1 Kumpipate 2

Paite Bible

Solomon kianga

Mawhpuakna David’ Got^(A)

2 DAVID sih hun hong nai takin, ama’n a tapa Solomon kiang ah mawhpuakna leh thuneihna a guan hi.

² Leitung mite khempeuh pai dan banga pai ding ka hita. Thahat suah inla, pasal suah inla, ³ Tangtawn Toupa, na Pathian deihlam zui in. A lampi tawn inla, a dankhunte,

a thupiakte, a thukhennate leh

a theihpihmite, Mosi Dan Laibu-a kigelh bangin zui in. Tua mah na thilhih peuhmah leh na paina peuhmaha na mavan nading ahi. ⁴ Tua baan ah, Tangtawn Toupa’n ka kianga hon chiamsa: Na suante’n a nuntak dan uh a chin hoih ua, a lungtang khempeuh uleh a hinna khempeuh utawh ka maia muanhuaitaka a gamtat uleh, Israel kumpitutphah tunga tu ding mi na tasam ngei kei ding, a chih a tangtun theih nading ahi.

⁵ Tu’n Zeruia’ tapa Joab in ka tunga a thilhih — Israel sepaihhon makaite Ner’ tapa Abner leh Jether’ tapa Amasa tunga a hih nang mahmah in na thei hi. Amaute a that a, lemna muanna om laitakin kidou lai mahbangin a sisan uh a suah a, a kawnga kawnggak leh a khea khedapte ah tua sisan a baang hi. ⁶ Na pilna bangbangin a tung ah gamtang inla, ahihhangin, a samkangpi tawh lungmuangtakin hankhuk lutsuksak ken.

⁷ Ahihhangin, Gilead mi Barzilai’ tapate tung ah chitna siamna suah inla, na dawhkana ankuang umte lak ah pangsak in. Na sanggampa Absalom apan ka taai laia, amaute’n hon huh uh ahi.

⁸ Tua baan ah, Bahurim apan Benjamin mi Gera’ tapa Shimei ompih na hi chih thei gige in. Mahanaima ka tai ni-a ama’n ka tunga hamsia khatak mai hon lawh ahi. Jordan luia kei tuak dinga hong paisuk laia Tangtawn Toupa’ min siala kichiam khin ing a: Namsauin kon that kei ding, na chi khin ka hi. ⁹ Ahihhangin, amah mawhnei lou ahi, chi-in tu’n ngaihsun ken. Nang, pilna nei mi na hi a, amah bang lawh ding hiam, chih na thei hi. A samkangpi tawh sisan kai kawmin hankhuk lutsuksak in, a chi hi.

¹⁰ Tua khitin, David a pu a pate kiang ah a khawlta a, David’ Khawpi ah vuiin a omta hi. ¹¹ Israel tung ah kum 40 sung vai a hawm a, Hebron ah kum sagih, Jerusalem ah kum 33 ahi. ¹² Tuachi-in, Solomon, a pa David kumpitutphah tung ah a tu a, a vaihawmna kiptakin a kiphutkipta hi.

Solomon’ Kumpitutphah Kipta

¹³ Hagith’ tapa Adonija bel Solomon’ nu Bathsheba kiang ah a va hawh hi. Bathsheba in: A hoihlama hong hawh na hi hia? chi-in a na dong hi.

Ama’n a dawng a: He, a hoihlam hi e. ¹⁴ Na kianga gennop khat nei ka hi, a chi hi.

Bathsheba in: Na gen thei ding, a chi hi.

¹⁵ Ama’n: Na theihsa bangin, kumpigam keia ahi. Israelte khempeuh in a kumpipa ding ua kei hon muang uh ahi. Ahihhangin, thil hong kikheng a, kumpigam ka sanggampa’n a tang hi. Ahang bel, Tangtawn Toupa’n amah pia hiven. ¹⁶ Tu-in nang apan ka nget nop khat a om, hon nial ken, a chi hi.

