1 Kumpipate 16

Paite Bible

16 TUA khitin, Hanani’ tapa Jehu kiang ah Baasha douna Tangtawn Toupa’ thu hong tung a: ² Leivui apan nang kon domkang a, ka mi Israelte’ makaiin kon bawl a, ahihhangin, Jeroboam’ lampite na tawn a, ka mi Israelte na khialsak a, a khelhnateun kei non hehsak hi. ³ Tua bang ahih manin, Baasha leh a innkawte kangtum dek a, na innkuan sung zong Nebat’ tapa Jeroboam’ innkuan sung bangsak dek ka hi. ⁴ Baasha’ neih, khawpi sunga site, uite’n ne ding a, gamsunga site lah tungleng vasate’n ne ding hi, a chi hi.

⁵ Baasha’ vaihawm sunga thiltung dangte, a thilhih leh a sepkhiakte ahih leh, Israel kumpite’ tungthu gelhna laibu sunga kigelh hi lou hia? ⁶ Baasha bel a pu a pate kiang ah a khawlta a, Tirza ah a kivui hi. Tuachi-in, a tapa Ela in a mun a luah a, kumpipa-in hong pang hi.

⁷ Tua baan ah, Baasha in Tangtawn Toupa’ mitmuha thil gilou a hihte khempeuh hang bang, a thilhihte tungtawna amah a hehsak hang bang, Jeroboam innkawte hong batna hang bang, leh tua innkawte a hihmanthatna hang bangin, amah leh a innkawte kiang ah, Henani’ tungtawnin Tangtawn Toupa’ thu hong tung hi.

Israel Kumpipa Ela

⁸ Judah kumpipa Asa vaihawm kum, a kum 26 -na ah, Baasha’ tapa Ela, Israel kumpipain hong pang a, Tirza ah kum nih sung vai a hawm hi.

⁹ A galdouna kangtalai kimkhat tunga makai, a uliante khat Zimri in amah thah ding a simsawm hi. Tua laiin, Ela bel Tirza ah a om a, Tirza-a kumpi innpi ukpa Arza’ inn ah zukhamin a om hi. ¹⁰ Zimri hong lut a, a tunga khut khain a that hi. Tua bel Judah kumpipa Asa’ vaihawm kum, a kum 27 -na ahi. Tuachi-in, Zimri in Ela’ mun luahin kumpipain hong pang hi.

¹¹ Vaihawm a pat a, kumpitut-phah tunga a tut phetin, Baasha tanau nai hi-in a lawm hita leh pasal himhim a hinghawi kei hi. ¹² Tua

chi-a Zimri in Baasha innkuante a thah chimihna bel Tangtawn Toupa’n Baasha dema kamsang Jehu tungtawna a thugen bangbang ahi. ¹³ Ahang bel, Baasha leh a tapa Ela’ khelhnate khempeuh leh, Israel a khelhsakna uh hang leh, mannabei a milimte uh hanga Tangtawn Toupa, Israel Pathian a hehsakna uh hang ahi.

¹⁴ Ela’ vaihawm sunga thiltung dangte leh a thilhih khempeuh ahih leh, Israel kumpite’ tungthu kigelhna laibu sunga kigelh hi lou hia?

Israel Kumpipa Zimri

¹⁵ Judah kumpipa Asa’ vaihawm kum, a kum 27 -na ah, Zimri in Tirza ah ni sagih sung vai a hawm hi. Tua laiin, Filistia khawpi khat Gibethon ah sepaih pawlpi in giahphual a sat uhi. ¹⁶ Zimri in kumpipa thah simsawm a, a thah thu, tua giahphuala om Israelte’n a zak takun, tua ni mahmahin tua giahphual ah, sepaihhon makai ding Omri, Israel kumpipa dingin a phuang uhi. ¹⁷ Tua khitin, Omri leh a kianga om Israelte khempeuh Gibethon apan a nungkiik uh a, Tirza a sim uhi. ¹⁸ Zimri in tua khawpi a pukta, chih a muh takin, kumpi innpi-a kulh ah a tailut a, a kiim a kiang apan tua kumpi innpi meiin a hal a, tuachi-in a sita hi. ¹⁹ Ahang bel, Tangtawn Toupa’ mitmuha thil gilou hih a, Jeroboam lampite zui a, khelhna hih a, Israelte zong khialsaka, khelhna a hihte khempeuh hang ahi.

²⁰ Zimri’ vaihawm sunga thiltung dangte leh a helna thute ahih leh, Israel kumpite’ tungthu gelhna laibu sunga kigelh hi lou hia?

Israel Kumpipa Omri

²¹ Tua khitin, Israel mite pawl

nih a kisuah uh a, a kimkhatte’n kumpipa dingin Ginath’ tapa Tibni a deih uh a, a kimkhat dangte’n Omri a deih uhi. ²² Ahihhangin, Ginath’ tapa Tibni deihte sangin Omri deihte a hat zaw uhi. Tuachi-in, Tibni a si a, Omri, kumpipain hong pang hi.

²³ Judah kumpipa Asa’ vaihawm kum, a kum 31 -na ah Omri, Israel kumpipain hong pang a, kum sawmlenih sung vai a hawm a, tua laka kum guk sung Tirza ah vai a hawm hi. ²⁴ Ama’n Shemer apan Samaria mual ngunsiik talen nihin a lei a, tua mual ah khawpi khat a lam a, a min dingin tua mual nei masa Shemer’ min tamin Samaria a sa hi.

²⁵ Ahihhangin, Omri in Tangtawn Toupa’ mitmuhin thil gilou a hih a, ama’ ma-ate khempeuh sangin a khial zaw hi. ²⁶ Nebat’ tapa Jeroboam lampite leh a khelhna a zui a, tua mahin Israelte a khialsak a, tuachi-in, mannabei milimtein Tangtawn Toupa Israel Pathian a hehsak hi.

²⁷ Omri’ vaihawm sunga thiltung dangte, a thilhih leh a nasep mualsuahte, Israel kumpite’ tungthu gelhna laibu sunga kigelh hi lou hia? ²⁸ Omri zong a pu a pate kiang ah a khawl a, Samaria ah a kivui hi. Tua khitin, a tapa Ahab in a mun luahin kumpipain hong pang hi.

Israel Kumpipa Ahab

²⁹ Judah kumpipa Asa’ vaihawm kum, a kum 38 -na ah, Omri’ tapa Ahab, Israel kumpipain hong pang a, Samaria ah, Israel tung ah

kum 22 sung vai a hawm hi. ³⁰ Omri’ tapa Ahab in Tangtawn Toupa’ mitmuhin ama ma-a mite khempeuh sangin a khial zaw hi. ³¹ Nebat’ tapa Jeroboam khelhnate hih nangawn thil neuchikin a ngai a, Sidonte’ kumpipa Ethbaal’ tanu Jezebel zong a kitenpih a, Baal’ nasep panin a bia hi. ³² Samaria ah Baal tempul a lam a, tua ah Baal adingin maitam khat a dawh hi. ³³ Ahab in Ashera song 500 phut

a, ama’ ma-a Israel kumpite khempeuh sanga Tangtawn Toupa, Israel Pathian hehsak dingin thil gilou a hih tam zaw hi.

³⁴ Ahab’ damsungin, Bethel mi Hiel in Jerikho a lam thak hi. A tapa upapen Abiram taanlawh hialin a suangphumte a phum a, ama’ tapa tumpen Segub taanlawh hialin a kongpite a tungkhia hi. Tua bel, Nun’ tapa Joshua in Tangtawn Toupa’ thu a gen bangbanga tung ahi.