia hia? Hilou maw? Israel ah nang bang kua a oma eita? Banghanga kumpipa, na toupa veeng lou na hia? Kumpipa, na toupa hihmang¬thang dinga kua hiam khat hong pai hilou maw! ¹⁶ Na thilhih hoihlou ahi ve. Tangtawn Toupa’ min sialin ka gen ahi. Na toupa uh, Tangtawn Toupa’ thaunilh veeng lou na hih manun nang leh na mite si taak na hi ve ua. Na kiim na kiang en mah in. Kumpipa’ lukhunga a teipi leh tuithawl koia om ahia? a chi hi.

¹⁷ Saul in David’ aw a meltheih a: Ka tapa David aw, tua aw nanga ahi maw? a chi hi.

David in a dawng a: Kumpipa ka toupa aw, hi mah e, a chi hi. ¹⁸ Tua baan ah, ama’n: Banghanga ka toupa’n a silapa delh delh

ahia? Bang ka hih-a ahia, bang mawhtanna thil ka hih-a ahia? ¹⁹ Tu’n kumpipa ka toupa’n a silapa’ thugen na ngaikhia in. Tangtawn Toupa’n kei dou dinga na lungsim tokthou a hih leh, thillat khat sang hen aw? Ahihhangin, mihingte’ hon tawhthawh a hih leh bel, Tangtawn Toupa’ mai ah amaute hamsethuakin om uhen! Amaute’n Tangtawn Toupa’ goutan ka tan sam apan hon hawlmang uh a: Pai inla, pathian dangte’ nna sem in, hon chi uh hiven. ²⁰ Tu’n Tangtawn Toupa’ mai apan gamlapi ah ka sisan mal lei ah kesak hen. Mi’n mualtung khawnga vengkeng a zon bangin, Israel kumpipa hial uihik lel zong dingin hong kuanta! a chi hi.

²¹ Saul in: Ka na khialta. Ka tapa David aw, hong kiik in. Tuni-a ka hinna manpha-a na seh manin, nang hihsiat ka tum nawn kei ding. Mihai banga gamta ka hi taktak a, nakpitaka hihkhial ka hi, a chi hi.

²² David in a dawng a: Hiai kumpipa’ teipi ahi. Na mite khat hong pai henla, hong la hen. ²³ Tangtawn Toupa’n michih a thilhih diktat leh muanhuaina banga pahtakman pe—na ahi. Tangtawn Toupa’n tuni-a ka khuta nang hon pekhia a, hinapi—a ke’n Tangtawn Toupa’ thaunilh mi tunga khut kha nuamlou ka hi. ²⁴ Tuni-a ka hinna manpha-a hon sehsak a, buaina khempeuh apan ka hinna humbit ahi, a chi hi.

²⁵ Tua khitin, Saul in David kiang ah: Ka tapa David aw, vualzawlin om in. Thil thupite na hih ding a, na vualzou ngeingei ding hi, a chi hi.

Tuachi-in, David ama’ pai nading ding ah a pai a, Saul bel inn lam ah a kilehkikta hi.