Phatnalate 46

Paite Bible

Pathian, A Mite’ Bukna

Lapulian ading. Kora’ Tapate’ Phatnala Alamoth ^[a] -a Sak La.

46 PATHIAN i bukna leh thahatna,

mangbat laia huhpa nai

gige hi ahi.

² Tua ahih mana lau lou

ding hi hang.

Lei taimangin, mualte

tuipi sung ah tumin,

³ tuipi tuite ging zuazua-a phulin

tuihualte’n mualte liingsak

mah leh lau lou

ding hi hang. Sela

⁴ Lui khat om a, a tuite’n

Tungnungpen’ teenna mun

siangthou,

Pathian khawpi kipaksak hi.

⁵ Tua khawpi sunga Pathian om a,

tua khawpi puk lou ding hi.

Zing phalvaka Pathian in

amah huh ding hi.

⁶ Namte hehin kitom uh a,

kumpigamte puk uhi.

Ama’n a aw suah a,

lei zulmang hi.

⁷ Tangtawn Toupa Vanglianpen

in eite hon ompih a,

Jakob’ Pathian eite’ bukna

hi ahi. Sela

⁸ Hong pai unla, Tangtawn Toupa’

nasepte en un.

Ama’n leitung a hihsiat en un.

⁹ Ama’n leitunga kidounate beisak a,

ama’n thalphel kuaitan a,

teipi tum nih suah a,

lumte haltum hi.

¹⁰ Dai dide unla, Pathian ka hi,

chih thei un.

Namte laka pahtawia om

ding hi’ng.

Leitunga pahtawia om

ding hi’ng.

¹¹ Tangtawn Toupa Vanglianpen in

eite hon ompih a,

Jakob’ Pathian eite’ Kulhpi

hi ahi. Sela