Bathsheba in: Gen ve, a chi hi.

¹⁷ Tuachi-in, Adonija in a gen zom zel a: Kumpipa Solomon kiang ah hon ngetsak in, ama’n hon nial lou ding ahi. Tua Shunam mi Abishag ka zi dingin hon pia hen, a chi hi.

¹⁸ Bathsheba in: Hoih mahmah e. Nang adingin kumpipa houpih ning e! a chi hi.

¹⁹ Bathsheba, Adonija adinga gensak dinga kumpipa Solomon kianga a va hawh takin, kumpipa a na ding a, a mai ah a kun a, tua khitin a kumpitutphah tung ah a tu hi. Kumpipa’ nu ading zong kumpitutphah khat a lasak a, amah kumpipa’ taklam ah a tu hi.

²⁰ Bathsheba in: Thil neuchik khat kon ngen nuam a, hon nial ken aw, a chi hi.

Kumpipa’n a dawng a: Nu aw, gen in, kon nial kei ding, a chi hi.

²¹ Tuachi-in, Bathsheba in: Na sanggampa Adonija zi dingin tua Shunam mi, Abishag piak hi hen, a chi hi.

²² Kumpipa Solomon in a nu

a dawng a: Banghanga Adonija adinga Shunam mi Abishag ngetsak na hia? Kumpigam nangawn ngetsak vanglak ve, amah ka sanggampa ahi mah ve. Ahi, amah ading, siampi Abiathar ading leh Zeruia’ tapa Joab adingin ngetsak lai ve!

a chi hi.

²³ Tua khitin, Tangtawn Toupa’ hinna sialin Solomon a kichiam a: Adonija in a thil nget hanga a hinna a taan lawh kei taak leh, Tangtawn Toupa’n kei a lawh lawh hon lawh henla, a nasezaw zong hon lawh hen! a chi hi. ²⁴ Tu’n, ka pa David kumpitutphah tunga kiptaka hon tusak a, a chiamsa bangbanga kei adinga kumpigam hon bawlsak Tangtawn Toupa’ hinna sialin ka gen ahi. Tuni’n Adonija thahin a om ngeingei ding! a chi hi. ²⁵ Tuachi-in, Kumpipa Solomon in Jehoiada’ tapa Benaia thu a pia a, ama’n Adonija tung ah khut a kha a, Adonija a si hi.

²⁶ Kumpipa’n siampi Abiathar kiang ah: Anathoth-a na loute ah kilehkik in. Si taak na hi a, ahihhangin, ka pa David’ maia Toupa Tawngtawn Pathian singkuang pua a, ka pa’ haksatna khempeuh thuakpih na hih manin, tu’n zaw kon that kei ding, a chi hi. ²⁷ Tuachi-in, Solomon in Tangtawn Toupa’ siampi hihna apan Abiathar’ a tawpsak a, Tangtawn Toupa’n Shilo-a Eli innkaw thu a tangtungsak hi.

²⁸ Joab bel Absalom tawh pangkhawm hi keimah leh Adonija tawh thil simsawmpa ahih manin, hiai thu a zak takin, Tangtawn Toupa’ puanbuk ah a tailut a, maitam kiite ah a luai hi. ²⁹ Joab, Tangtawn Toupa’ puanbuk ah a tailut a, maitam kiang ah a om chih thu Kumpipa Solomon a hilh uhi. Tua khit phetin, Solomon in Jehoiada’ tapa Benaia thu a pia a: Pai inla, ama’ tung ah khut kha in! a chi hi.

³⁰ Tuachi-in, Tangtawn Toupa’ puanbuk ah Benaia a lut a, Joab kiang ah: Kumpipa’n: Hong pawtkhia in! chi ahi, a chi hi.

Ahihhangin, ama’n a dawng a: Ii, hiah ka si zaw ding, a chi hi.

Benaia in kumpipa kiang ah hiai thu a tun a: Joab’ hon dawnna hibang ahi, a chi hi.

