Pemkhiakna 39

Paite Bible

Siampi Puansilhte

39 KHAU dum leh khau sandup leh a san-au kiganin mun siangthoua nasep nading siampi puansilhte a bawl uh a, Aron’ puansilh siangthoute a bawl uhi. Tangtawn Toupa’n Mosi thu a piak banga kibawl ahi.

Siampi' Puannakzem^(A)

² Kham khau leh khau dum, khau sandup leh khau sanau leh, ziza khau zangngat a khuka kigan siampi puanakzem a bawl uhi. ³ Tua khamsik pachikin a sek uh a, zang ngat chikchikin a phelkhap uh a, tua khaudum, khau sandup leh khau sanau leh ziza khau zangngat kigan ah, khutsiamtakin, a zem uhi. ⁴ A nunglam leh malam tawh kaih¬khawm nading, a liangzang ah a kaihna a bawl uh a, a tunglam gei tuak a khihkhawm uhi. ⁵ Siamneltaka gat, siampi puanakzem tunga puanduang kawnggak zong kham khau leh khau dum leh khau sandup leh khau sanau leh ziza khau zangngat khuka kigan a bawl uhi. Tangtawn Toupa’n Mosi thu a piak banga kibawl ahi.

⁶ Oniks suangte, a phum nadinga kibawl kham kuakte ah a bulh uhi. Tuate tung ah suai namna zungbuh khuak banga khuakin Israel tapate’ minte a gelh uhi. ⁷ Bezalel in tuate siampi puanakzem liangzang ah a khih a, Tangtawn Toupa’n Mosi thu a piak bangin, Israel’ tapate theih gigena ahi uhi.

Siampi Awmphaw^(B)

⁸ Amaute’n siampi puanakzem bangin, khutsiamte’n siamneltaka bawl awmphaw a bawl uh a, kham khau leh khau dum leh khau sandup leh khau san-au leh ziza khau zangngat a khuka kigan a bawl uhi. ⁹ Tua awmphaw bel, a khepa a dung a vai kikimin a bawl uh a, a khepin khutpek chia ahi. ¹⁰ Tua tung ah vual li-in suangmanphate a koih uh a, vual khatna ah rubi suang, topaz suang leh beril suang a koih uhi. ¹¹ A vual nihna ah sardi suang, safaiar suang leh daimon suang a koih hi. ¹² A vual thumna ah, zasin suang, ageit suang leh amethi suang a koih uhi. ¹³ A vual lina ah, khrusolait suang, oniks suang leh jaspar suang a koih uhi. ¹⁴ Israel tapate’ min zah banga suang sawmlenih kikoih ahi a, suai namna zungbuh khuak banga khuaka, Israel nam sawmlenih, suang khat tunga min khat chiat, kigelh ahi.

¹⁵ Tua awmphaw adingin, kham siang khainiang phek bangbang, khainiangte a bawl uhi. ¹⁶ Kham kuak nih leh kham sikbil nih a bawl uh a, tua sikbilte, awmphaw tunglam kiu nih ah a bulh uhi. ¹⁷ Tua awmphaw tunglam kiute-a om sikbilte ah tua khainiang phek nihte a khum uhi. ¹⁸ Khainiang phek mong nihte, tua kham kuak nihte ah a khih uh a, siampi puanakzema liang¬kaihna ah, a anglam pang ah a koih uhi. ¹⁹ Tua baan ah, kham sikbil nih dang a bawl uh a, awmphaw nuailam kiu nih dang ah a sunglam, siampi puanakzem tawh kisukha lam ah a bulh hi. ²⁰ Tua baan ah kham sikbil nih dang mah a bawl uh a, liangkaihna khaute tung ah, a anglam ah, siampi puanakzem nuai ah, puanakzem kawnggak hoihtaka kigan tawh a kimatna tak ah a bulh uhi. ²¹ Awmphaw-a sikbilte leh siampi puanakzema sikbilte, khau dumin a khihkhawm uh a, siampi puanakzem kawnggak hoihtaka kigan tung tak ah a om a, siampi puanakzem apan awmphaw a kiveikhiak louh nading ahi. Tangtawn Toupa’n Mosi thu a piak banga kibawl ahi.

