1 Kumpipate 12

Paite Bible

Rehoboam tunga Helna^(A)

12 ISRAELTE khempeuh Shekhem ah Rehoboam kumpipa-a bawl dinga a hawh manun Rehoboam zong Shekhem ah a hawh hi. ² Nebat’ tapa Jeroboam in hiai thu a zak laiin, Solomon apan a taaina Aigupta gama om lai ahi. Hiai thu a zak takin, Aigupta apan hong kik hi. ³ Tuachi-in, Jeroboam a sam uh a, amah leh Israel kikhawmte khempeuh Rehoboam kiang ah a hawh uh a, ama kiang ah: ⁴ Na pa’n koute tunga hakkol gikpi hon suan a, nang tu’n phutluiha nasepna leh koute hon sot hakkol gikpi zaangsak in, tuachi-in na nna ka sem ding uh a chi uhi.

⁵ Rehoboam in a dawng a: Ni thum sung paikhe phot unla, tua khit chiangin hong hawh nawn un, a chi hi. Tuachi-in, mipite a paikhia uhi.

⁶ Tua khitin, Kumpipa Rehoboam in a pa Solomon’ damsunga a nuaia sem upate thu a kum hi. Ama’n: Hiai mite dawn dingdan bang thuhilhna non pe thei ua? a chi hi.

⁷ Amaute’n: Tuni-a hiaite’ nasem na hih nop leh, dawnna hoih pe lechin, na silate ahi den ding uh, a chi uhi.

⁸ Ahihhangin, Rehoboam in upate thuhilhna a nawlh a, a khanvual, a nasem tuailaite thu a dong hi. ⁹ Amaute kiang ah: Non thuhilhna uh bang ahia? Ka pa’n ka tung ua hakkol gik hon sot hon hihzaangsak in, hon chi hiai mite bangchi dawn ding ka hia? chi-in a dong hi.

¹⁰ A khanvual tuailaite’n a dawng uh a: Na pa’n ka tung ua hakkol gik hon suan ahi, hon hihzaangsak in, chi hiai mite kiang ah: Ka pa’ kawng sanga kei’ khutme lianzaw ahi. ¹¹ Ka pa’n na tung uah hakkol gik hon suan a, ken ka giksak zaw sem ding. Ka pa’n noute zepna khauhual in hon zeep, ke’n aikamtein kon zeep ding, chi-in dawng in, a chi uhi.

¹² Ni thum nungin, Jeroboam leh tua mite khempeuh, kumpipa’n: Nithum nungin hong hawh nawn un, chi-a a hilh bangin, hong hawh nawn uhi. ¹³ Kumpipa’n khauhtakin amaute a dawng a, upate thuhilhna nawlhin, ¹⁴ tangvalte’ thuhilhna a zui zaw a: Ka pa’n na hakkol uh a giksak a, ken ka giksak zaw sem ding. Ka pa’n noute zeepna khauhualin hon zeep a, ke’n aikamtein kon zeep ding, a chi hi. ¹⁵ Tuachi-in, hi banga thil kihei lamdang Tangtawn Toupa akipan ahih manin, kumpipa’n mipite’ thu a ngaikhe kei hi. Hiai bel, Shilo mi Ahija tungtawna Tangtawn Toupa’n Nebat’ tapa Jeroboam kianga a thugen a tangtun nading ahi.

¹⁶ Israelte khempeuh in, kumpipa’n amaute a ngaikhe kei, chih a muh takun, kumpipa a dawng uh a:

Koute’n David-a

tan bang nei ka hi ua?

Jese’ tapa-a tan

bang nei ka hi ua?

Israel aw, na puanbuk tek uah

kik un!

David aw, na innkuansung

kikep in!

a chi uhi.

Tuachi-in, Israelte inn lam zuanin a paita uhi. ¹⁷ Ahihhangin, Judah gam sunga Israel teengte bel, a tung uah Rehoboam in vai a hawm lai hi.