³¹ Kumpipa’n Benaia thu a pia a: A chih bangin hih in. Amah satlumin vui inla, Joab in mawhneilou sisan suaha a mawhna apan kei leh ka innkuan sung siangsak in. ³² Ama’n ka pa David theihlouha mi nih namsaua a thah a, sisan a suahna Tangtawn Toupa’n thuk ding hi. Tua mi tegel, Ner’ tapa Abner, Israel sepaihpawlpi makai leh Jether’ tapa Amasa, Judah sepaihpawlpi makai, amah sanga mi hoih zaw leh mi tang zaw hi uhi. ³³ Amaute’ sisan kisuahna mawhna Joab leh a suante tung ah tu den hen. Ahihhangin, David leh a suante tung ah, a innkawte leh a kumpitutphah tung ah bel, Tangtawn Toupa’ lemna muanna omdenta hen, a chi hi.

³⁴ Tuachi-in, Jehoiada’ tapa Benaia a kuantou a, Joab tung ah khut a kha a, a that a, gamdai-gamkeua ama’ gam sunga vuiin a omta hi. ³⁵ Kumpipa’n Joab mun ah Benaia, sepaihpawlpi makaiin a koih a, Abiathar zong siampi Zadok in a khengkhia hi.

³⁶ Tua khitin kumpipa’n Shimei a samsak a, a kiang ah: Jerusalem ah inn khat kilam inla, tua ah teeng in, ahihhangin, mun dang koimah ah paikhe het ken. ³⁷ Na paikhiak a, Kidron Phaizang na kaan ni ni-in na si ngeingei ding a, na sisan mawh nangma’ lutung a tu ding, chih thei in, a chi hi.

³⁸ Shimei in kumpipa a dawng

a: Na gen a hoih hi. Ka toupa, kumpipa’ gen bangin kei na silapa’n ka hih ding, a chi hi. Tua bangin Shimei, Jerusalem ah hun sawtpi a teeng hi.

³⁹ Ahihhangin, kum thum nungin Shimei’ sila nihte, Gath kumpipa, Naaka’ tapa Akhish kiang ah a taai uhi. Tua thu Shimei a hilh uh a: Na silate Gath ah a om uh, a chi uhi. ⁴⁰ Hiai a zak takin Shimei in a sabiltung tung ah a tuanphah a phah a, a silate zong dingin Gad-a Akhish kiang ah a va hawh hi. Tua bangin, Shimei a kuankhia a, Gath apanin a silate a piikik hi.

⁴¹ Shimei, Jerusalem apan Gath ah a hawh a, a hong tungkik nawnta, chih Solomon a hilh takun, ⁴² kumpipa’n Shimei a sam a, a kiang ah: Mun dang koipeuha na paikhiak ni ni-in na si ding chih thei in, chi-in Tangtawn Toupa’ hinna sialin kon kichiamsakin kon vaukhol kei-a hia? Tua hun mahin, ka kiang ah: Na gen a hoih, ka mang ding, na chi kei-a hia? ⁴³ Tua bang ahih nung banghanga Tangtawn Toupa’ kianga na kichiamna zui lou a, kon thupiak zui lou na hia? a chi hi.

⁴⁴ Kumpipa’n Shimei kiang ah: Ka pa David tunga thil gilou na hih khempeuh na lungtangin na thei hi. Tuin, Tangtawn Toupa’n na thil gilou hih hon thuk ding ahi. ⁴⁵ Ahihhangin, kumpipa Solomon bel vualzawlin a om ding a, Tangtawn Toupa’ mai ah David kumpitutphah a kip den ding, a chi lai hi.

⁴⁶ Tua khitin, kumpipa’n Jehoiada’ tapa Benaia thu a pia a, Benaia a kuankhia a, Shimei tung ah khut a kha a, a that hi.

Solomon’ khut ah kumpigam kiptaka tunding ahita hi.