Kisimna 31
Paite Bible
Midiante’ tunga Phulakna
31 TANGTAWN Toupa’n Mosi kiang ah: 2 Israelte adingin Midiante tung ah phuba la in. Tua nung chiangin, na mite laka lakkhawm na hita ding hi, a chi hi.
3 Tuachi-in, Mosi in mipite kiang ah: Midiante dou ding leh amaute tunga Tangtawn Toupa’ phuba la dingin na pasalte uh bangzah hiam galvan un. 4 Israel namte apan mi 1,000 khat chiat galdou dingin sawl un, a chi hi. 5 Tuachi-in, pasal 12,000 galdou dingin a kigalvan uhi. Nam khat apan 1,000 zel Israel behte apan piakkhiak ahi uhi. 6 Mosi in nam khat laka 1,000 zel kidouna phual ah a sawl a, siampi Eleazar’ tapa Fineha in mun siangthou apan vante leh thu theihsak nading pengkulte a la a, amaute tawh a ton hi.
7 Tangtawn Toupa’n Mosi thu a piak bangin, amaute’n Midiante a dou uh a, pasal peuhmah a that uhi. 8 A thahte uh lak ah Evi, Rekem, Zur, Hur leh Reba, tua Midian kumpipa ngate a tel uhi. Beor’ tapa Balaam zong namsauin a that uhi. 9 Israelte’n Midian numeite leh naupangte salin a man uh a, Midiante’ bawnghonte, belam leh kelhonte khempeuh leh vante gallak sumin a la uhi. 10 Midiante’ tenna khawpi khempeuh leh a giahphualte uh a haltum vek uhi. 11 Gallak sum khempeuh leh vansuhte khempeuh mihingte leh gantate tawh a la uhi. 12 Tua salmatte, gallakte leh vante hon pua uh a, Jerikho gal, Jordan lui dung, tua Moab phaizang ah, Mosi leh siampi Eleazar leh Israel kikhawmte kiang ah giahphual ah hon tun uhi.
13 Mosi, siampi Eleazar leh nam makaite, giahphual pua-a amaute vatuak dingin a kuankhia uhi. 14 Mosi bel galmun apan hong kik tua sepaihhon makaite, tua 1,000 pawlpawlte’ makaite leh 100 pawlpawlte’ makaite tung ah a heh hi.
15 Ama’n amaute kiang ah: Numeite khempeuh nungta dinga phal na hi umaw? 16 Balaam’ thuhilhna zuite amaute ahi uh a, Peora thiltung ah Tangtawn Toupa apan Israelte piimang dinga vanzatte ahi uh a, hipi in Tangtawn Toupa’ mite a nuai hi. 17 Pasal naupangte khempeuh that unla, pasal tawh lumkhawmsa numei peuhmah that un, 18 pasal tawh lumkhawm ngei nailou nungak peuhmah bel noute adingin hinghawi un.
Israelte Siansuahna
19 Mi khat peuh that, ahih kei leh, thahsa khat peuh lawngkha khempeuh, ni sagih sung giahphual pua ah giak un. A ni thum ni leh ni sagih ni-in noute leh na salmatte uh na kisiansuah ding uh ahi. 20 Puansilh peuhmah leh savun, kelmul, ahih kei leh singa kibawl van peuhmah siansuah un, a chi hi.
21 Tua khitin, siampi Eleazar in galdoua kuan sepaihte kiang ah: Tangtawn Toupa’n Mosi a piak Dan in a ngiat hiai ahi: 22 Kham sik, ngun sik, sumsan sik, tiin sik, haak sik leh 23 thil dang mei kattum theihlouh van khempeuh meia paisuaksak ding ahi. Tua khit chiangin, a siang ahi ding. Ahihhangin, siansuahna tuia zong paisuaksak ding ahi. Mei kattum theih van peuhmah tua tuia paisuaksak ding ahi. 24 A ni sagih ni-in na puansilhte uh sawp un, a siang na hita ding uh. Tua khit chiangin giahphual sung ah nong lut thei ding uh, a chi hi.