Siampi Puansilh Dangte^(C)

²² Bezalel in siampi puanaktual, a veka dum suaka kigan a bawl hi. ²³ Tua puanaktual laizang ah a ngawngvang, a keklouh nadinga a ngawngpehna nei, a bawl hi. ²⁴ Tua puanaktual mong ah khaudum leh khau sandup leh khau sanau khukin mimthei gahte a bawl hi. ²⁵ Kham sik siangin longte a bawl uh a, tua puanaktual monga mimthei gahte kal ah, a koih uh a, ²⁶ long khat leh mimthei khat kikalhelhin, puanaktual mong ah a om suak hi. Tangtawn Toupa’n Mosi thu a piak banga, siampi nasep chianga silh ding puanaktual kibawl ahi.

²⁷ Aron leh a tapate adingin, puanmalngat siamneltaka kiganin, puanaktual tungsilhte a bawl uhi. ²⁸ Puan malngat dialkhipte, puan malngat lugakna dialte, puanmalngat pheituam tomte zong a bawl uhi. ²⁹ Tua lugakna dialte bel khaudum, khau sandup leh khau sanau leh ziza khau zangngat a khuka kigan puan malngata kibawl, kilawmtaka zep ahi. Tangtawn Toupa’n Mosi thu a piak banga kibawl ahi.

³⁰ Khamsik siang pekin siampi¬lukhu siangthou a bawl uh a, suainamna zungbuh khuak bangin khuakthawhin:

SIANGTHOUNA

TANGTAWN TOUPA-A AHI

chiin a gelh uhi. ³¹ Tua kham sik pek ah khaudum a khih uh a, tuain dialkhip tung ah tua siampilukhu a henbelh uhi. Tangtawn Toupa’n Mosi thu a piak banga a bawl uh ahi.

Mosi in Biakbuk Vel^(D)

³² Tua bangin, Kihoupihna Puanbuk bawlna khempeuh zawh ahita a, Tangtawn Toupa’n Mosi thu a piak bangin, Israel tate’n bangkim a bawl vek uh a, a zousiangta

uhi. ³³ Amaute’n tua biakbuk, Mosi’ mai ah hon pua uh a, a puanbuk leh a vanzatte khempeuh, mekkilhte, singpekte, zawlte, khuamte, a tunnate, ³⁴ a tungkhuhna belamtal vun huansante, a tungkhuhna saham vunte, a tungkhuhna puanzak, ³⁵ Theihpihna singkuang leh a zawnna zawlte leh thoihdamna mun, ³⁶ dawhkan leh a vanzatte, Pathian Ompihna tanghou, ³⁷ kham siang meivak mung leh meivakte tawh lep ding bangtaka kilemsa, a vanzat khempeuhte leh a det sathau, ³⁸ kham maitam, nilh sathau, gimnamtui, biakbuk kongkhak puanzak, ³⁹ sumsan maitam leh a sumsan len, a zawnna zawlte, a vanzat tuium belsuante khempeuh, tuikuang leh a tunna khete, ⁴⁰ huang umna puanzakte, a khuamte leh a tunnate, huang umna puanzak, a khaute, a sik khetphimte, biakbuk, tua Kihoupihna Puanbuk sung nasep nading vanzatte khempeuh, ⁴¹ mun siangthoua zat ding siampi nasepna puansilhte, siampi Aron’ puansilh siangthoute leh a tapate’ siampi nasepna puansilh gat thawhte tawh, a vekin hon pua uhi.

⁴² Tangtawn Toupa’n Mosi thu a piak bangbangin, Israel tate’n na khempeuh a semkhinta uhi. ⁴³ Tua khitin, Mosi in na khempeuh a vel a, Tangtawn Toupa’ thupiak bangbangin a semkhin taktak uh, chih a mu hi. Tua khitin, Mosi in amaute a vualzawl hi.