1 Samuel 11

Paite Bible

Saul in Jabesh Khawpi Hukhia

11 AMON mi Nahash a kuantou a, Jabesh Gilead a sim hi. Jabesh mite khempeuh in amah kiang ah: Koute tawh kal ah kilemna thukhun bawl in, hi leh koute na nuai ah ka om ding uhi, a chi uhi.

² Ahihangin, Nahash in a dawng a: Noute na vekpiun na taklam mittangte uh ka khelkhe ding a, Israelte khempeuh ka zahlaksak ding a, tua mah lemna thukhun ahi ding, a chi hi.

³ Jabesh upate’n amah kiang ah: Israel gam khempeuha thangkou ka sawl theih nadingun ni sagih hun hon pia in. Koute hukhe ding kuamah hong kuan kei leh na khutsung ah kong kipelut ding uh, a chi uhi.

⁴ Thangkoute Saul omna Gibea hong tung uh a, mipite kianga hiai dinmun thu a gen takun a vekpiun nakpitakin a kapkhia uhi. ⁵ Tua laitakin lou apanin Saul hong tung a, a bawngtalte nung ah hong pai hi. Ama’n: Mipite bang lungkhama kap ahi ua? a chi hi. Amaute’n: Jabesh mite’ thugen a gensawn uhi.

⁶ Saul in a thugente uh a zak takin, Pathian’ Kha a tung ah vangliantakin hong tung a, ama’ thangpaihna a kuang hi. ⁷ Bawngtal tuak khat a la a, a semnen a, Israel gam sung teng ah a baak a baakin thangkoute a pawsak a, a khak a: Saul leh Samuel nungzui lou mi peuhmah a bawngtalte tung ah hibang tung ding ahi, a chisak hi. Tua khitin mipite tung ah Tangtawn Toupa launa a tung a, mi khat bang maiin a kuankhia uhi. ⁸ Saul in amaute Bezek-a a kaihkhawm takin, Israelte 300,000 a pha uh a, Judahte 30,000 a pha uhi.

⁹ Amaute’n thangkou hong kuante kiang ah: Jabesh Gileadte kiang ah: Zing chianga nisat laitakin hutkhiak na hi ding uh, chi un, a chi uhi. Thangkoute chiahkika, hiai thu Jabeshte kianga a gen takun thathouin a kipak mahmah uhi. ¹⁰ Amaute’n: Amonte kiang ah: Zing chiangin na khutsung uah kipekhia n’ung, na lawh lawh uh hon lawhta un, a chi uhi.

¹¹ A zingchiangin, Saul in a mite pawl thumin a khen a, zanven nunung laitakin Amonte’ giahphual a luh uh a, nisat laitak dong amaute a that uhi. A dama khawsuak sunte a taaizaak uh a, mi niha kipawl muh ding zong a om kei hi.

Saul, Kumpipain Kikipsak

¹² Mipite’n Samuel kiang ah: Saul in eite tunga vaihawm ding maw? chi-a dong kuate ahia? Tuate koute kiang hon tun un, amaute ka that ding uh, a chi uhi.

¹³ Ahihhangin Saul in: Tuni-a Tangtawn Toupa’n Israel hukhia ahih manin tuni’n kuamah thah ahi kei ding, a chi hi.

¹⁴ Tua khitin Samuel in mipite kiang ah: Hong pai un, Gilgal ah hawh ni-in, kumpi hihna tua mun ah pomkip thak ni, a chi hi. ¹⁵ Tuachi-in mipite khempeuh Gilgal ah a hawh uh a, Tangtawn Toupa’ mai ah kumpipain Saul a pomkip uhi. Tua ah Tangtawn Toupa’ mai ah kithoihnate leh lemna thillat a laan uh a, Saul leh Israelte khempeuh in lungnopna lianpi a bawl uhi.