Gallakte Hawmna
25 Tangtawn Toupa’n Mosi kiang ah: 26 Nang leh siampi Eleazar leh nam-a innkuan lutangte’n matsa mihingte khempeuh leh gantate sim un. 27 Kidouna-a pang sepaihte leh nam sunga midangte lak ah gallakte hawm un. 28 Kidouna-a pang sepaihte lak apan, mihingte, bawngte, sabiltungte, belamte hi-in, kelte hita leh 500 zela khat, Tangtawn Toupa kianga siah piak dingin sepkhia un. 29 Amaute’n kimkhat a tan uh lak apan hiai siah la unla, Tangtawn Toupa’ tan hi dingin siampi Eleazar kiang ah pia un. 30 Israelte’n kim khat a tan uh lak apan mihing, bawng, sabiltung, belam hi-in, kel hita leh, 50 laka khat telkhia unla, Tangtawn Toupa’ biakbuk kema mawhpua Levite kiang ah pia un, a chi hi. 31 Tuachi-in, Tangtawn Toupa’n Mosi thu a piak bangin, Mosi leh siampi Eleazar in a hih uhi.
32 Sepaihte’n gallak a lakte uh belam 675,000 leh, 33 bawng 72,000 leh, 34 sabiltung 61,000 leh, 35 pasal tawh lumkhawm ngei nailou numei 32,000 ahi.
36 Galphuala galdou sepaihte’n a kimkhat a tan uh:
Belam 337,500 ahi a, 37 tua
lak apan Tangtawn
Toupa ading siah 675 ahi.
38 Bawng 36,000 ahi a, tuate lak apan Tangtawn
Toupa ading siah 72 ahi.
39 Sabiltung 30,500 ahi a, tuate lak apan Tangtawn
Toupa ading siah 61 ahi.
40 Mihing 16,000 ahi a, tuate lak apan Tangtawn
Toupa ading siah 32 ahi.
41 Mosi in tua siah Tangtawn Toupa’ tan siampi Eleazar kiang ah a pia hi. Tua bel, Tangtawn Toupa’n Mosi thu a piak bangbang ahi.
42 Israelte’n a kim khat a tan uh, Mosi in galdoute apan 43 a sehkhiak, mipite’n a kimkhat a tan uh, belam 337,500 leh, 44 bawng 36,000 leh, 45 sabiltung 30,500 leh, 46 mihing 16,000 ahi. 47 Tangtawn Toupa’n Mosi thu a piak bangin Israelte’n a kimkhat a tan uh lak apanin Mosi in mihing leh ganta 50 lak ah khat chiat a telkhia a, Tangtawn Toupa’ biakbuk kema mawhpua Levite kiang ah a pia hi.
48 Tua khitin, sepaihhon a pawlpawlte tunga makaite, 1,000 pawlpawl tunga makaite, leh 100 pawlpawl tunga makaite Mosi kiang ah a vapai uh a, 49 a kiang ah: Na silate’n na thu nuaia om sepaihte ka sim uh a, khat lel zong kimlou a om kei. 50 Tuachi-in, koute chiat in ka muhkhiak uh khama kibawl banbuhte, taute, suainamna zungbuhte, bilbahte leh khite Tangtawn Toupa’ maia thillat dingin kon tawi uhi, a chi uhi.
51 Mosi leh siampi Eleazar in amaute apan tua kham, tua khutsiam silbawlte khempeuh a saang uhi. 52 1,000 pawlpawl tunga makaite leh 100 pawlpawl tunga makaite apan khamte khempeuh Mosi leh Eleazar in Tangtawn Toupa’ maia thawnpiaka a piakte uh shekel 16,750 -a gik ahi. 53 Sepaihte’n gallak amau ading a la tek uhi. 54 Mosi leh siampi Eleazar in tua khamte, 1,000 pawlpawl tunga makaite leh 100 khat pawlpawl tunga makaite apan a sang uh a, Tangtawn Toupa’ maia Israelte adinga theihgigena hi dingin, Kihoupihna Puanbuk sung ah hon tawilut uhi.
The Holy Bible in Paite, Copyright © 2004 Bibles International: Grand Rapids, Michigan.