¹⁸ Kumpipa Rehoboam in, phutluih nasemte’ makai Adoniram a sawlkhia a, ahihhangin, Israelte khempeuh in amah suangin a denglum uhi. Ahihhangin kumpipa Rehoboam bel a kangtalai ah a tuang man hamham a, Jerusalem tungin a suakta hi. ¹⁹ Tuni dongin, Israel bel David’ innkawte tung ah a hel lai uhi.

²⁰ Israelte khempeuh in Jeroboam hong kiknawnta chih a zak takun, mi sawlin, kikhopna ah a samsak uh a, Israel gam khempeuh tung ah kumpipain a bawlta uhi. Judah nam kia, David innkawte adingin a muanhuai uhi.

²¹ Jerusalem hong tun takin, Rehoboam in Judah uliante leh Benjamin nam a samkhawm a, a vekpi-un galdou thei mi 180,000 a pha uhi. Hiaite bel Israel innkawte dou a, Solomon’ tapa Rehoboam adinga kumpigam la nawn dinga a sapkhawm ahi.

²² Ahihhangin Pathian’ mi Shemaia kiang ah Pathian’ thu hong tung a: ²³ Judah kumpipa Solomon’ tapa Rehoboam kiang ah leh Judah innkawte khempeuh leh Benjamin innkawte khempeuh leh midangte khempeuh kiang ah: ²⁴ Hiai Tangtawn Toupa’ thugen ahi: Na sanggamte uh Israelte dou dingin kuantou kei un. Noute na inn chiat uah pai un. Hiai thil keima’ hih ahih man ahi, chi ahi, chi in, a chi hi. Tuachi-in, Tangtawn Toupa’ thu a mang uh a, Tangtawn Toupa’n thu a piak bangin inn lam ah a kik chiat uhi.

Bethel leh Dana Bawngnoulimte

²⁵ Tua khitin, Jeroboam in Efraim tanggam ah Shekhem kulh muanhuaiin a bawl a, tua ah a teeng hi. Tua apanin a kuankhia a, Peniel a lamkhia hi.

²⁶ Jeroboam a kingaihtuah a: Tu’n kumpipa David innkawte’ khuta tua kumpigam kiknawn thei hi a,

²⁷ hiai mite, kithoihnate laan dinga Jerusalema Tangtawn Toupa’ tempula a paitouh uleh, a toupa uh Judah kumpipa Rehoboam lama hong lunghei nawn ding uhi. Kei hon that ding uh a, Judah kumpipa Rehoboam lama kik ding uhi, a chi hi.

²⁸ Thuhilhna a zon nungin, kumpipa’n khamsiikin bawngnou lim nih a bawl hi. Mipite kiangah: Jerusalema na paitouh uh noute adinga haksa lua hi. Israel aw, Aigupta apana noute hon pikhetou na pathiante uh hiai ah om, a chi hi. ²⁹ Tua bawngnou lim khat Bethel ah a koih a, adang khat pen Dan ah a koih hi. ³⁰ Hiai thil bel khelhna hong hi ahi. Mipite lah hiai bawngnou lim khat be dingin Dan tantan a va pai uhi.

³¹ Jeroboam in munsangte ah biakna bukte a lam a, Levite hiloupi mi chiteng lak apanin siampite a bawl hi. ³² Judah gama kizang ankuanglui bangbang, a kha giatna, ani sawmlenga ni-a ankuangluina neih ding a bawlkhia a, tua ni-in maitam teng ah kithoihnate a laan hi. Hibangin, Bethela a tunkhiak bawngnou lim mai ah kithoihna a laan hi. Tua baan ah, Bethela munsang a bawlkhiakte ah siampite zong a sep a, a koih hi. ³³ A kha giatna, a ni sawmlenga ni, ama’ sehtawm tua khain Bethela maitam a dawh tung ah kithoihnate a laan hi. Tuachi-in, Israelte adingin ankuangluina a sep a, thillatte laan dingin maitam a naihtou hi.