Nasepte 20

Paite Bible

Makedonia leh Grik Gama Zinna

20 TUA bang kitom buaina a ven nungin, Paul in nungzuite a samsak a, amaute a hanthawn hi. Amaute mangpha khakin, Makedonia gam zuanin a kipankheta hi. ² Tua gam sung ah a zin a, amaute hanthawnin thu a gen a, a tawpin, Grik gam hong tung a, ³ tua ah kha thum a taam hi. Suria gam zuana longa a pai ding kuanin, Judate’n amah thah ding a sim sawm uhi. Tua bangin, Makedonia gam tawna kilehkik ding thutanna a bawlta hi. ⁴ Asia gama a zinna-a amah zuite bel, Beria khaw mi Purha’ tapa Sopater, Aristarkha leh Thesalonika khaw mi Sekunda, Derbe khaw mi Gaia leh Timothi, tua baan ah, Asia gam mi Tukika leh Trofima ahi uhi. ⁵ Hiai mite a na mapai uh a, Troas ah koute gel hon na ngak uhi. ⁶ Ahihhangin, koute bel, Tanghou Silngousawhlouh Ankuang¬lui nungin, Filipi apan longin ka pai uhi. Ni nga nungin, Troas ah amaute kiang ka tung uh a, tua ah ni sagih ka taam uhi.

Troas-a Nasepna

⁷ Nipi kala ni masapen ni-in, tanghou balkham dingin koute ka paikhawm uhi. Paul in tua-a mite Pathian thu a suutpih hi. Ama’n a zing chianga kipatkhiak a sawm manin zankim dong thu a gen hi. ⁸ Inndan tungnung ka kikhopna uah, meivak tampi a kide hi. ⁹ Tua kikhopna ah, Eutikha kichi tangval khat a om a, amah tawhlet ah a tu hi. Paul in thu a gengen laiin, amah a na ihmu a, innchial thumna apanin a kesuk a, sisa-in a phong uhi. ¹⁰ Paul a vakumsuk a, amah a bawh a, a kawi a: Patau kei un! Amah a hing lai, a chi hi. ¹¹ Paul, inndan tung nung ah a paitou kik a, tanghou a balkham a,

an a ne hi. Thu sawtpi a gen lai a, a zing khawvakin a kipankhia hi. ¹² Amaute’n tangvalpa hingdamin inn ah a paipih uh a, hanthawn in a om mahmah uhi.

¹³ Koute longin ka na pai masa uh a, Asos zuanin ka pai uhi. Tua muna longa Paul laak ding ka sawm uh ahi. Paul bel, khea paina lam tot sawma hibanga thil gelkhol ahi. ¹⁴ Ama’n koute Asos khua-a hon tuah takin, long ah ka tuangsak uh a, Mitulen ka zuan uhi. ¹⁵ Mitulen apanin longin ka pai uh a, a zing chiangin, Khios tuikulh gal ka tung uhi. A zing nawnin, Samos tuikulh ka tung uh a, Troguliam ah ka giak uhi. A zing chiangin, Mileta ka tung uhi. ¹⁶ Paul in Jerusalem tun baih ding, a hih thei liai aleh, Pentikos Ankuanglui lap ding a ut hi. Tua bang ahih manin, Asia gama hun sukbei louh nadinga, Efesa paikheng a sawmsa mawng ahi.

Efesa Upate Hanthawnna

¹⁷ Paul in Mileta apanin, Efesa ah mi a sawl a, saptuam upate a samsak hi. ¹⁸ Amaute hong tun takun, ama’n amaute kiang ah: Asia gam kong siik masak ni apan, noute laka ka om sung tenga ka nuntak dan na thei uhi. ¹⁹ Kingainiamtak leh khitui ke kawmin Toupa’ nna ka sem a, Judate’ hon sawmna hanga ze-etna haksatak ka tuah lai nangawnin ka sem teitei hi. ²⁰ Noute adinga phatuam ding bangmah kon im kei a, tangpi’ theihin thu ka gen a, inn teng ah noute kon sinsak gige hi. ²¹ Judate leh Grikte kiang ah zong theihpihna thu genin, Pathian lam nga-a lungheina thu leh i Toupa Jesu Khrist upna thu ka gen hi.

²² Ngai un, Kha in hon sawl teitei a, tuin Jerusalema hawhtou ding ka hi. Tua ah ka tunga bang tung ding hiam chih ka thei kei. ²³ Henna leh gimthuakna in hon nadawn ding, chi-a Kha Siangthou in khua tenga hon hilhkholh ka thei lel hi. ²⁴ Ahihhangin, tuate phamawh ka sa kei. Lungnuamtakin kitaitehna tai khinin, Toupa Jesu’ hon piak nasep semkhin peuhmah phot leng, ka hinna nangawn khiaklah tham ka sa kei hi. Tua ka nasep bel, Pathian’ hehpihna tangthupha gen ahi.

²⁵ Pathian’ kumpigam thu genin, noute lak ah, a lang a lang ah ka na diangta. Ahi a, noute kuamah in ka mel na mu nawn kei ding uh, chih ka thei hi. ²⁶ Tua ahih manin, mi khempeuh’ sisan ah ka hul, chih noute kiang ah tuni-in ka phuang ahi. ²⁷ Ahang bel, noute kianga Pathian’ deihlam bukim gen ding ka kidaam peuhmah kei hi. ²⁸ Noute kiveng unla, belamhonte khempeuh veng un. Kha Siangthou in, amaute laka bishop ^[a] hi dingin noute hon bawl ahi. Pathian’ saptuam, a sisana a leisa chingte hi un. ²⁹ Ka paikhiak nung chiangin, nge-hang giloute na lak uah hong lut ding a, belamte a hawi kei ding uh, chih ka thei hi. ³⁰ Nungzuite amau lama kaimang dingin, thutak kaikawi pawl, noumau laka mi nangawn hong om ding hi. ³¹ Hiai hangin kiveng un! Kum thum vingveng, a sun a zan khitui ke kawma noute kuapeuh hon vauhilh ka tawp louh dan thei gige un.

³² Tu’n, Pathian’ khut ah leh, noute hon lamtou thei a, Pathian’ sehtuam siangthoute laka goutan hon pe thei, Pathian’ hehpihna thu ah noute kon kemsak hi. ³³ Kuama’ sum-le-pai, ahih kei leh, silh-le-ten ka deihgawh ngei kei. ³⁴ Hiai khutte’n kei’ taksap leh, ka kianga omte’ taksap awng a hu, chih na thei uhi. ³⁵ Thil ka hih peuhmah ah, noute’n hibanga nakpi-a nasem a, a hatloute na huh ding daan uh hon lak ka hi. Laak sangin piak mah, nunnopna ahi zaw hi, chih Toupa’ thute thei gige un, a chi hi.

³⁶ Paul in hiaite a gen khitin, amaute khempeuh tawh a khukdin a, a thuum hi. ³⁷ Amaute’n amah ngawngkawiin a tawp uh a, nak¬pitakin a kap uhi. ³⁸ Amaute’n ama’ mel mu ngeinawn lou ding, chih a gen in amaute a dahsakpen hi. Tua khitin, amaute’n long chiang dong amah a vakha uhi.