Pianchilna 13

Paite Bible

Abram leh Lot Kikhenna

13 TUA khitin, Abram bel a zi tawh a neih khempeuh tawh, Aigupta gam apan a paikhia a, Lot a tonpih a; Negev ah a paitou uhi. ² Abram in gantate leh ngun leh kham a hau mahmah hi.

³ Amah, Negev ah a vialpai pai a, Bethel dong a pai a, Bethel leh Ai kikala a puanbuk kaihna mun hong tung hi. ⁴ Tua mun bel, hun paisa-a maitam a dawhna mun ahi. Abram in tua mun ah Tangtawn Toupa’ min a lou hi.

⁵ Abram tawh ton Lot in zong belamte, gantate leh puanbukte a nei hi. ⁶ Ahihhangin, amaute’ khawsak khawm nadingin gam a kiching kei hi. A neih a lam uh a tam manin, a tengkhawm thei kei uhi. ⁷ Ahang bel, Abram’ ganchingte leh Lot’ ganchingte kal ah kinak kiselna hong pianga ahi. Tua hun laiin, tua gam ah Kanante leh Perizte zong a teeng uhi.

⁸ Tua bang ahih manin, Abram in Lot kiang ah: Ka ganchingte leh na ganchingte kal ah kinakkiselna omsak kei ni. Eite unau sanggam i hi. ⁹ Na mai ah gam lianpi om hi lou hiam, kikhen mai ni. Nang veilama na pai leh kei taklam ah ka pai ding a, taklama na pai leh kei veilam ah, a chi hi.

¹⁰ Lot a khawdak a, Jordan lui phaizang teng a en a, tua gam in tui hoih a neih dan a mu hi. Tangtawn Toupa’ huan mah a bang a, Zoar zotna lam lah Aiguta gam mah a bang hi. Hiai bel, Tangtawn Toupa’n Sodom khawpi leh Gomora khwpi a hihsiat ma ahi. ¹¹ Tua bang ahih manin, Lot in Jordan lui phaizang teng a teel a, suahlam manawhin a paita a, amaute a kikhenta uhi. ¹² Abram, Kanan gam ah a teeng a, Lot bel phaizang khawpite ah a teeng a, Sodom khawpi kiang ah puanbuk a kai hi. ¹³ Sodom khawmite bel a gilou mahmah uh a, Tangtawn Toupa tung ah nakpitakin a khial uhi.

¹⁴ Abram leh Lot a kikhen nungun, Tangtawn Toupa’n Abram kiang ah: Na omna apan khawdak inla, simlam, mallam, suahlam, tumlam en in. ¹⁵ Na muh gam teng, nang leh na chisuan adingin kon peden ding hi. ¹⁶ Na chisuan leia leivui zah ka phasak ding a, mi’n leia leivui a sim zawh leh na suante a sim zou ding. ¹⁷ Thou inla, gam sung teng, a dung a vaiin tuansuak in, nang hon pia ding ka hi, a chi hi.

¹⁸ Tua bangin, Abram in Hebron-a om, Mamre’ singkung lianpipite kianga teeng dingin a puanbukte a tuah hi. Tua ah Tangtawn Toupa’ mai ah maitam khat a dawh hi.